Экстремал-сүүрүк Петр Наумов туһунан саҥа кинигэлэр сүрэхтэниилэрэ

Бүгүн Саха Республикатын Национальнай библиотекатын кыраайы үөрэтэр отделын саалатыгар экстремал-сүүрүк, чэпчэки атлетикаҕа спорт маастара, Саха сирин элбэх төгүллээх чемпиона, уһун кэмнээх ыраах сиргэ сүүрүүну ыыппыт хорсун санаалаах Петр Семенович Наумов туһунан «Саха хотойо – Гиннесска» уонна «Номох буолбут Сүүрүк Бүөтүр» диэн икки кинигэ сүрэхтэниитэ буолла.

Бу кинигэлэр Петр Семенович 70 сааһыгар ананан бэчээттэнэн таһаарылыннылар. Ол курдук, «Саха хотойо – Гиннесскэ» хомуурунньукка экстремал-сүүрүк тус олоҕун уонна сүүрүүтүн туһунан ахтыылар, ыстатыйалар, библиографическай ыйынньык, сүүрүктэргэ сүбэлэр киирбиттэр. Кинигэни А.П. Герасимов, М.П. Заболоцкая хомуйан оҥорбуттар.

Оттон «»Номох буолбут Сүүрүк Бүөтүр» кинигэҕэ хараҕынан 1-кы группалаах инбэлиит Петр Семенович олоҕун кэрдиистэрин, кыайыыларын туһунан аймахтара, доҕотторо, билэр дьоно суруйбут ахтыылара уонна элбэх хаартыскалар түмүллэн киирбиттэр. Бу үлэни М.П. Заболоцкая уонна В.М. Заболоцкай оҥорбуттар.

Петр Наумов – бэтэрээннэр марафоҥҥа Россиятааҕы уонна Европатааҕы чемпионаттарын кыттыылааҕа, 2009 с. Балтийскайтан Японскай муораҕа диэри 12 тыһ. км сири аҕыс ый устата эт атаҕынан сүүрэн, Гиннесс рекордун кинигэтигэр киирбитэ.

Саҥа кинигэлэри сүрэхтиир кэрэ бэлиэ түгэн национальнай театр артыыһа Дмитрий Артемьев алгыһынан саҕаланна. Таарыйа аҕыннахха, бу тэрээһин культурнай чааһыгар сахалыы хомус дьүрүһүйдэ, Валентина Романова – Чыскыырай иэйиилээх ырыата иһилиннэ. Ол быыһыгар Петр Семенович төрөөбүт Болтоҥотун нэһилиэгин (Чурапчы) олохтоохторун экранынан быһа эҕэрдэлэрэ көтөн кэллэ. Итини тэҥэ, Петр Наумов ыраах сирдэргэ, марафоннарга кыттыытын көрдөрөр өҥнөөх хаартыскаларын быыстапката тилэри тардыллан көрдөрүлүннэ.

Бу бэлиэ күн биллиилээх экстремал-сүүрүк Петр Семенович Наумовы – кини сүдү аатыгар, күүстээх санаатыгар, хорсун быһыытыгар сүгүрүйээччилэр: спорт музейын үлэһитэ Михаил Егорович Друзьянов, спорт бэтэрээннэрин түмүүтүн салайааччыта Гаврил Гаврильевич Сивцев, саҥа кинигэ биир ааптара Алексей Петрович  Герасимов, спортивнай суруналыыстар Владислав Петрович Коротов, Петр Семенович Павлов, Василий Федорович Посельскай, көрбөттөр обществоларыттан Николай Михайлович Спиридонов, Чурапчыттан Семен Иванович Никитин, биллиилээх худуоһунньук Георгий Николаевич Родионов, уо.д.а. эҕэрдэлээтилэр.

Оттон олоҕун доҕоро, педагогическай үлэ бэтэрээнэ Нина Прокопьевна бу тэрээһини тэрийбит Национальнай библиотека үлэһиттэригэр уонна сүрэхтээһиҥҥэ кэлбит бары дьоҥҥо махтанан туран, үөрбүччэ-көппүччэ дьэллэм ырыаны ыллаан доллоһутта.

Кырдьык, Петр Семенович Наумов – саха киһитин дьулуурун, күүстээх санаатын көрдөрбүт биһиги холобур оҥостор киһибит.

Түмүккэ, сүрэхтээһин кыттыылаахтара, экстремал-сүүрүк П.С. Наумов туһунан саҥа кинигэлэри – оскуолаҕа, ыччаттарга билиһиннэрэргэ, көрсүһүүлэри тэрийэргэ диэн санааларын эттилэр.

Саҥа кинигэлэр сүрэхтэниилэрин – Саха Республикатын Национальнай библиотекатын кыраайы үөрэтэр отделын сүрүннүүр специалиһа Виктория Ильина үүннээн-тэһииннээн салайан ыыппытын бэлиэтиир тоҕоостоох.

«Дьулурҕан».        

Добавить комментарий

Ваш адрес email не будет опубликован. Обязательные поля помечены *