Ытыктыыр убайбыт, быдан дьылларга быраһаай…

//Кэриэстэбил

Хомолтолоох сураҕы туттубут, Саха сирин Саарына – үгүс ыччаты билиигэ-көрүүгэ, кэрэҕэ уһуйбут учуутал, көҥүл тустууну Саха сиригэр бастаан баһылаабыттартан биирдэстэрэ, аатырбыт Д.П. Коркинныын биир санаанан 1977-1984 сс. бииргэ үлэлээбит талааннаах тренер, тохтообот тойуктаах норуот ырыаһыта, оллоонноон олорон ороһутар олоҥхоһут, арчылыыр алгысчыт, оһуохай Дархан этээччитэ, хомоҕой тыллаах хоһоонньут, көрдөөх кэпсээнньит, кэрэ киһи, Сунтаар улууһун Дьаарханыттан төрүттээх Николай Иванович Сафонов-Дьырылы 89 сааһын бу туолаары сылдьан, балаҕан ыйын 15 күнүгэр ыарахан ыарыыттан күн сириттэн күрэннэ.

Николай Иванович 1987 сылтан саҕалаан республикаҕа ыытыллар оһуохай этээччилэр уонна олоҥхоһуттар күрэхтэригэр уонна фестивалларыгар мэлдьи ситиһиилээхтик кыттара, 1993 с. Туймаада ыһыаҕын «Аар Дархана» уонна 2005 с. Олоҥхо түһүлгэтин кыайыылааҕа, 2012 с. Олоҥхо VII республикатааҕы фестивалын Гран-притын уонна Ньурбаҕа ыытыллыбыт Олоҥхо Ыһыаҕын кыайыылааҕа. Монголияҕа (1979), Германияҕа, Францияҕа, Швейцарияҕа уонна Италияҕа (1987), Болгарияҕа (1989) саха фольклорун дьоһуннаахтык билиһиннэрбитэ.

Кини хоһооннорун, тэттик кэпсээннэрин уонна олоҥхолорун холбуу тутан сэттэ кинигэни суруйан таһаарбыта. «Түөрэхтэһии» диэн көҥүл тустууга бэйэтин санааларын, үлэтин уопутун суруйбут кинигэтэ 2013 с. тахсыбыта, бу кинигэтин дьиҥинэн тренердэргэ, бөҕөстөргө остуолларыгар уура сылдьан ааҕалларыгар, күннэтэ туһаналларыгар олус баҕарара.

Кэнники сылларга республикатааҕы хаһыаттарга ыстатыйалары тиһигин быспакка суруйара, ааҕааччылар биһирэбиллэрин ылара. “Дьулурҕан” уонна “Спорт Якутии” хаһыаттарга көҥүл тустуу туһунан өрүү суруйара, улахан күрэхтэһиилэр кэннилэриттэн саха бөҕөстөрө хайдах тустубуттарын туһунан үрдүк таһымнаах ырытыылары оҥороро, хас биирдиилэригэр сыаналаах сүбэлэри биэрэрэ, итэҕэстэрин ыйара. “Туймаада” хаһыакка кэнники кэмнэргэ түөрт уонна икки строкалаах киэҥ өйдөбүллээх хоһооннору таһаарара, бу кини айар дьоҕурун чыпчаала буолбутунан астынара, киэн туттара.

Үрдүкү спортивнай маастарыстыба оскуолатыгар уонна Р.М. Дмитриев аатынан Республикатааҕы Олимпийскай эрэллэр училищеларыгар бэйэтин баҕа өттүнэн кэлэн, тренердэргэ уонна эдэр бөҕөстөргө анаан көрсүһүүлэри ыытара, бэйэтин үлэтин уопутугар уонна улуу тренер Д.П. Коркин тустууктары бэлэмниир ньымаларыгар олоҕуран сүбэ-ама биэрэрэ, республика сүүмэрдэммит хамаандатын чилиэннэригэр туһааннаах консультациялары оҥороро.

Дьон-сэргэ ортотугар, үөлээннэхтэрин кытта ыллыы-туойа, сэһэргэһэ сылдьарга үөрэммит убайбыт кулгааҕынан истибэт, онтон хараҕынан көрбөт буолбутуттан санаата муунтуйара, саппаҕырара да, мэлдьи инникигэ эрэллээх буолара, сүрэҕин баҕатынан, сүһүөҕэ уйарынан араас тэрээһиннэргэ үөрүүтүн кытта кыттара.

Аҕа табаарыспыт, үтүөкэннээх доҕорбут Николай Иванович, Эн тускунан өлбөөдүйбэт өйдөбүлү үгүс сылларга сүрэхпитигэр иҥэрэн илдьэ сылдьыахпыт…

 

Сунтаар орто оскуолатыгар үөрэппит үөрэнээччилэрэ: Монреаллааҕы Олимпиада призера Александр ИВАНОВ, суруналыыс Владислав КОРОТОВ уонна милиция бэтэрээнэ Владимир ПОПОВ,

спорт эйгэтигэр эҥэрдэспит доҕотторо – суруналыыстар: Петр ПАВЛОВ, Александр ВАСИЛЬЕВ-Көрдүгэн.

Добавить комментарий

Ваш адрес email не будет опубликован. Обязательные поля помечены *