Ян – Стерлинг киирсиилэрэ хаттаан ыытыллыа дуо?

Иллэрээ күн, кулун тутар 7 күнүгэр UFC-гэ, Арассыыйа байыастара кииристилэр. Ислам Махачев Дрю Довер диэн утарылаһааччытын, тумнаран бэриннэрдэ. Махачевка Хабиб Нурмагомедов секунданынан кэлсибит. Махачев эмиэ Хабиб курдук тустуунан киирсэр. Киэҥ уораҕай саалаҕа олорон  көрөөччүлэр, тустуунан киирсиини сөбүлээбэттэр, «Манна тустуу буолбатах» дииллэр. Астымматтар. Кинилэр тэбэн-охсон дөйүтэри сөбүлүүллэр. Ол иһин Хабибы эмиэ «Не зрелищний боец» диэн ааттыыллар.

Хабиб 29 кыайыылаах, биир даҕаны хотторуута суох уурайбыта. Аҕата бокуонньукка – Абдулманап Нурмагомедовка «аны киирсибэппин» диэн тылын биэрбит этэ. Ону сүгүрүйээччилэрэ син-биир киирсиһиннэриэхтэрин баҕараллар. Ислам Махачев кэнники кыайыыта-хотуута үксээн , Тони Фергюсоны кытта киирсиэн баҕарар. Тоҕо чуолаан кинини кытта диэн ыйытыкка: «Фергюсон Хабибтыын киирсиэн баҕарбыттара ыраатта да, хомойуох иһин буолбата. Хабиб уурайда. Тони аһара элбэҕи тыллаһара бэрт, мин кинини кыайан-хотон, айаҕын бүөлүөхпүн баҕарабын!» — диир Ислам.

Махачев кэннэ UFC-гэ иккис түһүмэххэ, кыра ыйааһыҥҥа Петр Ян диэн нуучча уола кииристэ. Өрө күкээрийэ сылдьар баттахтаах Алджимейн Стерлинг диэн, негр байыаһын кытта силиктэстилэр. Негр уҥуоҕунан үрдүк соҕус, быыппастыгас былчыҥа сүүрэлии оонньоон, көрүҥүнэн Петры сабырыйар. Ол да буоллар, биһиги уолбут сылбырҕа эбит. Охсон кууһуннарбытыгар негр тиэрэ таһылла түстэ. Ол курдук хаста да охтордо да, ситэри охсуолаабакка туруоран иһэр. Мээнэ атаакалаабакка холкутук киирсэр. Биир түгэҥҥэ негры өрө баһан таһааран, хоолдьугунан тэлгээтэ. Ханнык эрэ кэмҥэ лоу-кигынан тэбэн утарылаһааччыта атаҕа бииккэлии өрө күөрэйдэ. Онтон туох имнэммитэ буолла, Петр Стерлинг аттаан турар кэмигэр, утары туран тобугунан чэчэҥэйгэ тэптэ. Бу маннык тэбэр көҥүллэммэт. Хатылаан бытааннык көрдөрөр кэмнэригэр, халты да табыллыбыт курдук этэ да, Стерлинг  «артыыстаан» тиэрэ түһэн баран сытар.

Судьуйа: «киирсэр кыахтааххын дуо?» — диэн ыйыттаҕына, эбии «хомурдуостаан», канваска тиэрэ түһэн сытар. Көҥүллэммэтинэн охсон киһини эчэттэххинэ, хотторууну биэрэллэрин билэр буоллаҕа. Инньэ гынан, Петр Ян кыайан иһэн, быраабыланы кэһэн, абалаахтык хоттордо, чемпионун курун былдьатта.

Алджимейн Стерлинг дьиҥэр, үксүн тустуунан кыайталыыр эбит. Ону Петр араастаан төкүнүтэр этэ. Петр Ян этэргэ дылы, тустууктары мускуйталыыр, боксердары дөйүтэлиир, барытыгар дэгиттэр уол эбит. Бу иннинэ Петр Конор Макгрегоры кытта тэҥҥэ киирсэр Джо Альбаны кыайбыта. Онно киирсэригэр охсон-тэбэн, харса суох киирэрэ сүрдээх этэ.

Кэнники Петр Ян уонна Алджимейн Стерлинг киирсиилэрин  ырытан, дьонтон интервью ыллылар.

Онуоха биллиилээх рефери Джон Маккартни этэринэн, Стерлинг дьиҥнээх эр бэрдин быһыытын көрдөрбөтөх. Джон Маккартни элбэх охсуһууну көрбүт, судьуйалаабыт киһи. Онно биир холобуру аҕынна. Эмиэ итинник курдук алҕас, биир байыас быраабыланы кэһэн охубут, онуоха «муннугун дьоно» үөгүлэһэллэрэ иһиллэр үһү: «Сыт турума!», » Быраабыланы кэстэ», — дииллэрин үрдүнэн, ойон туран киирсибит. Джон Маккартни Стерлины кыайыыны ылаары кубулунна диэн бэлиэтиир. Киирсиини тэрийээччи Дана Уайт, Петр Яны кытта Алджимейн Стерлингы хаттаан киирсиһиннэрэр, реванш оҥоруом диэтэ.

Дьэ хайдах буолар?  Көрүөхпүт. Петр Ян тобуктаан турар киһини тэппититтэн улаханнык кэмсинэр. Туох имнэммитэ буолла, өйдөөбөккө да хаалбытым диир. Эмиэ тренерэ дуу, секунданнара дуу: «Бей!», — дииллэрэ иһиллэр этэ.

Ородьумаан.

09.03.2021.

Добавить комментарий

Ваш адрес email не будет опубликован. Обязательные поля помечены *