Үрдүк аат – үрдүк кирбиилэргэ сирдээтин!

Саха сирин салалтатын дьаһалынан – Республика сүүмэрдэммит хамаандаларын спорка бэлэмнэниилэрин киинин көҥүл тустууга тренерэ Гаврил Сергеевич Игнатьевка “Саха Республикатын үтүөлээх тренерэ” аат иҥэрилиннэ.

Амма тустууга кыһатын иитиллээччитэ, норуоттар икки ардыларынааҕы таһымҥа тиийэ туста сылдьыбыт Гаврил Игнатьев тренер быһыытынан үлэтин Мэҥэ Хаҥалас улууһун Хорообут нэһилиэгиттэн саҕалаабыта. Эдэр специалист оскуола оҕолорун түмэн, тустуу бастакы олугун уурбута, кинилэргэ тустууга тапталы иҥэрбитэ. “Түбүктээх үлэ түмүктээх” дииллэринии, бастакы саҕалаабыт бөлөҕүттэн Ньургун Скрябин, Ваня Сосин бэйэлэрин саастыылаахтарыгар үчүгэй көрдөрүүлэри ситиспиттэрэ. Саха сирин, Дальнай Восток федеральнай уокуругун, Россия күрэхтэһиитин кыайыылаахтарынан уонна призердарынан буолбуттара. Сотору, тыыппалаах тренери республика киин куоратыгар үлэҕэ ыҥырбыттара. Манна эмиэ Гаврил Сергеевич бэйэтэ бөлөх тэринэн, улахан саҥата-иҥэтэ суох дьаныардаахтык үлэлээн киирэн барбыта.

Кини бэйэтин иитиллээччилэригэр ис дууһатыттан кыһаллан, этэргэ дылы, туох баар өйүн-санаатын ууран  туран, бириэмэтин харыстаабакка үлэлиир. Кинилэр кыайыыларыттан тэҥҥэ үөрэр, хотторууларыттан тэҥҥэ хомойор. Итиэннэ, күрэхтэһиилэргэ сылдьан көрдөххө, мөккүөрдээх түгэннэргэ, эбэтэр судьуйалар өттүлэриттэн сыыһа сыаналааһын таҕыстаҕына – уолаттарын көмүскээн, элбэхтик бэйэтин кырдьыгын туруорсан, сиэрдээх түмүгү ситиһээччи. Үөрэнээччилэригэр наһаа ирдэбиллээх тренер быһыытынан сыаналанар.

Гаврил бэйэтэ даҕаны, тустарын саҕана кимтэн да толлубат, харса суох санаалаах бөҕөс этэ. Биирдэ, Монголияҕа туста тиийэ сылдьан олохтоохтор эрэллэрэ Лубсан Сэргэлэнбаатары кыайбыт курдук саныыбын. Оттон Сэргэлэнбаатары биһиги күүстээх бөҕөс быһыытынан билэбит – Азия чемпиона, Ярыгин турнирын кыайыылааҕа, Дьокуускайга буолбут “Көмүс кур” турнирга бастаабыта. Ити күрэхтэһиилэргэ кини – кореец Ли Хак Сону, Вугар Оруджевы, биһиги Василий Гоголевпытын кыайталаабыта.

Ситиһии син биир хаһан эмэ кэлиэхтээҕэ. Быйыл, Г.С. Игнатьев эрчийбит тустууктара сылы үчүгэйдик саҕалаабыттара. Ол курдук, Ньургун Александров сыл саҥатыгар Ираҥҥа, номох буолбут Голамреза Тахти аатынан норуоттар икки ардыларынааҕы турнирга ситиһиилээхтик кыттан, 61 кг ыйааһыҥҥа кыайыылаах аатын ылбыта. Оттон тренерэ Гаврил Сергеевичка, кыайыылааҕы бэлэмнээбитин иһин, күрэхтэһиини тэрийээччилэр анал кубок туттарбыттара. Ити, Иран курдук, тустууга бэриниилээх, тустууну таҥара оҥостубут дойду үрдүк сыаналааһына мээнэҕэ буолбатах. Ираннааҕы ситиһиитин кэнниттэн Ньургун аны Дальнай Восток федеральнай уокуругун чемпионатыгар кыайыылааҕынан тахсан, Россия чемпионатыгар кыттар быраабы ылбыта.

Оттон, Гаврил Сергеевичка олох оҕо эрдэҕиттэн дьарыктаммыт Ньургун Скрябин Рим (Италия) куоракка ыытыллыбыт Европа чемпионатыгар 65 киилэҕэ иккис миэстэҕэ тахсан, үрүҥ көмүс мэтээлинэн наҕараадаламмыта. Бу, быйылгы сылга киирэн баран, саха тустууга кыһатын биир ситиһиитэ. Беларусь аатыттан кыттар Ньургун Скрябин –  биһиги Токиотааҕы Олимпиадаҕа биир саамай эрэлбит.

Онон тренер Гаврил Сергеевич, быйыл уолаттарын ситиһиилэриттэн санаата көтөҕүллэ сылдьар. Онно мэҥэһиннэрэн, киниэхэ “Саха сирин үтүөлээх тренерэ” аата иҥэриллибитэ саамай сөптөөх. Эдэр киһи ити наҕараадаттан өссө тэптэн айымньылаахтык, күүстээхтик үлэлииригэр, үрдүк кирбиилэри ситиһэригэр баҕарыаҕыҥ!

Манна даҕатан эттэххэ, тренер Г.С. Игнатьев иитиллээччитэ – Ньургун Скрябин билигин сынньалаҥар дойдутугар кэлэ сылдьар. Кини Европаҕа ситиһиилээхтик кыттыытын республика спорка салалтата, тустуу федерацията уонна төрөөбүт улууһа, бу коронавирус намыраатаҕына – чиэстииллэрэ, сыаналыыллара эбитэ буоллар, дии саныыбын. Европа чемпионатын үрүҥ көмүс мэтээлэ элбэх үлэттэн, улахан сыраттан кэлэрин умнумуоҕуҥ!

Петр ПАВЛОВ.            

Добавить комментарий

Ваш адрес email не будет опубликован. Обязательные поля помечены *