Үөһээ Бүлүүгэ Александр Кузнецов бирииһигэр мас тардыһыыта буола турар


Бүгүн Үөһээ Бүлүүгэ Саха Өрөспүүбүлүкэтин норуоттарын lll спортивнай оонньууларын муҥутуур кыайыылааҕа Александр Кузнецов сырдык кэриэһигэр мас тардыһыыга өрөспүүбүлүкэтээҕи күрэхтэһии саҕаланна.

Үөһээ Бүлүү сэлиэнньэтин «Үс Хоһуун» спортивнай комплексыгар ураты тыын баһылыыр. Ыраахтан-чугастан кэлбит дьон бары ураты түгэни күүтэллэр. Санатар буоллахха, бу күрэхтэһии 2009 сылтан саҕаланан быйыл сэттис төгүлүн ыытылла турар. Александр Кузнецов сырдык кэриэһигэр анал турнир аһыллыбытынан күрэхтэһиигэ кытта кэлбит мадьынылары, ыалдьыттары, улуус ытык-мааны дьонун-сэргэтин Үөһээ Бүлүү улууһун баһылыгын 1-кы солбуйааччы Семен Михалев, Александр Кузнецов төрөөбүт нэһилиэгин аатыттан Ороһу нэһилиэгин баһылыга Анатолий Антонов, Дьокуускайтан анаан-минээн кылаабынай судьуйанан үлэлии кэлбит Дыгын оонньууларын хас да төгүллээх чөмпүйүөнэ Николай Дьяконов, Үөһээ Бүлүүтээҕи спорт управлениетын салайааччы Василий Петров, Александр Кузнецов эдьиийэ Люция Егорова эҕэрдэлээтилэр.

Салгыы күрэхтэһии үөрүүлээх аһыллыытын кэмигэр сэтинньи 24-25 күннэригэр Дьокуускай куоракка ыытыллыбыт мас тардыһыыга аан дойду таһымнаах күрэхтэһиигэ 55 киилэ ыйааһыҥҥа чөмпүйүөн аатын сүкпүт Үөһээ Бүлүү Өргүөтүттэн төрүттээх Наталья Черноградскаяны уонна Тамалакаантан төрүттээх Европа күрэхтэһиитин чөмпүйүөнэ, 2017 сыллааҕы Манчаары оонньуутугар мас тардыһыытын муҥутуур кыайыылааҕа Эрчим Баппаҕайы чиэстээһин буолла. Иккиэн саалаҕа хааман киирбиттэригэр бар-дьон атахтарыгар туран эрэ ытыстарын таһыннылар.

Үөһээ Бүлүү улууһун баһылыгын 1-кы солбуйааччы Семен Михалев эҕэрдэлээн туран, Наталья Черноградскаяҕа уонна Эрчим Баппаҕайга улуус баһылыга Владимир Поскачин аатыттан 100-түү тыһ. солк анал сэртипикээттэри үөрүүлээх быһыыга-майгыга туттартаата.

«Барыгытыгар ис сүрэхтэн махтал! Инники өттүгэр Саха сирин чиэһин көмүскүүргэ өрүү бэлэммит», — диэн чулуу спортсменнар харда тылы эппиттэригэр, бар-дьон ытыстарын таһынан «Ураа, Ураа, Ураа!» диэн уруйдаатылар-айхаллаатылар.

Күрэхтэһиигэ 12 улуустан (Мииринэй, Сунтаар, Ньурба, Үөһээ Бүлүү, Бүлүү, Горнай, Дьокуускай, Нам, Амма, Уус Алдан, Хаҥалас, Мэҥэ Хаҥалас, Чурапчы уонна ХИФУ) 70-тан тахса мадьыны, ол иһигэр 12 спорт маастара кытта сылдьаллар.

Кылгас ыспыраапка:

Александр Кузнецов мас тардыһыыга СӨ үс төгүллээх уонна Г.Десяткин, П.Каратаев, Мас Мэхээлэ бириистэрин үстүү төгүллээх чөмпүйүөннэрэ этэ. Оскуолаҕа ситиһиилээхтик үөрэммит буолан, хайы-үйэ 25 сааһыгар икки үрдүк үөрэҕи — СГУ физкультураҕа уонна юридическэй факультеттарын ситиһиилээхтик үөрэнэн бүтэрбитэ. Кини юстиция министиэристибэтигэр исписэлииһинэн үлэтин чаҕылхайдык саҕалаабыта. Бэрт сотору краповай берет хаһаайына буолбута. Кинини СӨ үтүөлээх тириэньэрэ Ф.М.Дегтярев дьарыктаабыта. Иккиэн өйдөһөн, айылҕаттан айдарыылаах күүстээх уолу Федор Матвеевич сөпкө эрчийбитин түмүгэр, бэрт аҕыйах кэм иһинэн СӨ күүстээх мадьыныта баар буолбута. Дьылҕа Хаан ыйааҕа кытаанах, саха норуотун биир биллэр спортсмена 13 сыл анараа өттүгэр быстах өлүүгэ былдьаммыта. Ол гынан баран, кини аата үйэлэргэ умнуллуо суоҕа. Александр Кузнецов спортсмен быһыытынан ураты, сырдык аата чаҕылхай сулус курдук үйэлэргэ сандаарыа.

«Үөһээ Бүлүү» хаһыат.

Добавить комментарий

Ваш адрес email не будет опубликован. Обязательные поля помечены *