Чемпионат иккис күнүгэр эмиэ 7 мэтээл!

Улан-Удэ куоракка ыытылла турар көҥүл тустууга эр дьоҥҥо Дальнай Восток федеральнай уокуругун чемпионатын иккис күнүгэр, син эмиэ бэҕэһээҥҥи курдук, Саха сирин хамаандата сэттэ мэтээли ылары ситистэ. Ол аата, Россия чемпионатыгар өссө сэттэ путевка эбилиннэ.  

Санатан эттэххэ, бэҕэһээ үс ыйааһынтан 57 киилэҕэ Уйгулаан Иванов бастаабыт эбит буоллаҕына, бүгүн бөҕөстөрбүт түөрт ыйааһынтан – үһүн ыллылар. Чемпионнарынан 65 киилэҕэ Константин Капрынов, 92 киилэҕэ хамаанда хапытаана Ньургун Сергин, 97 киилэҕэ норуоттар икки ардыларынааҕы кылаастаах спорт маастара Кузьма Сивцев буоллулар.

Ааспыт сыл түмүгүнэн Чурапчы улууһун бастыҥ спортсменынан ааттаммыт спорт маастара Константин Капрынов (тренерэ Данил Неустроев) дьоһун тустууну көрдөрдө. Кини бүтэһик быһаарыылаах хапсыһыыга олохтоохтор эрэллэрэ Эрдэм Будажанаевы 14:5 ахсаанынан хотон иһэн устунан ыраас кыайыыны ситистэ. Уопсайынан, Капрынов Бурятия көбүөрүгэр түөртэ тахсан туһунна. Бастаан Хайдаповы (Бурятия) 11:1, онтон бэйэтин киһитэ Петр Павловы 8:0, финалга тахсар иһин киирсиигэ Солбон Тумэнбаяровы (Бурятия) 5:0 ахсааннарынан эрэллээхтик кыайталаата. Итиэннэ кэскиллээҕин, инникилээҕин көрдөрдө диэххэ сөп.

Хамаандабыт саҥа хапытаана Ньургун Сергин, этэргэ дылы, эппиэтинэстээх аакка тиксибит киһи дьоһуннук кытынна. Хапытаан – хапытаан курдук, дьонун батыһыннарардыы, бэйэтинэн холобур буолар тустууну көрдөрдө. Итиэннэ итэҕэллээхтик бастаата. Финалга кини норуоттар икки ардыларынааҕы кылаастаах спорт маастара Барас Базаровка (Бурятия) туох да эрэли хаалларбакка, 5:0 ахсаанынан хотто.

Бүгүҥҥү күҥҥэ киһи биир кэрэхсиирэ диэн, Нам улууһун оҕо спортивнай оскуолатын тренерэ, норуоттар икки ардыларынааҕы кылаастаах спорт маастара Кузьма Сивцев хамаанда интэриэһигэр састаапка ылыллан баран, түһэн биэрбэтэ. Кини Дальнай Восток сэттэ (!) төгүллээх чемпионунан буолла. Финалга кинини утары олохтоохтор биир талааннаах тустууктара Алексей Анищик эчэйиилээх буолан туста тахсыбата. Манна даҕатан эттэххэ, чемпионнар Ньургун Сергин уонна Кузьма Сивцев – тренердэрэ, Саха сирин уонна Россия үтүөлээх тренерэ Степан Петрович Сивцеви эмиэ эҕэрдэлээн кэбиһиэҕиҥ.

Бугуҥҥу тустууну барытын сыныйан көрөн баран, Ньургун Александров, Семен Владимиров, Петр Павлов төһө да бириистээх миэстэҕэ тиксэбиттэрин үрдүнэн, урукку таһымнарыгар тиийбэттик туһуннулар дии санаатым…

Чэ, кэҥии барбакка, чемпионат хаамыытын кылгас соҕустук иһиттэрии бэрээдэгинэн сырдаттахха итинник. Түмүктэр, санаалар кэлин этиллиэхтэрэ. Чемпионат салҕанан бара турар. Сарсын аны үс ыйааһын баар, онно эмиэ эрэнэр дьонноохпут. Тустууктарбытыгар ситиһиилээх кыттыыны баҕарабыт.

Чемпионат иккис күнүн түмүгэ:   

61 кг 1. Алдар Бальжинимаев, 2. Жаргал Дамдинов (иккиэн – Бурятия), 3. Ньургун Александров, 3. Семен Владимиров (иккиэн – Саха сирэ).

65 кг 1. Константин Капрынов (Саха сирэ), 2. Эрдэм Будажанаев, 3. Баясхалан Очиров (иккиэн – Бурятия), 3. Петр Павлов (Саха сирэ).

92 кг 1. Ньургун Сергин (Саха сирэ), 2. Барас Базаров, 3. Цэдаши Дугаров (иккиэн – Бурятия), 3. Сергей Мусорин (Хабаровскай).

97 кг 1. Кузьма Сивцев (Саха сирэ), 2. Алексей Анищик, 3. Алдар Дондоков (иккиэн – Бурятия), 3. Андрей Аронов (Саха сирэ).

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *