Чурапчы, Нам хамаандалара үстүү финалистаахтар

Саха спордун аҕатынан билиниллибит Николай Николаевич Тарскай төрөөбүтэ 95 сылыгар анаммыт өрөспүүбүлүкэ көҥүл тустууга биирдиилээн уонна хамаанданан бастыыр иһин чөмпүйэнээтин бастакы күнэ түмүктэннэ. Көбүөргэ – 57, 65, 74, 86, 97 кг ыйааһыннаахтар тахсан күрэс былдьастылар.

Ол түмүгэр сарсын, Саха сирин көҥүл тустууга 64-c чөмпүйэнээтин кыайыылааҕын аатын ылар иһин кимнээх киирсэллэрэ билиннэ.

57 кг: Дьулус Федотов (Чурапчы) – Федор Постников (Чурапчы)

65 кг: Петр Павлов (Уус Алдан) – Эдуард Григорьев (Чурапчы)

74 кг: Константин Власов (Мэҥэ Хаҥалас) – Иван Барашков (Нам)

86 кг: Игорь Софронеев (Нам) – Леонид Данилов (Нам)

97 кг: Арсентий Николаев (Уус Алдан) – Ньургун Сергин (Сунтаар).

Көстөрүн курдук, Чурапчыттан уонна Намтан быһаарыылаах хапсыһыыга үстүү киһи кыттар. Ол эбэтэр, финалга биирдии ыйааһыҥҥа бэйэ-бэйэлэрин кытта киирсэллэрин быһыытынан, ити хамаандалар номнуо биирдии чөмпүйүөннээхтэр диэххэ сөп.

Санатан эттэххэ, былырыын Чурапчыга ыытыллыбыт чөмпүйэнээккэ хамаанданан киирсиигэ туһааннааҕынан Чурапчы, Амма, Мэҥэ Хаҥалас үс бастакы миэстэни ылбыттара. Бастакы күн түмүгүнэн былырыыҥҥы чөмпүйүөннэртэн Федор Постников, Эдуард Григорьев, Константин Власов уонна Игорь Софронеев бэйэлэрин үрдүк ааттарын-суолларын көмүскүүллэр. Дьэ, хайаһаллар?

Финалга тахсар иһин тустуулар хаһан баҕарар буоларыныы бэрт тыҥааһынаахтык, сытыытык бардылар. Ол курдук, бастакы ыйааһыҥҥа былырыыҥҥы финалистар Федор Постников уонна Петр Копылов көрсүһүүлэрэ, 2:0 ахсаанынан Постников туһатыгар түмүктэннэ. Эмиэ ити курдук, сэрэбиэй быһыытынан, үһүс ыйааһыҥҥа былырыыҥҥы финалистар Эдуард Григорьев уонна Айхаан Антонов, бу сырыыга финалга тахсар иһин көрсүһүүлэригэр син эмиэ Чурапчыга курдук, кыайыыны Григорьев ситистэ. Биир сытыы киирсиинэн 74 киилэҕэ Иван Ефремов уонна Иван Барашков тустуулара буолла. Киирсии былаһын тухары 3:1 ахсаанынан хотон испит Ефремов биир түгэҥҥэ 4 бааллаах албаска киирэн биэрэн, түмүккэ хотторон кэбиспитин бэйэтэ да ситэ өйдөөмүнэ хаалан, судьуйалары кытта мөккүһэн ылла. 97 киилэҕэ Ньургун Сергин – Кузьма Сивцев тустуулара, 3:1 ахсаанынан Сунтаар бөҕөһүн кыайыытынан түмүктэннэ.

Хапсыһыылар төһө даҕаны улахан бырахсыыта, албастаһыыта суох бардаллар, бөҕөстөр бары кыайыы туһугар бүтэһиккэ диэри туруулаһан, тиритэ-хорута киирсибиттэрин бэлиэтиир оруннаах. Сарсын, кулун тутар 23 күнүгэр субуотаҕа – хаалбыт биэс ыйааһыҥҥа тустуулар буолуохтара, киэһэтин бастакы күннээҕи финалистар хапсыһыылара ыытыллыаҕа. Чөмпүйэнээт сарсыарда 10:00 чаастан саҕаланар. Киириитэ –босхо.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *