Ярыгин турнира: Кими кими, хайдах? Саха бөҕөстөрүн бары тустуулара

Красноярскайга ыытыллан түмүктэммит икки төгүллээх олимпийскай чемпион Иван Ярыгин кэриэһигэр көҥүл тустууга норуоттары икки ардыларынааҕы Гран-при турнирга биһиги республикабыт бөҕөстөрө биэс мэтээли ылан, тустууну таптааччылары сэргэхситтилэр.

Ол курдук, эр дьон тустуутугар быйылгыттан Беларусь Республикатын аатыттан кыттар опыттаах бөҕөс Арыйаан Тютрин 57 киилэҕэ тэҥнээҕин булбата. Кини барыта түөрт хапсыһыыны ыытан – төрдүөннэригэр кыайыыны ситистэ. Итинэн, СР үтүөлээх тренерэ Иван Дмитриев иитиллээччитэ, Саха сириттэн Петр Юмшанов, Ньургун Иванов, Александр Контоев (иикитэ), Виктор Лебедев, Ньургун Скрябин кэннилэриттэн алтыс киһинэн, Иван Ярыгин аатынан улахан таһымнаах турнир кыайыылааҕынан буолла.

Тютрины тэҥэ быйылгы турнирга хамаанда биир саамай опыттаах тустууга, норуоттар икки ардыларынааҕы кылаастаах спорт маастара Виктор Рассадин 70 киилэҕэ иккис миэстэҕэ тахсан, үрүҥ көмүс мэтээлинэн наҕараадаланна.

Турнир бүтэһик күнүгэр Саха сирин хамаандатын хапытаана Ньургун Сергин 92 кг ыйааһыҥҥа үһүс бириистээх миэстэҕэ тахсан, үгүс дьону үөртэ. Кини бу күн Дагестан уонна Монголия бөҕөстөрүн туһааннааҕынан 6:0, 4:0 ахсаанынан эрэллээхтик кыайан, тустар маастарыстыбата үрдээн иһэрин көрдөрдө.

Санатан эттэххэ, бу күҥҥэ диэри Красноярскайдааҕы үгэс быһыытынан ыытыллар улахан таһымнаах түһүлгэттэн саха бөҕөстөрө – 7 кыһыл көмүс, 12 үрүҥ көмүс, 15 боруонса мэтээли ылары ситистилэр.

Саха бөҕөстөрүн тустуулара:

57 кг Арыйаан Тютрин (Беларусь) – Тамир Гармаев (Бурятия) 5:2, Федор Постников (Саха сирэ) +6:6, Ананда Дашиев (Бурятия) ыраас кыайыы, финал — Муса Мехтиханов (Дагестан) 9:5.

57 кг Федор Постников (Саха сирэ) – Мейрамбек Картбай (Казахстан) 5:0, Арыйаан Тютрин (Беларусь) 6:6+, Тамир Гармаев (Бурятия) 3:8, ыраас хотторуу.

57 кг Петр Копылов (Саха сирэ) – Артур Чебодаев (Красноярскай) 1:2

57 кг Айаал Белолюбскай (Саха сирэ) – Чалай Кужугет (Тыва) 4:6

57 кг Дьулус Федотов (Саха сирэ) – Рамиз Гамзатов (Дагестан) 1:9

57 кг Дархан Игнатьев (Саха сирэ) – Саид Хункеров (Дагестан) 3:10

61 кг Ньургун Александров (Саха сирэ) – Айхан Антонов (Саха сирэ) +2:2, Балдан Дондоков (Бурятия) 8:0, Рустам Караханов (Москва) 3:10, Эзир Тюлюш (Тыва) 5:7.

61 кг Дмитрий Аксенов (Саха сирэ) – Эрбол Дильмагамбетов (Казахстан) 4:3, Рустам Караханов (Москва) 2:6, Эзир Тюлюш (Тыва) 6:6+

61 кг Андрей Бекренев (Беларусь) – Омак Сюрюн (Тыва) 5:4, Монгуш (Тыва) 3:4.

61 кг Петр Павлов (Саха сирэ) – Абасгаджи Магомедов (Дагестан) 0:11, Нодар Арабидзе (Брянскай) быьа кыайыы, Жаргал Дамдинов (Бурятия) 2:7.

61 кг Рафаэль Алексеев (Смоленскай) – Булат Баясхолонов (Бурятия),

65 кг Айсен Потапов (Саха сирэ) – Великто Хайдапов (Бурятия) 10:0, Начын Куулар (Красноярскай) 1:4.

65 кг Константин Капрынов (Саха сирэ) – Азат Оганесян (Казахстан) 7:2, ыраас хотторуу.

70 кг Виктор Рассадин (Саха сирэ) – Константин Корнеев (Кемерово) 7:0, Резуан Кажаров (КБР) 5:4, Имам Ганишев (Дагестан) 7:3, финал – Курбан Шираев (Дагестан) 1:8.

74 кг Тимур Николаев (Саха сирэ) – Магомед Карданов (Хотугу Осетия) 4:3, Руслан Богатырев (С-Петербург) 4:5.

92 кг Ньургун Сергин – Мухамадрасул Рахимов (Узбекистан) 9:1, Гурам Черткоев (Хотугу Осетия) 2:6, Сулейман Омаров (Дагестан) 6:0, Дагвадорж Оргилох (Монголия) 4:0.

97 кг Максим Толмачев (Красноярскай) – Асланбек Газзаев (Хотугу Осетия) 1:6.

Тустууну таптааччылар, тренердэр! Бука баһаалыста, ким кими кытта хайдах тустубутуттан көрөн, бэйэҕитигэр сөптөөх түмүгү, ырытыыны оҥосторгутугар баҕарабын. Мин бэйэм тугу сурунан бэлиэтэммиппинэн, саха бөҕөстөрө Красноярскай көбүөрүгэр барыта — 39 хапсыһыыны ыыттылар, итинтэн 19-гар кыайдылар. Ылан көрдөххө, ити сыыппаралар-чахчылар. Онтон тустууну үчүгэйдик сыныйан көрбүт буоллаххытына, хас биирдии киһиэхэ тус санаалаах буолуоххутун сөп. Холобур, хапсыһыыны кыайан иһэн хобдох хотторуулар хаста да бэлиэтэннилэр (Постников, Белолюбскай, Александров, Аксенов, Капрынов). Инникитин тренердэр манна улахан болҕомтолорун ууруохтарын баҕарабын.

Сорох бөҕөстөр бэйэлэрин таһымнарыгар тиийбэттик туһуннулар дии саныыбын. Холобур, 61 киилэҕэ биир мэтээл кэлиэхтээҕэ кыаллыбата. Ити уонна итиннэ сыһыаннаах кыаллыбыт уонна кыаллыбатах санаалар аҕыйаҕа суохтар. Онон ситиһиллибиттэн уоскуйан, дуоһуйан хаалбакка, салгыы өссө тууһуран туран кыайыы-хотуу туһугар үлэлиэххэ!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *