Ярыгин турнира: Николаев, Сергин, Толмачев түһүлгэни саҕалыыллар

Иван Ярыгин аатынан көҥүл тустууга норуоттар икки ардыларынааҕы XXXII турнир салҕанан ыытыллар. Бүгүн, турнир үһүс күнүгэр көбүөргэ 74, 86, 92, 97 кг ыйааһыннаах бөҕөстөр тахсаллар. Онуоха биһигиттэн үс бөҕөс кыттар. «Дьулурҕан» бу күрэхтэһии туһунан сонуннары салгыы сырдатар.

74 кг барыта 23 бөҕөс сэрэбиэйи ааспыт. Биһигиттэн маастар Тимур Николаев иккис бөлөххө кыттар. Кини утарсааччыта – Магомед Карданов (Хотугу Осетия). Онно ким хоппута салгыы тустууга Эльдаров (Чечня) – Олонбаяр (Монголия) пааратын кыайыылааҕын кытта көрсүөҕэ.

92 киилэҕэ Саха сирин сүүмэрдэммит хамаандатын хапытаана Ньургун Сергин узбек Мухаммадрасул Рахимовтыын тустуоҕа. Манна даҕатан эттэххэ, Рахимов соторутааҕыта Дьокуускайга, Роман Дмитриев аатынан турнирга кэлэн 97 киилэҕэ бастаабыта.

Ньургун бөлөҕөр чугас осетиннар: Гурам Черткоев уонна арааһа бу турнир саамай аҕа саастаах бөҕөһө Сослан Кцоев бааллар.

Итиэннэ 97 кг ыйааһыҥҥа, билигин Красноярскайга олорор, эрчиллэр биир бастыҥ ыччаппыт, Россия эдэрдэргэ түһүлгэтин призера Максим Толмачев дагестанец Абдулла Курбановтыын киирсиэҕэ…

Уолаттарбытыгар ситиһиини баҕарабыт уонна турниры кэтээн көрөр күүспүтүн намыраппаппыт! Турнир хаамыытын күннэтэ сиһилии билиэххитин баҕарар буоллаххытына, биһиги сайтпытын http://dzulurgan.ru кэтээн көрө сылдьаргытыгар ыҥырабыт.

Бүгүн тустуу эмиэ күнүс 13:00 чаастан саҕаланар. Бырагыраама быһыытынан бастаан бэҕэһээҥҥи ыйааһыннарга «уоскутар» тустуулар буолуохтара. Онтон 74, 86, 92, 97 кг ыйааһыннарга барыллааһын хапсыһыылар ыытыллыахтара. Киэһэ 20:00 чаастан – 65, 79, 125 кг финаллар. Ону телевизорга «МатчБоец» каналга көрүөххэ сөп буолуо.    

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *