Чурапчылар биллиилээх биир дойдулаахтарыгар мэҥэ бэлиэлэри туруордулар

Бэҕэһээ, балаҕан ыйын 11 күнүгэр Чурапчы улууһун Кытаанах нэһилиэгэр (баһылык Егор Николаевич Потапов) улуу биир дойдулаахтарa: ССРС, РСФСР, Саха АССР үтүөлээх тренерэ Дмитрий Петрович Коркиҥҥа уонна сахалартан бастакы байыаннай летчик-дьахтар, Аҕа дойду сэриитин 1-кы уонна 2-с степеннээх орденнарын кавалера Вера Кирилловна Захарова аҕата – Кирилл Петрович Захаров төрөөбүт алаастарыгар – Баттахха,  өйдөбүнньүк мэҥэ бэлиэлэр туруорулуннулар.

Бу тэрээһин – Кыайыы 75 сылыгар уонна Улуу тренер төрөөбүт күнүгэр анаан ыытылынна. Манна улуус спорка общественноһа, депутаттар, Чурапчытааҕы Д.П. Коркин аатынан республикатааҕы спортивнай интернат-оскуола салалтата, тренердэр, Кытаанах нэһилиэгин дьаһалтата уонна олохтоохтор кыттыыны ыллылар.

Өйдөбүнньүк бэлиэлэри аһыы үөрүүлээх түгэнэ сахалыы сиэр-туом быһыытынан, култуура тэрилтэтин үлэһиттэрэ кыттыылаах алгыһынан аһылынна.

Бу курдук чурапчылар биллиилээх биир дойдулаахтарын умнубаттарын, кинилэринэн киэн тутталларын уонна сүгүрүйэллэрин, ааттарын үйэтитэ туралларын көрдөрдүлэр.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *