Ярыгин турнира: Арыйаан Тютрин – түһүлгэ кыайыылааҕа!

Красноярскайга, икки төгүллээх олимпийскай чемпион Иван Ярыгин сырдык кэриэһигэр көҥүл тустууга норуоттар икки ардыларынааҕы Гран-при турнир үгэннээн ыытылла турар. Бэҕэһээ киэһээ эр дьоҥҥо 57, 61, 70 кг ыйааһыннарга бүтэһик быһаарыылаах хапсыһыылар ыытылыннылар.

Онуоха биһиги бэйэбит сайтпытыгар http://dzulurgan.ru  эрдэ сырдаппыппыт курдук, үс мэтээли эрэнэ кэтэспиппит. Быйылгыттан Беларусь хамаандатыттан кыттар Россия чемпионатын үс төгүллээх призера, аан дойду Кубогын кыайыылааҕа Арыйаан Тютрин ситиһиилээхтик туһунна. Кини, турнир кыайыылааҕын быһаарар хапсыһыыга Дагестан эдэр талааннаах тустууга Муса Мехтихановы 9:5 ахсаанынан баһыйа тутан, түһүлгэ кыайыылааҕынан буолла. Итиэннэ кыайыылаахтары наҕараадалааһыҥҥа бэйэтин чиэһигэр Беларусь Республикатын национальнай гимнин толотторбута биһиэхэ барыбытыгар – тустууну таптааччыларга үөрүүлээх да, долгутуулаах даҕаны буолла. Арыйаан ситиһиитин чиэстээн, саалаҕа мустубут дьон сүһүөхтэригэр туран сүгүрүйдүлэр.

Иккис ыйааһыҥҥа (61 кг) Ньургун Александров, турнир боруонса мэтээлин иһин эдэр тувинец Эзир Тюлюһу кытта туһунна. Эрдэтээҥҥи сылыктааһын быһыытынан, уолбут кыайарыгар эрэл улахан этэ. Ол эрээри, Ньургун утарсааччытын кыайан иһэн, тустуу бүтэһик сөкүүндэлэригэр баал биэртэлээн кэбиһэн, түмүккэ 5:7 ахсаанынан хотторон кэбистэ. Дьиҥэ ылан көрдөххө, кини тувинецтан тустар маастарыстыбатынан быдан үрдүк эрээри, онтукатын сатаан туһаммата. Биир тылынан, Ньургун Александров, мин көрүүбэр бу күрэхтэһиигэ урукку тустар таһымыгар тиийбэттик кытынна. Онуоха биричиинэлэр баар буолуохтарын сөп.

Финалларга, эр дьоҥҥо үһүс ыйааһыҥҥа (70 кг) биир саамай опыттаах бөҕөспүт – норуоттар икки ардыларынааҕы кылаастаах спорт маастара Виктор Рассадин – Европа чемпиона Курбан Шираевы баһыйа тутарга сатаан күлүүс булан туттубата. Икки төгүл бэйэтэ саҕалаабыт албаһын ситэ оҥорбокко аллараа буолан, очукуолары биэртэлээн, түмүккэ 1:8 ахсаанынан хотторон кэбистэ.

Онон бүтэһик финаллар кэннилэриттэн саха тустууга оскуолатын кыһата эр дьоҥҥо биир бастакы, биир иккис миэстэлэннэ. Киһи үөрэрэ баар, бу ситиһиилэммит тустууктар: кыайыылаах Арыйаан Тютрин уонна иккис буолбут Виктор Рассадин – Саха Республикатын үтүөлээх тренерэ Иван Дмитриев эрчийэр бөҕөстөрө. Түгэнинэн туһанан, Иван Ивановиһы уонна Арыйаан бастакы тренерэ – билигин Уус Алдан Суоттутугар ситиһиилээхтик үлэлии-хамсыы сылдьар тренер, ССРС спордун маастара Семен Гаврильевич Петухову, Иван Ярыгин турнирын кыайыылааҕын иитэн-бэлэмнээн таһаарбыттарынан эҕэрдэлиэҕиҥ!

Өссө дьахталларга 55 киилэҕэ Россия чемпионатын призера Севиль Назарова (тренерэ Ким Колодезников) иккис миэстэҕэ тахсан, үрүҥ көмүс мэтээлинэн наҕараадаламмытын санатар тоҕоостоох. Турнир өссө даҕаны салҕанан ыытыллар…

Турнир бастакы финалларын түмүгэ:

57 кг: 1. Арыйаан Тютрин (Беларусь), 2. Муса Мехтиханов (Россия, Дагестан), 3. Тамир Гармаев (Россия, Бурятия), Рамиз Гамзатов (Россия, Дагестан), 5. Ананда Дашиев (Россия, Бурятия), Хуреш Дондук Оол (Россия, Тыва).

61 кг: 1. Абасгаджи Магомедов (Россия, Дагестан), 2. Рустам Караханов (Россия, Москва), 3. Эзир Тюлюш (Россия, Тыва), Жаргал Дамдинов (Россия, Бурятия), Ньургун Александров (Саха сирэ), Кежик Монгуш (Россия, Тыва).

70 кг: 1. Курбан Шираев (Россия, Дагестан), 2. Виктор Рассадин (Россия, Саха сирэ), 3. Резуан Кажаров (Россия, КБР), Давид Баев (Россия, Хотугу Осетия), 5. Имам Ганишев (Россия, Дагестан), Абдулла Ахмедов (Россия, С-Петербург).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *