Үлэлээбит кэммин үтүөтүк саныыбын

// “Дьулурҕан” 20 сыла

Бэйэбин өйдүөхпүттэн «Саха сирэ» хаһыат биһиги дьиэбитигэр баар. Онно миэхэ саамай күүтүүлээх «Дьулурҕан» уонна «Эдэр саас» сыһыарыылар буолаллара. Дьонум ааҕа олорор буоллахтарына, ол сыһыарыылары быһа тутан хоспор ильдэ барарым.

Кыра эрдэхпиттэн спордунан дьарыктанар, сөбүлүүр буоламмын, “Дьулурҕан” хаһыат хас биирдии ыстатыйатын көтүпэккэ ааҕарым. Петр Павловы дьонум «бэртээхэй суруналыыс» диэн куруук хайҕыылларын истэн, илэ бэйэтин көрүөхпүн баҕарарым. Ол баҕа санаам таһыччы туолан, «Эдэр сааска» үлэлии сылдьан, 2012 сыллаахха «Азия оҕолоро» оонньуулар дневниктарыгар “Дьулурҕаҥҥа” сайыҥҥы практикабын аастым. Онтон ыла, спортивнай сыһыарыыны кытта ыкса доҕордоһон, үөрэхпин бүтэрэн баран, Петр Семеновичка үлэлии киирбитим. Биир эрэ сыл “Дьулурҕаҥҥа” суруйбут да буолларбын, ити кэмнэри сылаастык саныыбын.

Бастатан туран, Петр Семенович хас биирдии дьыалаҕа (хаһыат эрэ буолбатах) ымпыгар-чымпыгар диэри эппиэтинэстээхтик, ирдэбиллээхтик сыһыаннаһарын көрөн, бэйэбэр эмиэ оннук хаачыстыбаны сайыннарбытым.

Оччолорго “Саха сирэ” хаһыат нэдиэлэҕэ биэстэ тахсар буолан, спортивнай тэрээһиннэр сонуннара сойбокко тахсаллара. Сороҕор спортивнай аренаттан да суруйарга, оперативностка үөрэммитим. Биир хоско олорон үлэлиир этибит. Онно Петр Семенович доҕотторо, ааҕааччылара, тустуу, спорт фанаттара быыстала суох кэлэннэр, дискуссиялыыллар, кэпсэтэллэр этэ. Бастаан мэһэйдэтэр курдук этим, кэнники үөрэнэн, хата хоско ким да суох буоллаҕына, төттөрүтүн дьикти курдук буолара.

Петр Семенович курдук дьыалатыгар, хаһыатыгар бэриниилээх киһи аҕыйах буолуо. Онон, “Дьулурҕан” хаһыат саҥа кэми кытта хардыылаан, электроннай форматыгар ааҕааччыларын сүтэрбэккэ, куруук спортивнай олох кэпсээннэрин бар дьоҥҥо сэһэргии турдун.

Виктория БЯСТИНОВА, “Саха сирэ” хаһыат корреспондена.

Добавить комментарий

Ваш адрес email не будет опубликован. Обязательные поля помечены *