Өрөспүүбүлүкэ чөмпүйэнээтигэр кимнээх кытталлара билиннэ

Чурапчы улууһугар бильярд успуордун сайыннарыы бэдэрээссийэтэ 2017 сыллаахтан, улуус баһылыгын Андрей Ноговицын өйөбүлүнэн тэриллэн үлэтин саҕалаабыта. Онно бэдэрээссийэ бэрэссэдээтэлинэн Иннокентий Архипов талыллыбыта, кини солбуйааччытынан Василий Пудов анаммыта. Ону таһынан Сылаҥ, Чакыр, Хатылы, Хоптоҕо, Болтоҥо, Хайахсыт нэһилиэктэригэр филиаллар тэриллибиттэрэ.

“Бэргэн” бильярднай клуб, Чурапчы нэһилиэгин илин баһыгар Анастасия Ушницкая аатынан переулокка, кини төрөппүт уола Руслан Викторович Ушницкай чааһынай уһаайбатыгар тутуллан турар. Бастакы күрэхтэһиилэр өссө 2016 сыллаахтан саҕаламмыттара. Ол кэмҥэ биир остуолга 30-60 ыспарсымыаҥҥа тиийэ күрэхтэһэллэр этэ. Ити түмүгэр 2018 сыллаахха Амма улууһугар ыытыллыбыт улахан күрэхтэһиигэ кыттан биһиги улууспут сүүмэрдэммит хамаандата 16 хамаандаттан 5 бастыҥнар истэригэр киирбиттэрэ.

“Ити күрэхтэһииттэн кынаттанан, улууспут баһылыга Андрей Тимофеевич көҕүлээһинэн клубпутугар икки бильярд остуола туруоруллубута. Оттон клуб уораҕайын Руслан Викторович бэйэтэ оҥостон бүгүҥҥү күҥҥэ үлэлии турар. Онтон бүгүн бильярд көрүҥэр улууска аан бастакы официальнай күрэхтэһии ыытылла турар. Бастакы күн эдэрдэргэ диэн, манна Сылаҥ, Хатылы, Чурапчы, Болтоҥо нэһилиэктэриттэн уолаттар киирэн күрэхтэһиини саҕалаатылар. Биһигини кытары сэргэ бүгүн Чакыр нэһилиэгэр эмиэ улахан күрэхтэһии ыытылла турар. Элбэх күрэхтэһээччи кэллэҕинэ, биир дьиэ иһигэр кыайан баппаппыт, холобура урут сарсыарда саҕалаан бараммыт түүннэри оонньоон эбиэккэ түмүктүүр этибит. Ол иһин оннук буолбатын туһуттан, быйыл икки сиринэн тэрийдибит. Чакырга бүгүн 24 киһи күрэхтэһэ сылдьар, кинилэртэн 8 инники кыайыылаахтара сарсын манна кэлэннэр күрэхтэһиэхтээхтэр. Онтон мантан эмиэ 8 кыайыылаахтар хааланнар, бастакы миэстэ иһин киирсиэхтэрэ. Ол кэнниттэн кэлэр нэдиэлэҕэ 20-с чыыһылаҕа ытыктабыллаах бэтэрээннэрбитигэр күрэхтэһии тэриллиэҕэ. Бу ый 26-28-гар, чурапчылар киэн туттар ыспырсымыаммыт Степан Алексеев аатынан өрөспүүбүлүкэ күрэхтэһиитэ ыытыллаары турар, кыайыылаахтар ол онно кытта барар чиэскэ тиксиэхтэрэ”, — диэн бильярд бэдэрээссийэтин бэрэссэдэтэлэ, улуус мунньаҕын дьокутаата Иннокентий Архипов кэпсиир.

Инньэ гынан улуустааҕы эр дьон чөмпүйэнээтигэр 1-кы миэстэни Сылаҥ нэһилиэгиттэн Петр Алексеев ылан, улуус баһылыга Андрей Ноговицын туруорбут бирииһинэн наҕарааланна, 2-с миэстэҕэ Хатылы нэһилиэгиттэн Эдуард Неустроев тахсан, Арыылаах нэһилиэгин баһылыга Николай Сыромятников бирииһин ылла, 3-с бочуоттаах миэстэлэри Чурапчыттан Айхал Томскай, Чакыр нэһилиэгиттэн Николай Адамов ыланнар, Хатылы нэһилиэгин баһылыга Ульяна Атласова уонна Алаҕар нэһилиэгин баһылыга Ньургун Попов анаабыт бириистэринэн бэлиэтэннилэр.

Онон бу ый 26-28 күннэригэр Дьокуускай куоракка ыытыллар чөмпүйэнээккэ биһиги улууспутун Петр Алексеев уонна Эдуард Неустроев көмүскүү барыахтара.

Сэмэн ЖЕНДРИНСКЭЙ.

 

Добавить комментарий

Ваш адрес email не будет опубликован. Обязательные поля помечены *