Ыйыт – хоруйдуубут: “Видео тоҕо суоҕуй?”, “Кинигэ хаһан тахсар?”

Ыйытыы: Бүгүн киэһээ ватсаапка Роман Дмитриев аатынан бөлөххө Киэсэ диэн тустууну таптааччы: “Петр Сэмэнэбис, Уйбаан-Тиит уолаттарбыт Арассыыйа иннинэ дьарыктарын, тургутар хапсыһыыларын видеоҕа устан ютубка киэҥ араҥаҕа таһаараргыт буоллар хайҕаллаах буолуо этэ”.

Хоруй: “Бары билэргит курдук, билигин аан дойду үрдүнэн коронавирус дьаҥа киэҥник тарҕанан, дьону-сэргэни аймаата. Биһиги Сахабыт сирин даҕаны тумнубата. Бу күннэргэ ыалдьааччы ахсаана элбээн иһэр. Ити Киэсэ сөпкө ыйытар. Итинник ыйытыыны быйыл сайыҥҥыттан быһа элбэх киһи биэрэллэр.

“Манньыаттаахха” эрчиллииттэн саҕалаан, тоҕо тустууктар эрчиллиилэрин хаартыскаҕа, видеоҕа түһэрэн ыыппаккыт дииллэр. Кырдьык, билигин ханан да карантин биллэриллибитин үрдүнэн, спортсменнарбыт быар куустан олорботулар. Ким хайдах дьаһанарынан эрчилиннилэр. Онтон тустууктарбыт “Манньыаттаахха” уонна “Триумфка” эрчиллиилэрэ сабыылаах режимҥэ ыытыллыбыта. Онно биһиги тиийэр кыахпыт суох, тиийдэхпитинэ – даҕаны киллэрбэттэр. Бэрээдэк уонна дьаһал оннук.

Ыйыталаһан биллэххэ, итинник тэрээһиннэр (сбордар) төһө эмэ бобуу баарын үрдүнэн, салайааччылар бэйэлэрин эппиэтинэстэригэр тэрийэн ыыталлар.

Дьиҥэ итинник балаһыанньаттан тахсыахха сөп этэ, өскөтүн тренердэр, эбэтэр тустууктар бэйэлэрэ эрчиллииттэн хаартыска, видео ыыппыттара эбитэ буоллар…

Ыйытыы: Спорду сэҥээрээччи Егор Клепандин: “Пётр Семёнович, арба “Чемпионы мира” кинигэбит хайаһан эрэр?”

Хоруй: “Көҥүл тустууга аан дойду чемпионнарынан туһунан ыйынньык-кинигэ бэлэмнэнэ сылдьар. Билигин даҕаны үлэ элбэх. Саҥа дьылга диэри үмүрүтүөхтээхпин. Ити кыаллыа. Оттон билигин мин ити кинигэ тахсыытыгар үбүлээччини (спонсоры) көрдүү сылдьабын. Билиҥҥитэ ол көстө илик.

Петр ПАВЛОВ.

Хаартыскаҕа: быйыл сайын «Манньыаттаахха» эрчиллии кэмигэр.

Добавить комментарий

Ваш адрес email не будет опубликован. Обязательные поля помечены *