Тарскай чемпионата-2022: Эдэрдэр кимэллэр

Мэҥэ Хаҥалас улууһун киинигэр Аллараа Бэстээххэ саҥа үлэҕэ киллэриллибит «Парус» спортивнай комплекска Н.Н. Тарскай аатынан Саха сирин көҥүл тустууга биирдиилээн уонна хамаанданан бастыыр иһин чемпионата ыытыллан түмүктэннэ. Ылан көрдөххө, быйылгы чемпионат – ураты чемпионат, Саха сиригэр спорт бу көрүҥэр 65-с чемпионат уонна Н.Н. Тарскай аатынан диэн ыытыллыбыта 50-с сыла. Онон үбүлүөйдээх чемпионат диэххэ сөп.

Тустуу хайдах барбытын, ким кими кыайбытын барытын билэн-көрөн олороҕут. Республикатааҕы телевидениеҕа, сонуну киэҥник тарҕатар средстволарга икки күнү быһа тутатына киэҥник сырдаттылар. Онон ону хатылыы барбакка, бэйэм санааларбын суруйарга сананным.

Бастатан туран, биһиги Мэҥэ Хаҥалас улууһун салалтатыгар (баһылык Н.П. Старостин) махтаныах тустаахпыт. Бу чемпионаты бэлэмнээн, тэрийэн ыыппыттарыгар. Итиэннэ кэрэхсэбиллээҕэ баар, саҥа үлэҕэ киллэриллибит киэҥ-куоҥ, сырдык, ыраас спортивнай комплекска үүммүт 2022 сылга бастакы күрэхтэһии тэрилиннэ. Саҥа тутууга, баарыстаах спорка олимпийскай чемпион Тимир Пинегин аата иҥэриллибит. Дьэ, кырдьык, улахан уораҕай эбит. Ханнык баҕарар улахан таһымнаах күрэхтэһиини тэрийэн ыытарга табыгастаах тутуу үлэҕэ киллэриллибит. Чемпионат үрдүк тэрээһиннээхтик ыытылынна диир кыахтаахпыт.

Билэргит курдук, пандемиянан сибээстээн икки сыл Н.Н. Тарскай күрэхтэһиилэрэ ыытыллыбатахтара. Онон Аллараа Бэстээхтээҕи чемпионат – тустууну суохтаабыт, тустууну ахтыбыт дьоҥҥо улахан сэргэхсийиини үөскэттэ. Уруккубутун эргитэн, тустууктарбытын этэргэ дылы, тутан туран илэ харахпытынан көрдүбүт. Уонна оттон тустууну таптыыр, тустууга бэриниилээх дьон улахан дуоһуйууну ыллыбыт диэххэ сөп. Бу иһин, тэрийээччилэргэ барыларыгар барҕа махтал!

Чемпионакка 29 хамаандаттан барыта 293 бөҕөс күөн көрүстэ. Бу чемпионат түмүгүнэн аны сайын Бороҕоҥҥо ыытыллар Саха сирин норуоттарын VIII спортивнай оонньууларын кыттыылаахтара талыллар, сүүмэрдэнэр буолан, хапсыһыылар хаһааҥҥытааҕар да сытыытык бардылар.

Быйылгы чемпионаты «эдэрдэр кимиилэрэ» диэххэ сөп. Ол курдук, 17-18 саастаах уолаттар Лев Павлов, Артем Слепцов, Николай Охлопков, 20 саастаах Андриан Ленскэй бэйэлэрин кимиилээх, кыайыыга дьулуурдаах тустууларынан үчүгэй өйдөбүлү хаалларбыттарын бэлиэтиир тоҕоостоох. Павлов, Слепцов, Охлопков олох соторутааҕыта, хаар түһүөн эрэ иннинэ Красноярскайга, Бувайсар Сайтиев бирииһигэр уолаттар ортолоругар норуоттар икки ардыларынааҕы турнирга ситиһиилээхтик тустубуттара дии. Оччолорго кинилэри – улахан дьоҥҥо Саха сирин баар-суох чемпионатыгар маннык тустуохтара диэн санаабатах киһи элбэх буолуохтаах. Онон эдэр уолаттар соһуччу түгэни бэлэхтээтилэр. Кинилэри улаханнык арбаабакка, сөптөөх сыалы-соругу туруоран, усулуобуйаны олохтоон, салгыы туһуннаран иһиэххэ.

Чемпионаты – СР көҥүл тустууга сүүмэрдэммит хамаандатын кылаабынай тренерэ Александр Оконешников болҕомтолоохтук кэтээн көрдө уонна сэрэйдэххэ, эдэр уолаттары бэлиэҕэ ыллаҕа. Сотору биһиги Дьокуускайбытыгар Дальнай Восток чемпионата ыытыллара этилиннэ. Биллэрин курдук, ол күрэхтэһии түмүгүнэн Россия чемпионатыгар кыттааччылар сүүмэрдэниэхтэрэ. Буолан ааспыт күрэхтэһии кэнниттэн онно кыттыахтаах Саха сирин хамаандата сүрүннээн талылынна диэххэ сөп.

Тустууну маннык көрбөтөхпүт ыраатта. Санааны төһө баҕарар салгыы суруйуохха сөп этэ. Бу бастакы суруйуу буолан ааспыт түһүлгэ – иһитиннэрии бэрээдэгинэн бэрилиннэ. Онон сорох санааны сыыйа-баайа аныгыскыга сырдатыаҕым. Биһиги сайтпытын кэтээн көрөргүтүгэр, ааҕаргытыгар, санааҕытын үллэстэргитигэр ыҥырабын.

Чемпионат түмүк көрдөрүүтэ:

57 кг: 1. Лев Павлов (Сунтаар), 2. Петр Копылов (ХИФУ), 3. Айаал Белолюбскай (Уус Алдан), 3. Айсиэн Винокуров (Мэҥэ Хаҥалас).

61 кг: 1. Петр Константинов (ХИФУ), 2. Дьулустаан Федотов (Үөһээ Бүлүү), 3. Артем Слепцов (Муома), 3. Яков Павлов (Томпо).

65 кг: 1. Эдуард Григорьев (Чурапчы), 2. Семен Владимиров (Таатта), 3. Ньургун Александров (Үөһээ Бүлүү), 3. Айхаан Антонов (Ньурба).

70 кг: 1. Айсен Потапов (Үөһээ Дьааҥы), 2. Константин Капрынов (Чурапчы), 3. Вальтер Владимиров (Горнай), 3. Николай Сивцев (Мэҥэ Хаҥалас).

74 кг: 1. Виктор Рассадин (Орто Халыма), 2. Станислав Свинобоев (Мэҥэ Хаҥалас), 3. Егор Пономарев (Чурапчы), 3. Албан Аввакумов (ХИФУ).

79 кг: 1. Константин Власов (Мэҥэ Хаҥалас), 2. Тимур Николаев (Үөһээ Бүлүү), 3. Ларион Андреев (Хаҥалас), 3. Андриан Ленскэй (Орто Халыма).

86 кг: 1. Герман Устинов (Ньурба), 2. Револий Самсонов (Сунтаар), 3. Олег Чернов (Томпо), 3. Софрон Софронов (Мэҥэ Хаҥалас).

92 кг: 1. Иннокентий Иннокентьев (Үөһээ Бүлүү), 2. Игорь Софронеев (Нам), 3. Владимир Данилов (Сунтаар), 3. Александр Халыев (Таатта).

97 кг: 1. Ньургун Сергин (Мирнэй), 2. Никита Софронов (Чурапчы), 3. Николай Николаев (Бүлүү), 3. Сергей Семенов (Нам).

125 кг: 1. Никита Хабаров (ХИФУ), 2. Эдуард Максимов (Горнай), 3. Леонид Попов (Таатта), 3. Андрей Аронов (Мирнэй).

Хамаанданан түмүк: 1. Мэҥэ Хаҥалас, 2. Чурапчы, 3. Сунтаар, 4. Уус Алдан, 5. Үөһээ Бүлүү, 6. Нам.

Манна даҕатан эттэххэ, ситэтэ суох ааҕыынан Мэҥэ Хаҥалас — 9, Чурапчы, Сунтаар, Уус Алдан — 6-лыы, Үөһээ Бүлүү, Нам, Таатта, ХИФУ — 5-тии, Дьокуускай — 4, Ньурба — 3, Кэбээйи, Горнай, Хаҥалас, Орто Халыма — 2-лии, АГАТУ, Үөһээ Дьааҥы, Бүлүү, Томпо, Анаабыр, Муома — 1-дии путёвканы ыллылар.

Аны, чугастааҕы кэмҥэ Саха сирин норуоттарын VIII спортивнай оонньууларыгар сүүмэрдиир икки күрэхтэһии буолара былааннанар. Онно 4-түү киһи талыллыа. Итинэн, Бороҕоҥҥо ыйааһын ахсын 16-лыы бөҕөс кыттыахтаах.

Петр ПАВЛОВ.      

Хаартыскаҕа: бастакы ыйааһын чемпиона уонна призердара.

Добавить комментарий

Ваш адрес email не будет опубликован.