Чемпионат иккис күнүгэр уолаттарбыт хайдах туһуннулар?

Сербияҕа ыытылла турар көҥүл тустууг Аан дойду Кубогар биирдиилээн бастыыр иһин түһүлгэ иккис күнүгэр күрэхтэһиини үс бөҕөспүт саҕалаабыта. 

Бастаан Николай Охлопков (65 кг) – Перу уонна Гвинея Бисау бөҕөстөрүн улаханнык илистибэккэ, иккиэннэрин очукуонан ыраастык кыайан баран, финал чиэппэригэр 23 саастаахтарга диэри Европа былырыыҥҥы күрэхтэһиитин кыайыылааҕа Вазген Теваняҥҥа (Армения) кыайан турууласпата, 0:10 ахсаанынан хотторон кэбистэ.

Онон инники дьылҕата армянтан тутулуктаах буолбута. Онуоха чочумча буолаат, Теванян – Оганесяны (Украина) хотон финалга тахсан, Николай салгыы “уоскутар” бөлөххө киирэн тустар буолла.

Кини Николай Грахмез (Молдова) – Хаджи Али (Бахрейн) кыайыылааҕын кытта көрсүөҕэ. Онно хайалара хоппута – үһүс миэстэ иһин Гор Оганесянныын (Украина) тустуоҕа.

61 киилэҕэ Эдуард Григорьев табыллан тустубата. Эмиэ Армения бөҕөһүгэр – Размик Папикяҥҥа 7:8 ахсаанынан сабырыттаран кэбистэ. Салгыы күрэхтэһиигэ Папикян – Россия чемпиона Абасгаджи Магомедовка 0:10 ахсаанынан күппүлүү баран, биһиги бөҕөспүт күрэхтэһииттэн туоруурга күһэлиннэ.

Биир эрэммит бөҕөспүт Ньургун Скрябин (65 кг) бастаан поляк Кшиштоф Бьенковскайы илиилээх-атахтаах оҥорбото, хапсыһыы болдьоҕун иннинэ 10 очукуону кэлтэй ылан, эрэллээхтик хотто. Салгыы финал чиэппэригэр, били быйыл кыһын Европа чемпионатыгар улаханнык илистибэккэ 10:0 ахсаанынан хоппут киһитэ, былырыыҥҥыттан Венгрия хамаандатыттан кыттар кабардинец Исмаил Мусукаевка 3:6 хотторон кэбистэ.

Финалга тахсар иһин киирсиигэ Мусукаев – аан дойду уонна Европа хас да төгүллээх чемпиона Хаджи Алиевы (Азербайджан) 7:6 ахсаанынан хотон, элбэх киһини соһутта. Онон Ньургун Скрябиммыт, үһүс миэстэни былдьаһааччыларга киирэн Ильман Мухтаровы (Франция) кытта тустар буолла. Онно хайалара кыайбыта, боруонса мэтээл иһин азербайджанец Хаджи Алиевтыын киирсиэҕэ.

Онон Николай Охлопков уонна Ньургун Скрябин бүгүн киэһэ боруонса мэтээл туһугар салгыы тусталлар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *