Ярыгин турнира: Финаллары эрэнэ кэтэһэбит

Красноярскай куоракка, икки төгүллээх олимпийскай чемпион Иван Ярыгин аатынан көҥүл тустууга норуоттарын икки ардыларынааҕы Гран-при турнир иккис күнэ, иннинээҕи күн күрэхтэспит ыйааһыннарга кимнээх үһүс миэстэ иһин тусталларын быһаарар хапсыһыыларынан саҕаланна.

Бастаан, финалистарга хотторбуттар «уоскутар» диэн ааттыыр бөлөхтөрүгэр ким үһүс миэстэ иһин тустарын быһаарсар киирсиилэр буоллулар. Онуоха финалист Арыйаан Тютриҥҥа 6:6 ахсааҥҥа, хаачыстыбанан эрэ сабырыйтарбыт Федор Постников (57 кг) бурят Тамир Гармаевы кытта тустуутугар, партерга үөһэттэн баттыы сылдьан «накат» диэн албаһы оҥороору утары албаска түбэьэн, ыраастык баран хаалла.

Онтон ол кэмҥэ сэргэстэһэ көбүөргэ, хас да сыллааҕыта Россия призера буола сылдьыбыт Дмитрий Аксенов (61 кг) тувинец Тюлюһу 6:2 ахсаанынан хотон иһэн, түмүккэ очукуотун тэҥнэтэн (6:6), хомолтолоохтук хотторон кэбистэ.

Салгыы күрэхтэһиигэ Нодар Арабидзе (Брянскай) эчэйии ылан, бырааһынан уһуллубут буолан, Петр Павловы утары туста тахсыбакка, кыайыыны быһа биэрдэ. Чочумча буолаат, Павлов көбүөргэ иккистээн таҕыста. Утарсааччыта – Россия былырыыҥҥы призера Жаргал Дамдинов. Бу тустууга биһиги бөҕөспүт очукуонан хотторон иһэн (6:0) киһитин утары албастаан, кутталлаах балаһыанньаҕа киллэрэ сырытта, мостикка тутта. Онно судьуйалар 2 эрэ баалы аахтылар. Биһиги тренердэрбит онно сөпсөспөккө кубик быраҕан көрдүлэр да, судьуйалар бэйэлэрин быһаарыыларын уларыппатылар. Хата, кубик быраҕан баран, олоҕо суох туруорсуу оҥорбуттарын иһин, бурятка эбии биир баалы аахтылар, 7:2. Бүттэхпит ол.

Онтон дьэ, бу күн күрэхтэһиини саҥа саҕалыыр ыйааһыннарга хапсыһыылар буоллулар. Маастар Айсен Потапов (65 кг) бастаан бурят Великто Хайдаповы очукуонан ыраастык (10:0) хотто. Салгыы, красноярскайдар эрэллэрэ Начын Кууларга түбэһэн, 1:4 ахсаанынан хоттордорон кэбистэ.

Манна даҕатан эттэххэ, Потаповы уонна Капрыновы хоппут тустууктар салгыы хотторон кэбиһэннэр, биһиги бөҕөстөрбүт күрэхтэһииттэн туоруурга күһэлиннилэр.

Бу ыйааһыҥҥа иккис бөҕөспүт Константин Капрынов Казахстантан кыттар Оганесян диэн армян бөҕөһүн 7:2 ахсаанынан лаппа кыайан иһэн, биир түгэҥҥэ сыыһа туттаран, ыраастык баран хаалла. Маны көрө олорон, итиччэ эрэллээхтик хотон иһэн тоҕо эмиэ үлүһүйэн, балаһыанньаны сытыырхата сатаата, хапсыһыыны аа-дьуо кыайыыга тиэрдиэ этэ буоллаҕа дии, диэн киһи абатыйар…

Ордук, Аксенов уонна Капрынов кыайбыт тэҥэ хапсыһыыларыгар, бэйэлэрэ сыыһа-халты туттан кэбиспиттэрэ хомолтолоох.

«Уоскутар» бөлөх тустууларын кэнниттэн кимнээх турнир боруонса мэтээлин иһин киирсэллэрэ билиннэ.

Холобур, 57 кг үһүс миэстэ иһин тустуохтара: Ананда Дашиев уонна Тамир Гармаев (иккиэн буряттар) итиэннэ Рамиз Гамзатов (Дагестан) – Хуреш Дондук Оол (Тыва).

Финал 57 кг: Арыйаан Тютрин (Беларусь) – Муса Мехтиханов (Дагестан).

61 киилэҕэ үһүс иһин Ньургун Александров (Саха сирэ) – Эзир Тюлюш (Тыва) уонна Кежик Монгуш (Тыва) – Жаргал Дамдинов (Бурятия) тустуохтара.

Финал 61 кг: Абасгаджи Магомедов (Дагестан) – Рустам Караханов (Москва).

70 кг ыйааһыҥҥа боруонса мэтээл иһин Имам Ганишев (Дагестан) – Резуан Кажаров (КБР) уонна Давид Баев (Хотугу Осетия) – Абдулла Ахмедов (С-Петербург) тустуохтара.

Финал 70 кг: Виктор Рассадин (Саха сирэ) – Курбан Шираев (Дагестан).

Финаллар биһиги бириэмэбитинэн киэһэ 20:15 саҕаланыахтара. Ону телевизорга «МатчБоец» каналга көрүөххүтүн сөп.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *