Ярыгин турнира: Алина Казымова үһүстээтэ

Бүгүн Красноярскайга, икки төгүллээх олимпийскай чемпион Иван Ярыгин сырдык кэриэһигэр көҥүл тустууга дьахталларга уонна эр дьоҥҥо норуоттар икки ардыларынааҕы Гран-при турнир бүтэһик күнэ.

Онуоха бүгүҥҥү тустуу туһунан сайтпытыгар http://dzulurgan.ru бу иннинэ суруйан турабыт. Ону хатылыы барбаппыт. Бу сырыыга бэҕэһээ киэһээҥҥи финаллар түмүктэрин билиһиннэрэбит.

Эр дьоҥҥо 65 киилэҕэ биһигиттэн икки бөҕөс: Айсен Потапов уонна Константин Капрынов кыттыбыттара. Капрынов – Оганесяҥҥа (Казахстан) ыраастык, Потапов – Хайдаповы (Бурятия) 10:0 кыайан баран, Начын Кууларга (Красноярскай) 1:4 ахсаанынан хотторон эрдэ туораабыттара. Атын ыйааһыннарга кыттааччыларбыт суохтара.

Дьахталларга Пермь куораттан төрүттээх ХИФУ студена Алина Казымова хаһыс да сылын Саха сирин чиэһин көмүскүүр. Кини Россия чемпионатын уонна Иван Ярыгин турнирын хас да төгүллээх призера. Бу сырыыга Алина ыйааһыныгар кыттааччы аҕыйах буолан, күрэхтэһии эргиир систиэмэтинэн ыытыллыбытыгар, үһүс бириистээх миэстэҕэ тахсан, турнир боруонса мэтээлинэн наҕараадаланна.

Санатан эттэххэ, бүгүҥҥү күрэхтэһии биһиги бириэмэбитинэн күнүс 13:00 чаастан саҕаланар. Оттон финаллар 15:00 чаастан буолуохтара.

Турнир үһүс күнүн түмүгэ:

53 кг 1. Александра Скиренко, 2. Дарья Хвостова (иккиэн – Россия), 3. Хулан Батхыяг (Монголия).

57 кг 1. Жаргалма Цыремпилова, 2. Хадижат Муртузалиева, 3. Кристина Кондратьева (бары – Россия).

62 кг 1. Анастасия Парохина, 2. Ульяна Тукуренова. 3. Алина Казымова (бары – Россия).

65 кг 1. Алик Хадарцев (Хотугу Осетия), 2. Даша Шарастепанов (Бурятия), 3. Чаян Монгуш (Тыва), Рамазан Ферзалиев (Дагестан).

79 кг 1. Ахмед Усманов, 2. Аманула Гаджимагомедов (иккиэн – Дагестан), 3. Арсалан Будажапов (Кыргызстан), Юсуп Айдаев (Чечня).

125 кг 1. Зелимхан Хизриев, 2. Хамзат Хизриев (иккиэн – С-Петербург), 3. Остап Пасенок (Кемерово), Виталий Голоев (Хотугу Осетия).

Петр ПАВЛОВ.

Хаартыскаҕа: 65 кг ыйааһыҥҥа финалга Алик Хадарцев — Даша Шарастепанов тустуулара.

Добавить комментарий

Ваш адрес email не будет опубликован. Обязательные поля помечены *