Ярыгин турнира: Ньургун Сергин үһүс үктэлгэ таҕыста!

Дьэ, өр кэтэспит күрэхтэһиибит – Иван Ярыгин аатынан көҥүл тустууга норуоттар икки ардыларынааҕы Гран-при турнир түмүктэннэ. Бүгүн, дьахталларга да, эр дьоҥҥо даҕаны хаалбыт ыйааһыннарга бүтэһик быһаарыылаах хапсыһыылар ыытылыннылар.

Бу түһүлгэ хаамыытын, сүрүннээн сахалар тустууларын түөрт күнү быһа бэйэбит сайтпытыгар http://dzulurgan.ru барытын сырдатан кэллибит. Ол сиэринэн, хатылыы барбакка, бүтэһик күн 92 киилэҕэ Ньургун Сергин тустууларын суруйдахха, маҥнай, финалга тахсыбыт киһиэхэ (Черткоевка) хотторбутун быһыытынан, кини нөҥүө күн турнир үһүс миэстэтин кимнээх былдьаһалларын быһаарар бөлөххө киирэн, Россия эдэрдэргэ күрэхтэһиитин призера дагестанец Сулейман Омаровы кытта көрүстэ.

Манна, Ньургун хапсыһыыны сөптөөхтүк былааннаан, наһаа ыгылыйбакка, тоҕоостоох түгэннэргэ тоҕута түһүтэлээн, киирсиини бэйэтин туһатыгар, 6:0 ахсаанынан түмүктээтэ.

Итинэн кини аччыгый финалга, турнир боруонса мэтээлин былдьаһыыга монгол баатырын кытта көрүстэ. Комментатор эппитинэн, Дагвадорж Оргил сааһа 19-һа эбит. Бу да тустууга, Ньургун киирсиини көхтөөхтүк, сыыһа-халты туттуута суох ыытан, 4:0 ахсаанынан түмүктээтэ.

Биир тылынан, Ньургун бу хапсыһыыларга наар, били спорт эйгэтигэр этиллэринии, бастакы нүөмэринэн үлэлээтэ, наар кимэ сатаата. Утарсааччыларын ыган, түҥ-таҥ тутан, дэлби хамсатан, түөрэҥнэтэн тустубутун бэлиэтиир оруннаах.

Онон хамаанда хапытаана бэртээхэй тустууну көрдөрөн, ыарахан ыйааһыҥҥа Иван Ярыгин аатынан турнирга бириистээх миэстэҕэ тахсан, бүгүн былыттаах, ардахтаах күн бүтүн Саха сирин олохтоохторун үөрпүт, сэргэхсиппит буолуохтаах диэн бүк эрэниллэр. Оттон тустуу бэриниилээх ыалдьааччылара үөрүүлэрэ баһаам буоллаҕа дии. Маныаха бастатан туран, Ньургун бастакы тренерэ Николай Романович Даниловы уонна билигин чочулла сылдьар уһуйааччыта Степан Петрович Сивцеви эҕэрдэлиэҕиҥ!

Манан, быйылгы Ярыгин турнирыгар биһиги бөҕөстөрбүт барыта биэс мэтээли ылары ситистилэр. Арыйаан Тютрин бастаата, Виктор Рассадин, Севиль Назарова иккистээтилэр, Алина Казымова, Ньургун Сергин үһүстээтилэр. Итинэн Саха сирин тустуута билигин даҕаны күүстээҕин итэҕэттилэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *