Ярыгин турнира: Константин Капрынов уонна Айсен Потапов саҕалыыллар

Красноярскайга, үгэс быһыытынан ыытыллар Иван Ярыгин аатынан көҥүл тустууга норуоттар икки ардыларынааҕы Гран-при турнир иккис күнүгэр эр дьоҥҥо – 65, 79 уонна 125 кг ыйааһыннаахтар күрэхтэһиилэрин саҕалыахтара.

Бу ыйааһыннартан биһигиттэн икки бөҕөс тустуоҕа, Дальнай Восток федеральнай уокуругун чемпиона Константин Капрынов уонна Россия студеннарга чемпиона Айсен Потапов (иккиэн 65 кг).

Сэрэбиэй тардыытын түмүгүнэн Айсен Потапов квалификацияҕа үөһэ бөлөххө Великто Хайдаповы (Бурятия), оттон Константин Капрынов аллараа бөлөххө Азат Оганесяны (Казахстан) кытта тустуохтара.

Бу ыйааһыҥҥа барыта 29 бөҕөс сэрэбиэйи ааспыт. Үөһэ бөлөххө Юлиан Гергенов, Начын Куулар, Сайын Казырык, Даша Шарастепанов, оттон аллараа бөлөххө Динислам Тактаров, Максим Сакулцан (Молдова), Кежик Чымба, Чингисхан Эрдоган (Турция), Рамазан Ферзалиев курдук биллэр-көстөр бөҕөстөр бааллар.

Күрэхтэһии хаамыытын салгыы билиһиннэрэн иһиэхпит. Биһиги http://dzulurgan.ru сайтпытын көрө, кэтии сылдьыҥ.

Бүгүҥҥү бырагырааманы билиһиннэрдэххэ, күрэхтэһии биһиги бириэмэбитинэн күнүс 13:00 чаастан саҕаланар: 57, 61, 70 кг «уоскутар» бөлөх тустуулара (онно кимнээх тусталларын сайтка бу иннинээҕи матырыйаалы көр) уонна 65, 79, 125 кг ыйааһыннарга барыллааһын хапсыһыылар. Киэһэ 19:30 – турниры үөрүүлээхтик аһыы, 20:15 – финаллар.

Барыллааһын хапсыһыылары ютуб каналга, оттон финаллары телевизорга «МатчБоец» каналга көрүөххэ сөп.  

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *