Чурапчыга оҕунан ытыы улахан түһүлгэтигэр

Кулун тутар 12-13 күннэригэр Чурапчы нэһилиэгин Александр Федотов аатынан успуорт уораҕайыгар дьахталларга уонна эр дьоҥҥо анаан, оҕунан ытыыга Арассыыйа уонна СӨ хас да төгүллээх чөмпүйүөнэ уонна призера Михаил Михайлович Филатов сырдык кэриэһигэр II-с төгүлүн өрөспүүбүлүкэ чөмпүйэнээтэ ыытылынна.

Михаил Филатов кэриэһигэр бастакы күрэхтэһии өссө 2016 сыллаахха, төрөөбүт-үөскээбит Мындаҕаайытын күөх хочотугар, төрөппүт түөрт уолаттарын көҕүлээһиннэринэн үрдүк таһымҥа ыытыллыбыта.

Күрэхтэһии маҥнайгы күнүттэн саҕалаан күрэхтэһии улам тыҥааһыннанан, иккис күҥҥэ успуорт бэтэрээннэрэ уонна эр дьон ким бэргэнин быһаарсан түмүктээтилэр.

Күрэхтэһии үөрүүлээх арыллыытыгар улуус дьокутааттарын Сэбиэтин уонна улууска оҕунан ытыы бэдэрээссийэ бэрэссэдээтэлэ Афанасий Захаров, улуус баһылыгын социальнай боппуруостарга солбуйааччы Николай Аммосов, СӨ оҕунан ытыыга бэдэрээссийэтин бэрэссэдээтэлэ Петр Бурцев, күрэхтэһии кылаабынай судьуйата Михаил Филатов төрөппүт уола Николай Филатов эҕэрдэ тылы эттилэр.

“Михаил Михайлович бэйэтэ тириэньэр-оружейник быһыытынан элбэх ыспарсымыаны үөрэппит-такайбыта. Онон кини оҕунан ытыы көрүҥэ сайдыытыгар Сахабыт сиригэр биир чаҕылхай ааттаах ыспарсымыан буолар. Төрөппүт уолаттара олус үчүгэй күрэхтэһиини тэрийэннэр, таһыма үрдүк буолла”, — диэн бэдэрээссийэ бэрэссэдээтэлэ Афанасий Афанасьевич бэйэтин тылыгар эттэ.

Кырдьык даҕаны оҕунан ытыы көрүҥэ биһиги улууспутугар биллэ сайдан эрэр. Эдэриттэн-эмэниттэн тутулуга суох үгүс киһи сыыйа-баайы дьарыктанан, бэйэлэригэр ох саа ылынан дьарыктаналлар. Ол курдук, улуус баһылыгын солбуйааччы Николай Аммосов бэйэтин тылыгар, эмиэ утумнаахтык дьарыктанан баҕар аҕыйах сылынан күрэхтэһээччилэр ортолоругар турар буолуохпутун сөп диэн этэн аһарда.

Күрэхтэһиигэ анаан-минээн Томпо, Горнай, Мэҥэ Хаҥалас, Үөһээ Бүлүү, Нам, Хаҥалас, Кэбээйи, Ньурба, Дьокуускай куорат, Таатта, Уус Алдан, Чурапчы улууһун улахан ааттаах ыспарсымыаннара, сахалыы таҥастарын бүтүннүү кэтэннэр кытта кэллилэр.

Күрэхтэһиини, Михаил Филатов төрөппүт кыра уола, сахалартан оҕунан ытыыга аан бастакы норуоттар икки ардыларынааҕы кылаастар успуорт маастара, аҕатын толору аатын сүгэ сылдьар Михаил Михайлович Филатов анаан-минээн ыыта олорор.

Ааҕааччыларга анаан Михаил Михайлович олоҕуттан быһа тардан кэпсээтэххэ, маҥнай 16 саастааҕар ыраах Сунтаар улууһугар тиийэн оҕунан ытыы көрүҥүн сайыннарыыга олук уурсубут киһи буолар. Ол кэннэ икки сыл буолан баран, Сэбиэскэ аармыйа кэккэтигэр ытык иэһин төлүү барар. Уола Николай аҕатын туйаҕын хатаран, Мииринэй куоратыгар тиийэн оҕунан ытыы көрүҥүн көҕүлээбит ыспарсымыанынан биллэр. Онон Филатовтар дьиэ кэргэн өрөспүүбүлүкэбит арҕаа өттүгэр оҕунан ытыы көрүҥэр сэмэй кылааттаах дьон буолаллар.

Күрэхтэһиигэ кимнээх кэлэн кытта сылдьаллар эбит диир буоллахха: оҕунан ытыыга сахалартан аан бастакынан “Көһө сылдьар омуктар Бүтүн аан дойдутааҕы” Оонньууларын улахан күрэҕин призера, Үөһээ Бүлүү бэргэнэ Виктор Елисеев, эр дьон ортотугар былырыыҥҥы Арассыыйа чөмпүйэнээтин призера, чурапчылар күтүөттэрэ Семен Замятин, бэтэрээннэргэ Афанасий Дьячковскай, бэйэтин кэмигэр боксаҕа өрөспүүбүлүкэ 7 төгүллээх, Илин Уһук уокурук эмиэ чөмпүйүөнэ, бастыҥ физик, улахан булчут Гаврил Яковлев, биллэр марафонец, “Манчаары” Оонньууларын 8 төгүллээх чөмпүйүөнэ, үгүс сүүрүүк ытыктыыр тириэньэрэ Гаврил Нохтунскай о.д.а. күрэхтэһии киэргэлинэн буоллулар.

Уопсайа холбоон 13 хамаанда ол иһигэр 12 кыыс, 11 уол, 23 дьахтар, 28 эр киһи, бэтэрээннэргэ – 12 дьахтар, 10 эр киһи кыттыыны ыллылар.

Бэтэрээн дьахталларга:

1 миэстэ – Татьяна Петрова (Мэҥэ Хаҥалас);

2 миэстэ – Күндайаана Эрилик (Нам);

3 миэстэ – Надежда Кулешова (Чурапчы).

Дьахталларга:

1 миэстэ – Нюргустана Слепцова (Горнай);

2 миэстэ – Дария Фомина (Чурапчы);

3 миэстэ – Эльвира Ефимова (Чурапчы).

Кыргыттарга:

1 миэстэ – Розана Слепцова (Горнай);

2 миэстэ – Айыына Егорова (Дьокуускай);

3 миэстэ – Анна Мондоева (Томпо).

Бэтэрээн эр дьоҥҥо:

1 миэстэ – Виктор Елисеев (Үөһээ Бүлүү);

2 миэстэ – Гавриил Яковлев (Чурапчы);

3 миэстэ – Петр Неустроев  (Дьокуускай).

Эр дьоҥҥо:

1 миэстэ – Борис Баишев (Чурапчы);

2 миэстэ – Петр Андросов (Томпо);

3 миэстэ – Павел Стасов-Алексеев (Хаҥалас).

Уолаттарга:

1 миэстэ – Михаил Гермогенов (Мэҥэ Хаҥалас);

2 миэстэ – Владислав Сорокин (АГАТУ-Дьокуускай);

3 миэстэ – Николай Софронеев (Кэбээйи).

Сэмэн Жендринскэй.

 

Добавить комментарий

Ваш адрес email не будет опубликован. Обязательные поля помечены *