Эдуард Григорьев – аан дойду чөмпүйүөнэ!


Бразилия Гояна куоратыгар устудьуоннар көҥүл тустууга аан дойдуга биирдиилээн уонна хамаанданан бастыыр иһин күрэхтэһиилэрэ ыытыллан түмүктэннэ. Россия бөҕөстөрө 3 кыһыл көмүс уонна 1 үрүҥ көмүс мэтээллэннилэр.

Манна даҕатан эттэххэ, Россияттан алта бөҕөс акыйаан уҥуор ыытыллыбыт бу күрэхтэһиигэ бэйэлэрэ үп булан барбыттара. Кинилэр ортолоругар саха тустууга оскуолатын иитиллээччитэ, Чурапчытааҕы физическэй култуура уонна спорт институтун устудьуона, спорт маастара Эдуард Григорьев (61 кг) баара. Кини быйыл саас Раменскайга буолбут Россия устудьуоннарга күрэхтэһиитигэр кыайыылааҕынан тахсан, аан дойду түһүлгэтигэр барар быраабы ылбыта. Үөрүүлээҕэ баар, маннык улахан ороскуоттаах сырыыта халтайга буолбата, уолбут аан дойду чөмпүйүөнэ буолан эргилиннэ.
Кини утуу-субуу дьоппуон Маеданы, мексиканец Круһу ыраастык уонна финалга турок Дайлагы 10:0 ахсаанынан олус эрэллээхтик кыайталаан, пьедестал үрдүкү үктэлигэр тахсар уонна Россия былааҕын көтөхтөрөр, гимнин истэр чиэскэ тигистэ. Түгэнинэн туһанан Эдуард Григорьевы уонна кини тус тренерэ Данил Неустроевы, кыайыыларын эҕэрдэлиэҕиҥ итиэннэ саҥа үктэллэри баҕарыаҕыҥ!

Санатан эттэххэ, саха тустууга кыһатын иитиллээччилэриттэн бу иннинэ аан дойду устудьуоннарга чөмпүйүөннэринэн буолбуттара: Леонид Спиридонов (2000), Евгений Коломиец (2008), Виктор Рассадин (2016). Бу күрэхтэһиигэ Россияттан өссө дагестанецтар Тажитин Акаев (79 кг) уонна Асадулла Ибрагимов (97 кг) чөмпүйүөн үрдүк аатын ыллылар. Оттон красноярец Мурад Нухкадиев (70 кг) бүтэһик быһаарыылаах хапсыһыыга дьоппуон Киношитаҕа сабырыйтаран, үрүҥ көмүс мэтээлинэн наҕараадаланна.
Хамаанданан түмүккэ 3 кыһыл көмүс, 4 үрүҥ көмүс,1 боруонса мэтээллээх дьоппуоннар бастаатылар, 3 бастакы, 1 иккис, 3 үһүс миэстэлээх туроктар иккистээтилэр, оттон 3 чөмпүйүөннээх, 1 призердаах россияннар үһүс көрдөрүүлэннилэр.

Биирдиилээн ыйааһыннарга кыайыылаахтарынан буоллулар: 57 кг – Юдай Фуджита (Япония), 61 кг – Эдуард Григорьев (Россия), 65 кг – Кей Йонезава, 70 кг – Кирин Киношита (иккиэн – Япония), 74 кг – Мухамет Акдениз (Турция), 79 кг – Тажидин Акаев (Россия), 86 кг – Осман Госен, 92 кг – Мустафа Сессиз (иккиэн – Турция), 97 кг – Асадула Ибрагимов (Россия), 125 кг – Балин Барсош (Венгрия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *