Үөрэтэр-эрчийэр түмсүүгэ

Алтынньы 20-28 күннэригэр Венгрия киин куоратыгар Будапапештка, спортивнай тустууга аан дойду чемпионата ыытыллыаҕа. Бырагыраама быһыытынан, бастаан эр дьон көҥүл тустууга күрэхтэһиитэ алтынньы 20-23 күннэригэр буолуоҕа. Онтон салгыы дьахталлар көҥүл тустуулара ыытыллыаҕа. Чемпионат гректии-римнии тустуунан түмүктэниэҕэ.

Билигин ханан даҕаны бэлэмнэнии үгэннээн бара турар. Россия көҥүл тустууга сүүмэрдэммит хамаандатын аан дойду чемпионатыгар бэлэмнэнэр бастакы эрчийэр-үөрэтэр түмсүүтэ (УТС) Кабардино-Балкарияҕа буолбута. Оттон балаҕан ыйын ортотуттан иккис үөрэтэр-эрчийэр түмсүү Сочига саҕаламмыта уонна 23-кэ түмүктэниэхтээх. Ол кэнниттэн балаҕан ыйын 30 – алтынньы 14 күннэригэр бэлэмнэнии үһүс түһүмэҕэ эмиэ Сочига ыытыллара былааннанар.

Үөрэтэр-эрчийэр түмсүүгэ Россия күүстээх бөҕөстөрө бары кыттыыны ылаллар. Хаартыскаҕа көстөрүн курдук, аан дойду чемпионатыгар кыттар Россия көҥүл тустууга хамаандатын састааба сүрүннээн биллэр. Ол, атырдьах ыйын саҥатыгар Одинцоваҕа (Москва уобалаһа) буолбут Россия чемпионатын кыайыылаахтара: 57 кг – Заур Угуев, 70 кг – Магомедрасул Газимагомедов (иккиэн – Дагестан), 74 кг – Заурбек Сидаков (Хотугу Осетия), 79 кг – Ахмед Гаджимагомедов, 86 кг – Даурен Куруглиев (иккиэн – Дагестан), 92 кг – Батырбек Цакулов (Хотугу Осетия), 97 кг – Абдулрашид Садулаев (Дагестан), 125 кг – Анзор Хизриев (Санкт-Петербург) уонна Польшатааҕы турнир түмүгүнэн 61 кг – Гаджимурад Рашидов, 65 кг – Ахмед Чакаев (иккиэн – Дагестан).

Хамаанда кылаабынай тренерэ Дзамболат Тедеев бүтэһиктээх састаабы алтынньы саҥатыгар биллэриэх буолбута гынан баран, сэрэйдэххэ, ити бөҕөстөр кытталлара буолуо дии саныыбын.

Соторутааҕыта бэлэмнэниигэ кыттыбыт хамаанда бары чилиэннэригэр уонна тренердэригэр «Боско» компания саҥа спортивнай көстүүмнэрин биэрдилэр.

Дьэ, саҥа таҥас Венгрия көбүөрүгэр Россия бөҕөстөрүгэр тугу түстүүр?

Петр ПАВЛОВ.

Добавить комментарий

Ваш адрес email не будет опубликован.