Ярыгин турнира: Ньургун Сергин «уоскутар» бөлөххө тустуоҕа

Красноярскайга ыытылла турар Иван Ярыгин аатынан көҥүл тустууга норуоттар икки ардыларынааҕы Гран-при турнир хаамыытын “Дьулурҕан” хаһыат интернеккэ сайтыгар сырдатыыны салгыыбыт. Бүгүн көбүөргэ үс уолбут таҕыста.

Бастаан 97 киилэҕэ Красноярскайтан кыттар Максим Толмачев осетин Асланбек Газзаевы кытта көрсөн, 1:6 ахсаанынан хоттордо. Салгыы Газзаев – Овсянниковка баһыйтарда.

74 кг ыйааһыҥҥа Тимур Николаев маҥнай Магомед Кардановы (Хотугу Осетия) 4:3 ахсаанынан кыайан баран, салгыы күрэхтэһиигэ Леонид Богатыревка (С-Петербург) 4:5 хотторон кэбистэ. Киһитэ атын тустууга хотторон, биһиги бөҕөспүт күрэхтэһииттэн туоруурга күһэлиннэ.

Оттон 92 киилэҕэ Ньургун Сергин финал 8/1-гэр узбек Мухамадрасул Рахимовы 9:1 кыайан баран, финал чиэппэригэр осетин Гурам Черткоевка 2:6 ахсаанынан сабырыйтарда. Салгыы Черткоев атын утарсааччыларын кыайан финалга тахсыбытын иһин, Сергин салгыы тустар буолла. Ол курдук, кини «уоскутар» бөлөххө киирэн, сарсын күнүс дагестанец Сулейман Омаровтыын тустар буолла. Онно хайалара кыайбыт, турнир боруонса мэтээлин иһин монгол Дагвадоржу кытта киирсиэҕэ.

Сарсыҥҥы финаллар:

74 кг Азнаур Таваев (Дагестан) – Никита Сучков (Красноярскай).

86 кг Зелимхан Минкаилов (Чечня) – Магомедшариф Биякаев (Дагестан).

92 кг Гурам Черткоев – Тамерлан Тапсиев (иккиэн – Хотугу Осетияттан).

97 кг Игорь Овсянников (Красноярскай) – Магомедхан Магомедов (Дагестан).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *