Чурапчылар, 2023 сыллааҕы Д.П. Коркин турнирын бэйэлэригэр тэрийэргэ былаанныыллар

Бу дьыл балаҕан ыйын 5 күнүгэр – Саха АССР оскуолаларын үтүөлээх учуутала, ССРС, РСФСР, Саха АССР үтүөлээх тренерэ, ССРС физическэй култуураҕа туйгуна, “Октябрьскай революция” уонна “Бочуот Знага” орденнар кавалердара Дмитрий Петрович Коркин төрөөбүт күнүгэр тэриллибит кэрэ бэлиэ түгэҥҥэ, Чурапчы улууһун баһылыга Андрей Тимофеевич Ноговицын, 2023 сылга улуу тренер Д.П. Коркин турнира Чурапчыга ыытыллыан сөбүн туһунан иһитиннэрбитэ.

Бу туһунан көрдөһүү сурук Саха Республикатын Ил Дархана, республика спортивнай тустууга федерациятын салайааччыта Айсен Сергеевич Николаевка киллэриллибит. Ол дьаһалга илии баттаннаҕына, Чурапчыга, 2023 сыллаахха Дмитрий Петрович Коркин аатынан көҥүл тустууга үгэскэ кубулуйбут норуоттар икки ардыларынааҕы турнир ыытыллыаҕа. Онон Чурапчы нэһилиэгин (баһылык Владимир Дмитриевич Сивцев) иннигэр улахан эппиэтинэстээх тэрээһиннэр тураллар.

Докумуоҥҥа илии баттанна да, күн сарсыҥҥыттан үлэ саҕаланыахтаах. Син эмиэ атын улуустар – Манчаары спартакиадатыгар, Саха сирин спортивнай оонньууларыгар, Олоҥхо ыһыаҕар бэлэмнэнэллэрин курдук, бэлэмнэнии үлэтэ ыытыллыахтаах. Ол курдук, благоустройствоҕа, суол оҥоһуутугар, сэлиэнньэ тас көстүүтүн тупсарыыга үлэлэр былааннаналлар.

Кырдьык, чурапчылар бу суругунан бэйэлэрин иннилэригэр улахан сыалы-соругу туруораллар. Улуу тренербит кэриэһигэр түһүлгэ – Тустуу аан дойдутааҕы түмсүүтүн (UWW) уонна Россия спортивнай тустуу федерациятын (ФСБР) бырагыраамаларыгар киирэн, кинилэр салайыыларынан тэриллэр. Ол аата, транспортан саҕалаан – аһылыгар, түһэриитигэр, күрэхтэһиини ыытар миэстэтигэр тиийэ ураты ирдэбиллэр тураллар. Ханныгын даҕаны иһин, күрэхтэһиини бэлэмнээн уонна тэрийэн ыытыы норуоттар икки ардыларынааҕы таһымҥа сөп түбэһиэхтээх.

Чурапчы – Саха сирин тустуутун биһигэ буолар, онон биһиги, аатырбыт биир дойдулаахтарын аатынан турниры кинилэр үрдүк тэрэһиннээхтик ыытылларыгар эрэллээхпит. Турнирга кэлбит дьон барыта Дмитрий Петрович Коркин төрөөбүт дойдутуттан үтүө санаалаах бараллара ситиһиллиэхтээх. Дьэ, ол инниттэн бары бииргэ үлэлиэхтээхпит.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *