Ыйааһыннарга бастыҥнарынан кимнээх талылыннылар?

Бүгүн киэһэ «Бурятия» гостиница Пресс-холугар көҥүл тустууга Россия чемпионатын бастакы күнүн бырагырааматын быһыытынан тренердэр уонна хамаанда бэрэстэбиитэллэрин сүбэ мунньахтара уонна бары ыйааһыннарга сэрэбиэй ыытылынна.

Сүбэ мунньах саҕаланыытыгар Бурятия Республикатын Спорка миниистирэ Вячеслав  Дамдинцурунов тустуу специалистарын эҕэрдэлээтэ. Чемпионат үрдүк таһымнаахтык барарыгар эрэнэрин биллэрдэ.

Оттон чемпионат кылаабынай судьуйатынан анаммыт Иван Бухтояров (Кузбасс) судьуйалааһын саҥа быраабылатын билиһиннэрдэ.

Сүбэ мунньахха биһигиттэн республика хамаандатын сүрүн тренерэ Александр Оконешников уонна хамаанда начаалынньыга Вадим Семенов кыттыыны ыллылар.

Сэрэбиэй маннык быһыылаахтык ыытылынна: бастаан ыйааһын ахсын кыттааччылар испииһэктэрин чуолкайдаатылар. Онуоха 57 киилэҕэ Россия былырыыҥҥы чемпионатын боруонса призера Муслим Садулаев (Чечня) сайаапкаҕа киирэн баран, чемпионакка кэлбэтэҕэ билиннэ. Испииһэктэри чуолкайдаан баран, биир-биир хаттаан ааҕан, анал иһиттэн нүөмэрдээх шариктары талан таһаардылар. Ол боротокуолга толоруллан истэ.

Сүбэ мунньах кэмигэр ыйааһын ахсын сеткаҕа бастыҥнары араарыы (футболга маткалааһын курдук) буоларын иһитиннэрдилэр. Онно сорохтор сөбүлэспэт саҥалара иһилиннэ эрээри, ити  рейтинг Россия спортивнай тустууга федерациятын анал хамыыһыйатынан оҥоһуллубутун, онон уларытыллыбатын быһаардылар.

Дьэ, ол курдук, хас ыйааһын ахсын бастыҥнарынан талылыннылар:

57 кг: 1 – Завур Угуев, 2 – Азамат Тускаев, 3 – Муслим Садулаев, 4 – Ахмет Идрисов.

61 кг: 1 – Абасгаджи Магомедов, 2 – Жаргал Дамдинов.

65 кг: 1 – Гаджи Рашидов, 2 – Ахмет Чакаев.

70 кг: 1 – Чермен Валиев, 2 – Руслан Жендаев.

74 кг: 1 – Разамбек Жамалов, 2 – Заурбек Сидаков, 3 – Тимур Бижоев, 4 – Магомедрасул Газимагомедов.

79 кг: 1 – Алихмаев,  2 – Усманов.

86 кг: 1 – Даурен Куруглиев, 2 – Артур Найфонов, 3 – Магомед Рамазанов, 4 – Мусалалиев.

92 кг: 1 – Магомед Курбанов, 2 – Анзор Уришев.

125 кг: 1 – Балдан Цыжипов, 2 – Анзор Хизриев.

Бу бөҕөстөр сэрэбиэй сетката оҥоһуллуутугар атын бөлөхтөргө араарыллаллар. Ол эбэтэр, табылыннаҕына, бэйэ-бэйэлэрин кытта финалга эрэ көрсүөхтэрин сөп.

Ыйааһыннарынан сетка билигин оҥоһулла сылдьар. Ол билиннэҕинэ, эһиэхэ хайаан даҕаны уолаттарбыт кимнээҕи кытта тустар буолбуттарын билиһиннэриэхпит.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *