Чемпионат үһүс күнүгэр – 4 мэтээл!

 

Бурятия киин куоратыгар Улан-Удэҕэ Дальнай Восток федеральнай уокурук эр дьоҥҥо көҥүл тустууга чемпионата ыытыллан түмүктэннэ. Бу түһүлгэ кулун тутар 12-14 күннэригэр эмиэ манна буолуохтаах Россия көҥүл тустууга чемпионатыгар регион кыттааччыларын сүүмэрдиир уонна тэрийээччилэргэ бэлэмнэнэр сыаллаах-соруктаах ыытылынна.  

Чемпионат бүтэһик күнүгэр – 70, 74, 79 кг ыйааһыннаахтар туһуннулар. Бу да күн Саха сирин хамаандата үрдүк көрдөрүүнү ситиһэр былааннаах этэ. Ол кыранан ситиһиллибэтэ курдук.

Хамаанда саамай эрэнэр бөҕөһө – норуоттар икки ардыларынааҕы кылаастаах спорт маастара Виктор Рассадин 70 киилэҕэ финалга тахсар иһин киирсиигэ бэйэтин киһитэ – спорт маастара Николай Сивцевкэ 2:2 ахсааҥҥа, быраабыла быһыытынан хотторуулааҕынан тахсан, тустууну таптааччылары соһутта.

Өссө бу күн 74 киилэҕэ тустубут Тимур Николаев уонна Константин Власов – бириистээх миэстэҕэ киирбэтэхтэрэ соһуччу соҕус буолла.

Бүгүн биир чемпионнаахпыт. Норуоттар икки ардыларынааҕы кылаастаах спорт маастара Герман Устинов (79 кг) үс эргиири ааста. Бастаан, финал чиэппэригэр кинини утары Амурскай уобаластан Максим Дымченко туста тахсыахтаах этэ да, биллибэт биричиинэнэн көбүөргэ тахсыбыта. Онон уолбут быһа кыайыыны сурунна. Финал аҥаарыгар бурят Александр Рабдановы 10:2 ахсаанынан хотто. Оттон бүтэһик быһаарыылаах хапсыһыыга Эмиль Рамазановы (Хабаровскай) 8:1 кыайан иһэн устунан ыраас кыайыыны ситистэ. Манна сыһыары тутан эттэххэ, Герман Устинов – Саха сирин уонна Россия үтүөлээх тренерэ Будимир Григорьевич Яковлев салалтатынан дьарыктанар.

Онон, буолан ааспыт күрэхтэһииттэн биһиги хамаандабыт Россия чемпионатыгар барыта 18 киһитэ кыттар быраабы ылла. Сүүмэрдиир күрэхтэһии түмүктэннэ. Аны тренердэр бу чемпионат кэнниттэн сөптөөх түмүгү, ырытыыны оҥостон, хаалбыт кэмҥэ итэҕэстэри-быһаҕастары туоратыыга үлэлэһэллэрэ сэрэйиллэр.

Хамаанданан ааҕыы маннык буолла:

Бурятия – 5 кыһыл көмүс, 6 үрүҥ көмүс, 6 боруонса, барыта 17 мэтээл.

Саха сирэ – 5 кыһыл көмүс, 3 үрүҥ көмүс, 10 боруонса, барыта 18 мэтээл.

Хабаровскай – 1 үрүҥ көмүс, 1 боруонса, барыта 2 мэтээл.

Забайкальскай кыраай – 2 боруонса, барыта 2 мэтээл.

Чемпионат түмүк көрдөрүүтэ:

57 кг (12 кыттааччы): 1. Уйгулаан Иванов, 2. Федор Постников, 3. Дмитрий Илларионов, 3. Егор Вензель (бары – Саха сирэ).

61 кг (17): 1. Алдар Бальжинимаев, 2. Жаргал Дамдинов (иккиэн – Бурятия), 3. Ньургун Александров, 3. Семен Владимиров (иккиэн – Саха сирэ).

65 кг (14): 1. Константин Капрынов (Саха сирэ), 2. Эрдэм Будажанаев, 3. Баясхалан Очиров (иккиэн – Бурятия). 3. Петр Павлов (Саха сирэ).

70 кг (12): 1. Булат Батоев (Бурятия), 2. Николай Сивцев, 3. Албан Аввакумов, 3. Виктор Рассадин (үһүөн – Саха сирэ).

74 кг (15): 1. Евгений Жербаев, 2. Буян Цыренов, 3. Очир Доржиев, 3. Никита Жаргалов (бары – Бурятия).

79 кг (9): 1. Герман Устинов (Саха сирэ), 2. Эмиль Рамазанов (Хабаровскай), 3. Александр Рабданов (Забайкальскай кыраай), 3. Буянто Шадапов (Бурятия).

86 кг (8): 1. Алексей Сабидаев (Бурятия), 2. Никита Софронов, 3. Алексей Ефимов (иккиэн – Саха сирэ), 3. Виктор Будаев (Забайкальскай кыраай).

92 кг (8): 1. Ньургун Сергин (Саха сирэ), 2. Барас Базаров, 3. Цэдаши Дугаров (иккиэн – Бурятия), 3. Сергей Мусорин (Хабаровскай).

97 кг (8): 1. Кузьма Сивцев (Саха сирэ), 2. Алексей Анищик, 3. Алдар Дондоков (иккиэн – Бурятия), 3. Андрей Аронов (Саха сирэ).

125 кг (6): 1. Балдан Цыжипов, 2. Батор Доржиев (иккиэн – Бурятия), 3. Никита Хабаров (Саха сирэ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *