«Чурапчы – спорт туоната» кинигэ сүрэхтэннэ


Чурапчыга Сүүрүү уонна хаамыы күнүн чэрчитинэн, улуус дьаһалтатын мунньахтыыр саалатыгар “Чурапчы – спорт туоната” диэн кинигэ ситэриллэн-хоторуллан, иккис төгүл бэчээттэнэн тахсыбытын сүрэхтээһин буолла.

Кинигэ бастакы таҥыллыыта өссө 1993 сыллаахха Терентий Кардашевскай дьоҕус фотоальбомуттан саҕаламмыта. Ол кэнниттэн 2013 сыллаахха В.В. Гуляев эппиэтинэһигэр М.Е. Пермяков, В.М. Неустроев, Г.С. Платонов хомуйан бэлэмнээһиннэринэн бэчээттэммитэ. Онно анал салааларга В.С. Дьяконов, С.С. Морфунов, Р.В. Неустроев, П.В. Коркин үлэлээбиттэрэ.

Тэрээһини улуустааҕы киин библиотечнай ситимин дириэктэрэ В.А. Платонова ыытта. Мустубут ыалдьыттар кинигэ тутулун, тас оҥоһуутун, элбэх матырыйаал киирэн, тутарга-хабарга ыйааһыннаах кинигэ буолан тахсыбытын сөҕө-махтайа, астына көрдүлэр. Кинигэ 1000 ахсаанынан «Көмүөл» издательскай дьиэ (салайааччы, биллиилээх суруналыыс уонна суруйааччы Борис Павлов) оҥоруутунан бэчээттэнэн таҕыста. Бу кинигэҕэ Я.П. Оконешников көҕүлээһининэн, В.М. Неустроев уонна Г.С Платонов үлэлэстилэр. Яков Павлович бэйэтинэн хомуйсубута, суруйбута спорт историятыгар улахан болҕомто ууруллубутун мэктиэлиир. Итини таһынан, кинигэ тахсыытыгар матырыйаалларынан көмөлөспүт, сүбэ-ама буолбут дьонунан спорт бэтэрээннэрэ М.Е. Друзьянов, В.С. Дьяконов, Е.В. Пудов буолаллар.

Кинигэ ааптардара бэчээккэ тахсыыны үбүлээбит Чурапчы улууһун дьаһалатын баһылыгар А.Т. Ноговицыҥҥа, Чурапчы нэһилиэгин баһылыгар С.А. Саргыдаевка дириҥ махталларын тиэртилэр.

Семен ЖЕНДРИНСКЭЙ.

Чурапчы.

Добавить комментарий

Ваш адрес email не будет опубликован.