Ярыгин турнира: Саха сирин хамаандата биэс мэтээллэннэ

Бүгүн Красноярскай куоракка түмүктэммит Иван Ярыгин кэриэһигэр көҥүл тустууга норуоттар икки ардыларынааҕы XXXII Гран-при турниры бэйэбит сайтпытыгар http://dzulurgan.ru сырдатыыны салгыыбыт.

Санатан эттэххэ, быйылгы түһүлгэҕэ дьахталларга уонна эр дьоҥҥо барыта 248 спортсмен 10 дойдуттан – Узбекистантан, Кыргызстантан, Монголияттан, Турцияттан, Беларусьтан, Молдоваттан, Казахстантан, Египеттэн, Грецияттан уонна Россияттан кытынна.

Дагестан хамаандата (кылаабынай тренер Гаджи Рашидов) алта кыһыл көмүс мэтээли ылан, таһыччы көрдөрүүнү ситистэ. Хотугу Осетия-Алания тустууктара (сүрүн тренер Хетаг Гозюмов) икки бастакы миэстэлээхтэр. Оттон Саха сирэ (кылаабынай тренер Александр Оконешников) уонна Чечня (кылаабынай тренер Жаа Умаров) биирдии кыһыл көмүс мэтээллээхтэр.

Биһиги бөҕөстөрбүт барыта биэс мэтээли ылары ситистилэр. Арыйаан Тютрин (57 кг) бастаата, Виктор Рассадин (70 кг), Севиль Назарова (55 кг) иккистээтилэр, Алина Казымова (62 кг), Ньургун Сергин (92 кг) үһүстээтилэр. Итинэн Саха сирин тустуута билигин даҕаны күүстээҕин итэҕэттилэр.

Турнир түмүгүнэн анал бириистэр (харчынан сертификаттар) оонньоммуттарыгар, Красноярскай куорат баһылыгын бирииһин – Никита Сучков, Красноярскай кыраай Губернаторын бирииһин – Алёна Стародубцева, «Бастыҥ техникатын иһин» — Игорь Овсянников, «Кыайыыга дьулуурун иһин» — Екатерина Исакова ыллылар. Көрөргүт курдук, бириистэр барыта олохтоох спортсменнарга анаммыттар. Санатан эттэххэ, Стародубцева, Сучков, Овсянников бэйэлэрин ыйааһыннарыгар иккис, оттон Исакова үһүс буоллулар. Тус санаабар, турнир бастыҥ тустуугунан таһыччы маастарыстыбаны көрдөрбүт, 61 киилэҕэ тэҥнээҕин булбатах Абасгаджи Магомедов буолуон сөп этэ. Эһиги ону туох дии саныыгыт?

Хаһан баҕарар буоларыныы, красноярскайдар күрэхтэһиини үрдүк таһымнаахтык тэрийэн ыыттылар. Көбүөргэ хапсыһыылары тэҥэ тустуу сайдыытыгар туһааннаах араас тэрээһиннэр ыытылыннылар. Соторутааҕыта олохтон туораабыт улуу тренер уонна тэрийээччи Дмитрий Георгиевич Миндиашвилины кэриэстээһин, Иван Ярыгин туһунан аһаҕас уруоктар, Красноярскай тустууга ситиһиитин туһунан музей быыстапката, тустуу салайааччыларын дьыалабыай көрсүһүүлэрэ… Манна даҕатан эттэххэ, Красноярскай куорат Иван Ярыгин аатынан Спорт дыбарыаһа – 2023 сыллааҕы аан дойду чемпионатын тэрийэн ыытарга Тустуу аан дойдутааҕы түмсүүтүгэр (UWW) сайаапка түһэрбит.

Турнир сорох түмүктэрин тутатына тиэртэххэ чэ итинник. Аны сотору кэминэн тустууктарбыт кыттыыларын ырытыы оҥоһуллуо итиэннэ спорт тустаах салайааччылара уонна тренердэр бэйэлэрин санааларын дьоҥҥо-сэргэҕэ биллэрэллэрэ буоллар.

Турнир түмүк көрдөрүүтэ:

57 кг: 1. Арыйаан Тютрин (Беларусь), 2. Муса Мехтиханов (Дагестан), 3. Тамир Гармаев (Бурятия), 3. Рамиз Гамзатов (Дагестан).

61 кг: 1. Абасгаджи Магомедов (Дагестан), 2. Рустам Караханов (Москва), 3. Эзир Тюлюш (Тыва), 3. Жаргал Дамдинов (Бурятия), 5. Ньургун Александров (Саха сирэ).

65 кг: 1. Алик Хадарцев (Хотугу Осетия), 2. Даша Шарастепанов (Бурятия), 3. Чаян Монгуш (Тыва), 3. Рамазан Ферзалиев (Дагестан).

70 кг: 1. Курбан Шираев (Дагестан), 2. Виктор Рассадин (Саха сирэ), 3. Резуан Кажаров (КБР), 3. Давид Баев (Хотугу Осетия).

74 кг: 1. Азнаур Таваев (Дагестан), 2. Никита Сучков, 3. Аюб Абрегов (иккиэн — Красноярскайдар), 3. Руслан Богатырев (Санкт-Петербург).

79 кг: 1. Ахмед Усманов, 2. Аманулла Гаджимагомедов (иккиэн — Дагестан), 3. Арсалан Будажапов (Кыргызстан), 3. Юсуп-Хаджи Айдаев (Чечня).

86 кг: 1. Магомедшариф Биякаев (Дагестан), 2. Зелимхан Минкаилов (Чечня), 3. Тажитин Акаев (Москва), 3. Владислав Валиев (Хотугу Осетия).

92 кг: 1. Гурам Черткоев, 2. Тамерлан Тапсиев (иккиэн – Хотугу Осетия), 3. Ньургун Сергин (Саха сирэ), 3. Загид Каримов (Дагестан).

97 кг: 1. Магомедхан Магомедов (Дагестан), 2. Игорь Овсянников (Красноярскай), 3. Давид Дзугаев (Хотугу Осетия), 3. Шамиль Гаджиалиев (Дагестан).

125 кг: 1. Зелимхан Хизриев, 2. Хамзат Хизриев (иккиэн — Санкт-Петербург), 3. Остап Пасенок (Кемерово), 3. Виталий Голоев (Хотугу Осетия).

Петр ПАВЛОВ.

PS: турнир хаамыытын туһунан суруйуулары «Дьулур5ан» хаһыат интернеккэ сайтыгар http://dzulurgan.ru киирэн ааҕыаххытын сөп.

Добавить комментарий

Ваш адрес email не будет опубликован. Обязательные поля помечены *