“ЯкБор” кулууп бэйэтин кубогар күрэхтэһии тэрийэр  

Биһиги республикабытыгар шайбалаах хоккей көрүҥэ сайдан иһэрэ кэрэхсэбиллээх. Ол курдук, киин куоракка Муус дыбарыас үлэҕэ киириэҕиттэн, республика атын да куораттарыгар, улуустарыгар хоккей оонньооччу элбээтэ. Онон сиэттэрэн, оҕолорго, эр дьоҥҥо уонна бэтэрээннэргэ араас таһымнаах күрэхтэһиилэр да ыытыллар буолбуттара киһини үөрдэр.

Кулун тутар 13-14 күннэригэр “Эллэй Боотур” Муус дыбарыаһыгар “ЯкБор” кубогар шайбалаах хоккейга республикатааҕы турнир ыытыллар. Турнирга алта хамаанда кыттыаҕа. Кинилэр сэрэбиэй быһыытынан икки бөлөххө араарылыннылар. Ол курдук, А бөлөххө: “ЯкБор” (Дьокуускай), “Манчаары”(Мэҥэ Хаҥалас), “Стерх” (Дьокуускай), оттон Б бөлөххө – “Мүрү” (Уус Алдан), “Нам” (Нам), “Динамо” (Дьокуускай) хамаандалара оонньуохтара.

Күрэхтэһии бээтинсэҕэ күнүс 12:00 чаастан “ЯкБор” – “Стерх” хамаандалар оонньууларынан саҕаланар. Оттон 13 чаас 30 мүн. күрэхтэһиини үөрүүлээхтик аһыы буолуоҕа.

“ЯкБор” (Якутск – Борогонцы) хамаандаҕа сүрүннээн Дьокуускай куоракка олорор Уус Алдан улууһуттан төрүттээх эр дьоннор оонньууллар. Хамаанданы, ааспыт үйэ 80-с сылларыгар Бороҕоҥҥо шайбалаах хоккейга оонньообут, билигин Дьокуускайга олорор, үлэлиир бэтэрээн саастаах дьон көҕүлээн тэрийбиттэрэ.  Салайааччыларынан, көҕүлээччилэринэн Ариан Дегтярев, Петр Степанов, Василий Чин-Фю уо.д.а. буолаллар. “ЯкБор” – республика араас таһымнаах күрэхтэһиилэрин кыайыылааҕа уонна призера. Кулууп бэйэтин кубогар республикатааҕы күрэхтэһиини ахсыс төгүлүн ыытар.

Бу турнирга спонсордар анал бириис туруордулар. Ол курдук, күрэхтэһии бастыҥ оонньооччутугар “Байанай-Центр” маҕаһыын сертификата туттарыллыа. Оттон, бастыҥ вратарьга эмиэ сыаналаах бириис олохтонно. Ити курдук бу турнирга спонсордарынан буоллулар: «Стройсервис», «Газбойлер», «СтройМастер», «Трест» уо.д.а. тэрилтэлэр.

Бу барыта, сотору кэминэн буолуохтаах Саха сирин норуоттарын 4-с кыһыҥҥы спартакиадатын шайбалаах хоккейга күрэхтэһиитигэр бэлэмнэнии буолар.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *