“Чемпионнар бааллара-2018”: Бастыҥнарынан кимнээх буолуохтарай?


Быйыл Саха сирин бастыҥ спортсменнарын быһаарыы уратылаах буолар буолла. СР Спорка миниистирэ Иннокентий Григорьев эппитинэн, урукку кэмҥэ улахан дьоҥҥо, оҕолорго, инбэлииттэргэ уонна спорт национальнай көрүҥнэригэр сыл түмүгүнэн 10-нуу бастыҥ спортсмен талыллар эбит буоллаҕына, быйыл улахан дьоҥҥо – дьахтар уонна эр киһи, оҕолорго – кыыс уонна уол, адаптивнай спорка – оҕолорго уонна улахан дьоҥҥо итиэннэ спорт төрүт көрүҥнэригэр 2-лии, барыта холбоон 10 бастыҥ спортсмен талыллыахтаах.

Эр дьоҥҥо Сыл бастыҥ спортсменын аатын ылыыга 20 киһи испииһэккэ киирбит: Василий Егоров (бокс), Арыйаан Тютрин, Николай Охлопков, Эдуард Григорьев, Владислав Андреев (көҥүл тустуу), Айаал Макаров (спортинг), Гаврил Колесов, Андрей Федотов, Николай Стручков (дуобат), Владимир Рыбкин, Николай Чуфистов (хайыһар), Вадим Колтовской (кикбоксинг), Максим Афонин (чэпчэки атлетика), Владимир Балынец (пауэрлифтинг), Эдгар Тобуков (ушу), Алексей Созонов (хотугу многоборье), Руслан Лугинов (гиирэ спорда), Павел Черноградскай (мас-рестлинг), Узаир Абдураков (булкаастаах бойобуой киирсии), Александр Петров (буулдьанан ытыы).

Балартан биир эрэ спортсмен талыллан, 2018 сыл уон бастыҥнарын ахсааныгар киирэр. Дьэ, эһиги кими талыа этигитий?

Оттон 2018 сыл Бастыҥ спортсменкатын аатыгар: Сардаана Трофимова, Диана Адасько, Надежда Гоголева (чэпчэки атлетика), Мотрена Ноговицына, Нюргуяна Азарова, Степанида Кириллина (дуобат), Екатерина Осипова (пауэрлифтинг), Наталья Черноградская (мас-рестлинг).

Бастыҥ спортсменка аатыгар эмиэ биир чулуу көрдөрүүлээх – уон ахсааныгар киирэр.

Адаптивнай спорка Сыл бастыҥ спортсменкатын аатыгар Анастасия Диодорова (харбааһын), Степанида Артахинова (оҕунан ытыы), Алена Дмитриева (олорон эрэн волейбол), Мария Егорова, Евдокия Каторгина (буулдьанан ытыы), Сайыына Юнчанова, Джулияна Андреева (дуобат) киирбиттэр.

Оттон эр дьоҥҥо Бастыҥ спортсмен аатыгар Гаврил Мигалкин, Александр Парников, Леонид Душкевич (чэпчэки атлетика), Владимир Балынец (пауэрлифтинг), Николай Новгородов (оҕунан ытыы), Сергей Безносов, Иван Халдеев, Игорь Созонов (пауэрлифтинг), Гаврил Чемоханов (чэпчэки атлетика), Петр Ушницкай (дуобат), Василий Стрекаловскай, Валерий Чемпосов (көҥүл тустуу), Степан Чепалов (буулдьанан ытыы) бааллар.

Ити курдук, түөрт чулуу спортсмеҥҥа өссө үөрэнээччилэргэ, спорт национальнай көрүҥнэригэр уонна адаптивнай спорт үөрэнээччилэригэр бастыҥнар киирэн биэриэхтэрэ.

Лауреаттар ааттара ахсынньы 26 күнүгэр “Триумф” Спорка бэлэмнэнии киинигэр ыытыллар «Чемпионнар баалларыгар» биирдэ биллиэҕэ.

Оттон эһиги бэйэҕит санааҕытыгар, үөһэ бэриллибит испииһэктэн бастыҥнарынан кимнээҕи ааттыаххытын сөбүй?

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *