Чемпионат кыайыылаахтарынан кимнээх буолуохтарай?

Российскай Федерация физическэй култуураҕа үтүөлээх үлэһитэ, Саха Республикатын үтүөлээх тренерэ Валерий Петрович Керемясов кэриэһигэр көҥүл тустууга Дьокуускай куорат эр дьоҥҥо аһаҕас чемпионата «Триумф» спортивнай комплекска икки көбүөрүнэн ыытыллыаҕа.

Кылгастык чемпионат программатын билиһиннэрдэххэ, сарсыардааҥҥы чааһы – 57, 65, 74, 86, 97 кг ыйааһыннаахтар саҕалыахтара. Онтон эбиэттэн киэһэ – 61, 70, 79, 92, 125 кг диэри ыйааһын кыттыылаахтара тустуохтара.

Киэһэ 19:00 чаастан бүтэһик быһаарыылаах хапсыһыылар саҕаланыахтара.

Аны эмиэ кылгастык чемпионат кыттааччыларын ырытыахха.

57 киилэҕэ барыт 12 бөҕөс суруттарбыт. Кинилэртэн спорт маастардара ини-бии Петр уонна Алексей Копыловтары чорботуохха сөп. Уоннааҕылар – сүрүннээн эдэр уолаттар.

61 киилэҕэ – 17 кыттааччы баар. Манна састаап тэҥ сыһа диэххэ сөп. Өскөтүн нормативтарынан ылан көрдөххө, спорт маастардара: республика чемпиона Федот Постников, Россия эдэрдэргэ призера Михаил Иванов, Дьулустаан Федотов бааллар. Ону тэҥэ Айсиэн Винокуровы, Уйгулаан Иванову, Айаал Белолюбскайы, Дархан Игнатьевы, Сурдлимпиада чемпиона Сергей Николаевы күүстээхтэринэн ааҕыахха сөп. Онон бу ыйааһын – сытыы хапсыһыылаах, саамай тыҥааһыннаах киирсиилээх ыйааһынынан буолбут диэххэ.

65 киилэҕэ 15 бөҕөс күөн көрсүө. Манна Амматааҕы СР норуоттарын спортивнай оонньууларын кыайыылааҕа Георгий Кычкин, норуоттар икки ардыларынааҕы кылаастаах спорт маастара Ньургун Александров, спорт маастардара Семен Владимиров, Быйаман Яковлев, маастарга кандидат Яков Павлов – бириистээх миэстэ иһин киирсиэхтэрэ дии саныыбын.

70 киилэҕэ республика чемпиона Петр Павлов, спорт маастара Айхан Антонов бааллар.  Кинилэри тэҥэ бу ыйааһыҥҥа республика сүүмэрдэммит хамаандатын тренерэ, Россия чемпиона, норуоттар икки ардыларынааҕы кылаастаах спорт маастара Егор Пономарев эдэрдэр илиилэрин-атахтарын тургута киирбитэ, сэҥээриини тардар.

Онтон үөһэ ыйааһыннарга даҕаны күүстээх бөҕөстөр кыттар буолбуттар. Ол курдук, 74 киилэҕэ – Виктор Рассадин, 79 киилэҕэ – Тимур Николаев, Константин Власов, 86 киилэҕэ – Герман Устинов, Алексей Ефимов, өссө Никита Валеев кыттар буолбута эмиэ интэриэһинэй, 92 киилэҕэ – Арсентий Николаев, Александр Халыев, 97 киилэҕэ – Ньургун Сергин, Андрей Аронов, 125 киилэҕэ – Никита Хабаров, Даниил Иванов, Эдуард Максимов сүрүннээн күөн көрсөллөрө буолуо.

Санатан эттэххэ, чемпионат кылаабынай судьуйатынан – Станислав Афанасьев, кылаабынай секретарынан – Владислав Кривошапкин үлэлииллэр.

Чемпионат хапсыһыылара сарсыарда 10:00 чаастан саҕаланаллар. Ону «Мамонт» канаалга, онтон финаллары «Саха» национальнай көрдөрөр-иһитиннэрэр хампаанньа телевизорынан быһа көрдөрүөхтэрэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *