Эдэр маастар үһүс үрдэлэ

Дьулурҕан” хаһыат ааспыт нүөмэрдэригэр Саха сирин саахымакка 77-c чемпионата хайдах-туох ыытыллан иһэрин суруйан турабын. Санатан эттэххэ, эр дьон үрдүкү лигатыгар 11-c туур иннинэ маастар Василий Васильев хайы-сах уопсай кыайыыны хааччынна, 8-c очукуотун сурунна. Чугас эргин кинини ситэн ылыах киһи баара көстүбэт. 21 саастаах устудьуон уол аҕыйах сыл иһигэр ити үһүс чаҕылхай ситиһиитэ!

Атын киһи эбитэ буоллар, тиһэх түһүмэххэ 11-c миэстэлээх Василий Романовы үрүҥүнэн аҕыйахта хаамаат тэҥнэһиэ этэ. Ону Вася оннук киһи буолбатах, ханнык да балаһыанньаҕа куруук кыайыыга дьулуһар. Бу да сырыыга уус алданнар эрэллэрэ 54-c хаамыыга өссө 1 очукуону эбиннэ. 9 очукуо – бу олус үрдүк көрдөрүү.

Чемпионат 56 саастаах “аксакала” Николай Бурнашев тиһэх туурга үрүҥнэринэн дебютант Никита Пестряковка күүстээх ыгыыны оҥордо. Николай Семенович ханнык да бэйэлээх саахымаччыкка уруккуттан даҕаны олус кутталлаах утарсааччынан биллэр. Хата, уолчаан ымыр да гыммакка, оонньуу бүтүүтэ пешкаларына, аттаах слонунан уу да тэстибэт кириэппэһин оҥостон, 41-c хаамыыга тэҥнэһиини ситистэ. Ити тэҥнэһии Н.Бурнашевка 7,5 очукуону ылар уонна бочуоттаах иккис миэстэни хааччынар кыаҕы биэрдэ. Мин өйдүүрбүнэн, кини эдэр-сэнэх да эрдэҕинэ итинник үрдүк көрдөрүүнү ситиһэ илик. Арай, 2009 сыллаахха 7 очукуоланан үһүс миэстэлэнэн турардаах.

Үһүс бириистээх миэстэ иһин маастарга кандидат Нариман Мустафин уонна маастар Руслан Пахомов (Сунтаар) тиһэх туурга күүс-уох тиийэринэн, эт-хаан илистиэр диэри кииристилэр. Харалаах Н.Мустафин маастар Дмитрий Егоровы утары 20-c хаамыыга диэри дьиэк биэрбэккэ оонньотто уонна наадалаах тэҥнэһиитин ситистэ. Онон 7 очукуолана түстэ. Бүтүн биир очукуонан хаалбыт Р.Пахомов хараларынан 11-c кылаас үөрэнээччитэ Айтал Местниковы хоттоҕуна эрэ сатанар курдук. Онуоха уол оонньуу бүтүүтүн диэки куруук цейтнотка түбэһэрин таба туһаныаххын эрэ наада. Эдэр маастар ону мүччү туппата уонна сыралаһан да буоллар, кыайыыны ситистэ. Түмүккэ тэҥ очукуоламмыт кыттааччыларга “Бергер” коэффициена ааҕылынна. Ол түмүгэр көрдөрүүтэ үрдүгүнэн үһүс миэстэ Нариман Мустафиҥҥа бэрилиннэ.

Биллэн турар, 14 саастаах үөрэнээччи Никита Пестряков оонньуута көрөөччү болҕомтотун тарта. Дьиҥэр, биир бэйэм бу күүстээх састаапка уол ыарырҕатара буолуо диэн ытырыктата санаабытым. Хата, төттөрүтүн буолан таҕыста. Никита сорох партиялары үрдүк таһымҥа оонньоппутун бэлиэтиэм этэ. Уопсайа 5,5 очукуону ылан, алтыс миэстэҕэ тигистэ уонна эһиил эмиэ үрдүкү лигаҕа кыттар бырааптанна. Чемпионакка Никита ЭЛО рейтинин 150 пуунунан биирдэ эбэн таһаарда, ити иннинэ Өктөмҥө 30 пууну эмиэ эбиммитэ. Билигин Никита Пестряков рейтинэ кырата 2050-ҥэ тиийдэ, ФИДЕ маастарга кандидатын нуорматын толордо.

Афанасий ПАВЛОВ, чемпионат кылаабынай судьуйата.

Добавить комментарий

Ваш адрес email не будет опубликован. Обязательные поля помечены *