“Үлэбит, дьарыкпыт былаан быһыытынан баран иһэр”

“Триумф” Спорка бэлэмнэнии киинигэр республика көҥүл тустууга сүүмэрдэммит хамаандатын спортсменнарыгар уонна тренердэригэр “Таҥас” фирма саҥа спортивнай форматын үөрүүлээхтик туттарыыта буолла. Киһи кэрэхсиирэ диэн, маннык бэлиэ түгэн үтүө үгэскэ кубулуйда.

Тэрээһин кэмигэр Саха Республикатын көҥүл тустууга сүүмэрдэммит хамаандатын кылаабынай тренерэ Александр Оконешниковы көрсөн, Саҥа дьылга диэри туох-хайдах былааннаах үлэлииллэрин, ханнык күрэхтэһиилэргэ кыттар былааннаахтарын ыйыталастым.

Билигин, бары билэргит курдук ковид дьаҥа аан дойду үрдүнэн киэҥник тарҕанан, күрэхтэһиилэрбит барыта салгыҥҥа ыйанан тураллар, — диир Александр Савельевич. – Былаан быһыытынан сэтинньи ыйга Владикавказка Сослан Андиев турнира уонна Хасавюрка Межконтинентальнай кубок баар. Ол күрэхтэһиилэр ыытыллар буоллахтарына, онно кыттар санаалаахпыт.

Билигин бу былааммыт быһыытынан, бэйэбитигэр үөрэтэр-эрчийэр түмсүү (УТС) ыытылла турар. Эрчиллиигэ барыта отучча бөҕөс кыттар. Бары манна үрдүттэн олорон дьарыктаналлар.

Сборбут сэтинньи 3 күнүгэр диэри буолуоҕа. Онтон ити үөһэ эппит, Хотугу Осетияҕа уонна Дагестаҥҥа күрэхтэһиилэрбит ыытыллар буоллахтарына, онно барыахпыт. Салгыы ахсынньы ыйга Кавказка, хайалаах сиргэ эрчиллии былааҥҥа баар. Эдэрдэрбит ахсынньыга Красноярскайдааҕы Тустуу академиятын турнирыгар кыттыахтара. Итиэннэ сыл саҥатыгар тохсунньуга үгэс быһыытынан Иван Ярыгин аатынан норуоттар икки ардыларынааҕы Гран-при турнир буолар. Чугастааҕыга биһиги сүрүн сыалбыт-сорукпут онно ситиһиилээхтик кыттыы буолуоҕа.

Харыстаныы өртүгэр эттэххэ, уолаттар бары вакциналаахтар. Бу сайын Манчаарыга эҥин кыттаары быһыыны ылбыттара. Ону тэҥэ, төһө да вакциналаахпыт үрдүнэн, бу эрчиллэр түмсүү иннинэ бары Пцр аналиһын туттарбыппыт. Эпидемиологическай балаһыанньа уустук. Ирдэбили барытын тутуһабыт. Хас биирдии спортсмен ону эмиэ өйдүүр. Ити өртүгэр кыһалҕа суох.

Түгэнинэн туһанан, Александр Яковлевичка уонна кини салайар «Таҥас» тэрилтэ үлэһиттэригэр барыларыгар барҕа махтал! Кини бэйэтин ис санаатыттан Саха сирин спортсменнарыгар, тустууктарга көмөлөһөр. Онон үлэтэ-хамнаһа таһаарыылаах буоларыгар баҕарабыт. Бу Саха сиригэр эрэ буолбакка, Россия, аан дойду таһымыгар тахсарыгар! «Таҥас» фирма көстүүмэ көрөргө үчүгэй. Элбэх тустуук кэтэ сылдьар, атыттар ымсыыраллар. Бу көстүүм ситиһиилээх буоларыгар баҕарыаҕыҥ!

Петр ПАВЛОВ.

Ааптар хаартыскаҕа түһэриитэ.      

Добавить комментарий

Ваш адрес email не будет опубликован. Обязательные поля помечены *