Чөмпүйүөн-бэтэрээн хомолтото


1956-1960 сс. сахалар тустууну тоҕо олус өрө тутан интэриэһиргээбиттэрэй, тустуу сайдыытын өйөөбүттэрэй диэн ыйытааччылар элбэхтэр. Мин санаабар, ити кэмҥэ биһиги норуоппут киэн туттар, холобур оҥостор дьонноро аҕыйахтара буолуо дии саныыбын. Спорка, култуураҕа атын да эйгэҕэ норуоту сөхтөрөр, дуоһутар кумирдар аҕыйахтара.

Анегина Ильина, Иван Степанов, Семен Оконешников тахса илик кэмнэрэ этэ. Ол иһин баҕар буолуо, көҥүл тустуу кэрэтин, биһиги бастакы чөмпүйүөннэрбитин, ССРС маҥнайгы маастардарын Дмитрий Даниловы, Петр Гаврильевы, Альбет Захаровы, Петр Алексеевы, Алкивиад Иванову, Максим Сибиряковы уонна да атын талааннаах тустууктарбытын саха норуота албан аатырдыбыта.

1964 сыллаахха Дьокуускай куоракка ыытыллыбыт Россия күрэхтэһиитигэр түөрт чөмпүйүөннэнэн саха норуотугар улуу өрөгөй буолбутун тустууну таптааччылар бары билэллэр. Ити кыайыынан Россияҕа, Сэбиэскэй Сойууска – Саха сиригэр кэскиллээх тустуу оскуолата баарын билбиттэрэ. Ити кэнниттэн тыһыынчанан оҕо тустуу секциятыгар кэлбитэ. Чурапчыга, Д.П. Коркин оҕо спортивнай оскуолатын астарбыта. Улуу кыайыылар Россияҕа, Сэбиэскэй Сойууска, Европаҕа, аан дойдуга ситиһиллибиттэрэ.

Ити түөрт чөмпүйүөнтэн Дмитрий Петрович Коркин “тустуу профессора” диэн ааттаабыт киһитэ – Альберт Захаров билигин Саха сиригэр соҕотох тыыннаах хаалан, Дьокуускайга олорор. Кинини Д.П. Коркин аатынан турнирга киирэн көрөрүгэр Ыҥырыы билиэти биэрбэккэ, күрэхтэһиини көрдөрбөтүлэр.

Дьэ, хайдахтаах курдук суобаһа суох быһыыны Спорт министиэристибэтэ, Тустуу федерцията оҥордулар! Альберт Георгиевич көрдөһүүтүнэн федерация бэрэссэдээтэлиттэн ыйыппыппытыгар, федерация үлэһитигэр Николай Николаевка этиэм, быһаарыахпыт диэбитэ да, киһитэ “тугу да билбэппин” диэн мэлдьэһэн кэбистэ. Мин ыксаан Спорт миниистирин бастакы солбуйааччы Чердоновка тиийэн көрдөспүппүн, бэтэрээннэргэ билиэти Бэтэрээннэр сэбиэттэрин бэрэссэдээтэлэ Гаврил Гаврильевич Сивцев биэрэр диэбитин иһин, Гаврилга тиийдим: “Альберт Захаровка билиэтим суох, ШВСМ дириэктэрин солбуйааччытыттан көрдөс” — диэбитин иһин, Платоновка тиийбиппэр, киһим аккаастаан, төттөрү Сивцевкэ ыытта.

Мин испэр бэккиһээн: “Урут Спорт миниистиринэн үлэлиир кэммэр эбиккит буоллар, маннык борустуой боппуруоһу кыайан быһаарбат үлэһиттэри барыгытын үлэҕититтэн үүртэлээн кэбиһиэм этэ”, — дии санаатым.

Көҥүл тустууга, бэтэрээннэргэ итинник холус сыһыаннаах дьон тустуу сайдыытыгар мэһэй буолуохтарын сөп.

Бу кэмҥэ Альберт Георгиевич эмиэ төлөпүөннээтэ. Туох диэхпиний, билиэт биэрбэтилэр диэтим.

Кэнники билбитим, 1964 сыллаахха Россия чемпионатын үрүҥ көмүс призера, бэтэрээннэргэ аан дойду чемпиона Владимир Данилов билиэт көрдөһө сатаан баран “Триумф” 3000 миэстэтиттэн биир миэстэ көстүбэккэ матан, эмиэ хомойон хаалбыт.

Петр ПОПОВ, Россия чөмпүйүөнэ, СӨ норуотун хаһаайыстыбатын үтүөлээх үлэһитэ, Сунтаар, Аллайыаха улуустарын бочуоттаах гражданина.

Добавить комментарий

Ваш адрес email не будет опубликован. Обязательные поля помечены *