Эбрахим Джавади мэтээллэрин төннөрүөхтэрэ дуо?

Аҕыйах хонуктааҕыта уоруйахтар Иран тустууга биир киэн туттуута, көҥүл тустууга аан дойду түөрт төгүллээх чемпиона, Мюнхеннааҕы Олимпиада боруонса призера Эбрахим Джавади дьиэтин халаабыттарын туһунан Тегерантан иһитиннэрии кэлбитэ.

Ол быһыытынан, өрөбүл киэһэ Джавади дьиэ кэргэнинээн куорат атын муннугар олорор уолугар ыалдьыттыы барбыт кэмигэр, уоруйахтар кини дьиэтин аанын алдьатан киирэн сыаналаах маллары уоран тахсыбыттар. Ол курдук, персидскэй көбүөрдэри, сыаналаах былыргы самовардары, бэйэтэ 20 киилэлээх остуолга ууруллар улахан итальянскай чаһыыны тэҥэ, витринаҕа дьаарыстанан турбут чемпион туох баар мэтээллэрин барытын, ол иһигэр, аан дойду түөрт кыһыл көмүс, Азиатскай оонньуу икки кыһыл көмүс уонна Тбилисигэ, Болгарияҕа, Польшаҕа ситиспит улахан таһымнаах турнирдар мэтээллэрин уоран ылбыттар.

ISNA агенство иһитиннэрэринэн, уоруу туһунан полицияҕа тута биллэрбиттэр. Билигин уоруйахтары көрдүүр үлэ ыытылла турар. Маннык түгэҥҥэ Иран спортивнай тустууга федерациятын президенэ, олимпийскай чемпион Алиреза Дабир туора турбакка, буруйдаахтары булууга күүс-көмө, өйөбүл буоларын биллэрбит.

Оттон Джавади уоруйахтарга туһаайан, бастатан туран, спортивнай күрэхтэһиилэргэ ситиспит мэтээллэрин төннөрөллөрүгэр, оттон харчы наада буоллаҕына, биэрэргэ бэлэмин эппит. Ол өйдөнөр даҕаны, мэтээллэр төһөлөөх сыранан-сылбанан, элбэх көлөһүнүнэн кэлбиттэрин, олоҕун бүтүннүү спорка анаабыт чемпион бэйэтэ эрэ билэн эрдэҕэ. Салгыы кини: “Мэтээллэрбин Иран Национальнай олимпийскай комитетын музейыгар биэрэр былааннаах этим. Музейга харалла сытара эрэллээх уонна хаһан баҕарар элбэх киһи көрөр кыахтаах”, — диэн тус санаатын биллэрбит.

Бу дьыала хайдах түмүктэнэрин, биллэхпитинэ – биллэриэхпит.

“Дьулурҕан” ыспыраапката:

Эбрахим Джавади – Иран. 1943 сыллаахха от ыйын 28 күнүгэр төрөөбүтэ. Аан дойду түөрт төгүллээх чемпиона (1969, 1970, 1971, 1973). Мюнхеннааҕы ХХ Олимпиада боруонса призера (1972). Азия оонньууларын икки төгүллээх кыайыылааҕа (1970, 1974). Бэтэрээн-маастардарга аан дойду чемпиона (1999). 2011 сыллаахха кини аата ФИЛА-ҕа Тустуу албан аатын саалатыгар киллэриллибитэ.

Эбрахим Джавади 2014 сыллаахха Дьокуускайга, Роман Дмитриев кэриэһигэр көҥүл тустууга норуоттар икки ардыларынааҕы турнирга бочуоттаах ыалдьыт быһыытынан кэлэ сылдьыбыта. Саха бөҕөстөрүттэн Роман Дмитриеви тэҥэ Илларион Федосеевы, Иннокентий Кочкины кытта туста сылдьыбыта.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *