Ярыгин турнира: Арыйаан Тютрин, Виктор Рассадин уонна Севиль Назарова — финалга

 

Красноярскай. Иван Ярыгин аатынан көҥүл тустууга норуоттар икки ардыларынааҕы Гран-при турнир бастакы күнэ түмүктэннэ. Эр дьоҥҥо (57, 61, 70 кг) уонна дьахталларга (50, 55, 59, 65 кг) – турнир кыайыылааҕын аатын ылар иһин хапсыһыыларга кимнээх киирсэллэрэ быһаарылынна. Онуоха барыта сэттэ ыйааһынтан Россия – 11, Монголия – 2, Беларусь — 1 финалистаннылар.

Үөрүүлээҕэ диэн, бу күн түмүгүнэн биһигиттэн Арыйаан Тютрин, Виктор Рассадин уонна Россия быйылгы чемпионатын боруонса призера Севиль Назарова финалга таҕыстылар. Оттон Федор Постников, Дмитрий Аксенов, Петр Павлов салгыы «уоскутар» бөлөххө киирсиэхтэрэ, Ньургун Александров үһүс миэстэ иһин тустуо.

Быйылгыттан Беларусь аатыттан тустар Арыйаан Тютрин финалга диэри утуу-субуу бурят Тамир Гармаевы 5:2, бэйэтин киһитэ Федор Постниковы +6:6 уонна бурят Ананда Дашиевы ыраастык кыайталаата.

Оттон опыттаах бөҕөс Виктор Рассадин – Кирилл Корнеевы (Кемерово) 7:0, Резуан Кажаровы (КБР) 5:4 уонна Имам Ганишевы (Дагестан) 7:3 ахсааннарынан эрэллээхтик кыайталаата.

Эр дьоҥҥо финаллар:

57 кг Арыйаан Тютрин (Беларусь) – Муса Мехтиханов (Россия)

61 кг Рустам Караханов (Россия) – Абасгаджи Магомедов (Россия)

70 кг Виктор Рассадин (Россия) – Курбан Шираев (Россия).

Дьахталларга финаллар:

50 кг Мадина Чубанова (Россия) – Милана Махачева (Россия)

55 кг Севиль Назарова (Россия) – Виктория Ваулина (Россия)

59 кг Эргиир систиэмэтин бастыҥнара – Шоовдор Баатаржав (Монголия), Анастасия Яковлева (Россия).

65 кг Эргиир систиэмэтин бастыҥнара – Динара Кудаева (Россия), Болортунгалаг Зоригт (Монголия).

Финалга кимнээх тахсыбыттара биллибитинэн, Арыйаан Тютриҥҥа (57 кг) сирэй көрсөн хотторбут Тамир Гармаев (Бурятия) уонна Федор Постников «уоскутар» бөлөххө киирэн киирсиэхтэрэ, онно хайалара хоппута – турнир боруонса мэтээлин иһин бурят Ананда Дашиевка тахсыаҕа.

Иккис ыйааһыҥҥа үөһэ бөлөхтөн Рустам Карахановтан хотторуу хомолтотун билбит Дмитрий Аксенов – Эзир Тюлюш (Тыва) тустуохтара. Онно ким кыайбыт, үһүс бириистээх миэстэ иһин Ньургун Александрову кытта киирсиэҕэ. Оттон аллараа бөлөхтөн, Россия чемпиона Абасгаджи Магомедовка сабырыйтарбыт Петр Павлов – Нодар Арабидзелыын (Брянскай) тустар, салгыы ким кыайбыт – Россия былырыыҥҥы призера Жаргал Дамдиновка (Бурятия) тахсыаҕа. Онно ким хоппут тувинец Кежик Монгуштуун пьедестал үһүс үктэлигэр тахсар иһин киирсиэҕэ.

Онон бастакы күн тустуутун түмүктээн эттэххэ, салгыы сэттэ бөҕөспүт мэтээл иһин тустуоҕа. Финаллар, турнир бырагырааматын быһыытынан сарсын биһиги бириэмэбитинэн киэһэ 20 чаас 15 мүнүүтэттэн саҕаланыахтара. Биһиги сайтпытын кэтээн көрө сылдьыҥ. 

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *