Ярыгин турнира: Сэрэбиэй тугу түстээтэ?

Бүгүҥҥүттэн Красноярскайга икки төгүллээх олимпийскай чемпион Иван Ярыгин аатынан көҥүл тустууга норуоттар икки ардыларынааҕы Гран-при турнир саҕаланар. Быйылгы турнирга аан дойдуга ковид дьаҥынан сибээстээн уонна чугастааҕы кэмҥэ тустуу атын күрэхтэһиилэрэ ыытыллалларынан сибээстээн – Казахстан, Беларусь, Монголия, Молдова, Узбекистан биирдиилээн бөҕөстөрө кытталлар.

Бырагыраама быһыытынан күрэхтэһиини – 57, 61, 70 кг ыйааһыннар саҕалыыллар.

Бэҕэһээ киэһэ бары ыйааһыннарга сэрэбиэй оҥоһулунна. Ону биһиги, бэйэбит сайтпытыгар бүгүн ыытыллар ыйааһыннары кылгастык билиһиннэриэхпитин баҕарабыт.

57 кг сэрэбиэйи 21 бөҕөс ааспыт, итинтэн алтата – саха. Кинилэртэн Артур Чебодаев, Хуреш Дондук Оол, Рамиз Гамзатов, Арыйаан Тютрин саамай опыттаахтар. Бу ыйааһыҥҥа атын дойдулартан – Казахстантан, Монголияттан, Беларусьтан биирдии бөҕөс баар.

Эрдэттэн биллэриллибитин курдук, соторутааҕыта Иркутскайга ыытыллыбыт эдэрдэргэ Россия күрэхтэһиитин иккис-үһүс призердара Саид Хункеров уонна Дархан Игнатьев бастакы эргииргэ көрсүөхтээхтэр. Хайалара кыайбыта – Европа түһүлгэтигэр Россия чиэһин көмүскүөхтээх.

Уолаттарбыт тустуулара:

Дархан Игнатьев – Саид Хункеров (Дагестан)

Айаал Белолюбскай —  Чалай Кужугет (Тыва)

Дьулустан Федотов – Рамиз Гамзатов (Дагестан)

Петр Копылов – Артур Чебодаев (Красноярскай)

Федор Постников – Мейрамбек Картбай (Казахстан)

Арыйаан Тютрин – Тамир Гармаев (Бурятия).

61 кг – 22 кыттааччы баар. Ол иһигэр биһиэннэриттэн Рафаэль Алексеевы киллэрэн туран – алтыалар. Бу ыйааһын бастыҥынан Россия чемпиона, аан дойду Кубогын биирдиилээн бастыыр иһин күрэхтэһиитин кыайыылааҕа дагестанец Абасгаджи Магомедовы ааттыахха сөп. Уоннааҕылар бары тэҥ сыһа таһымнаахтар. Манна эмиэ, атын хамаандалартан Беларусь, Монголия, Казахстан биирдии эрэ кыттааччылаахтар.

Уолаттарбыт тустуулара:

Дмитрий Аксенов – Йербол Дильмагамбетов (Казахстан)

Ньургун Александров – Айхан Антонов (иккиэн Саха сирэ)

Андрей Бекренев – Омак Сюрюн (Тыва)

Петр Павлов – Абасгаджи Магомедов (Дагестан)

Рафаэль Алексеев – Булат Баясхалонов (Бурятия).

70 кг барыта 23 бөҕөс сэрэбиэйи ааста. Манна биһиэннэриттэн Россия чемпионатыгар бэһис буолбут Виктор Рассадин баар. Састаап күүстээх соҕус диэххэ сөп. Аан дойду чемпиона Давид Баев, Европа чемпиона Курбан Шираев, Сибиир чемпиона Руслан Жендаев бааллар. Бу ыйааһыҥҥа биир да омук тустууга суох, барыта россияннар.

Виктор Рассадин – Кирилл Корнеев (Кемерово).

Аны бөҕөстөр сотору медицинскэй көрүүнү уонна ыйааһыннаныыны барыахтара. Онно туох да уларыйыы тахсыбатаҕына, сэрэбиэй (ким кими кытта тустара) үөһэ суруллубутун курдук буолуоҕа.

Сэрэбиэй туһунан түмүктээн эттэххэ, ханнык да түгэҥҥэ киирсиэхтээхпит. Тус санаабар, ылан көрдөххө, бүгүҥҥү ыйааһыннартан Тютрин, Аксенов, Александров, Рассадин балаһыанньалара үчүгэй курдук. Онон бөҕөстөрбүтүгэр эрэнэбит, мэтээлгэ суоттанабыт! Күрэхтэһии хаамыытын күннэтэ биһиги сайпытыгар ааҕаарыҥ.

Хапсыһыылар биһиги бириэмэбитинэн бүгүн күнүс 14 чаас 30 мүн. саҕаланаллар, ону Красноярскай кыраай спорка министиэристибэтин сайтыгар уонна телевизорга “МатчБоец” каналга көрүөххэ сөп.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *