Чемпионаты сахаларга сыһыаран сырдаттахха

Венгрия киин куоратыгар Будапештка ыытылла турар көҥүл тустууга аан дойду чемпионата соһуччу түмүктэрдээх буолла. Бөөлүүн дьэ, кытаанах хапсыһыылары көрдүбүт. Бастакы ыйааһыҥҥа, сэрэйиллибитин курдук, чемпион уларыйда. Былырыыҥҥы кыайыылаах Юки Такахаши урукку таһымыгар киирэ илик эбит. Син эмиэ бу сайыҥҥы Азия оонньууларыгар курдук, үһүс миэстэнэн дуоһуйда. Боруонса мэтээл иһин тустууга кубинец Ортеганы 5:4 ахсаанынан баһыйда.

Хомойуох иһин, бэйэбит уолаттарбыт оннуларыгар атыттары сырдатарга күһэллэбит. Тоҕо диэтэххэ, Владислав Андреевпыт ити дьоппуоҥҥа финал чиэппэригэр хотторон туораабыта. Иккис боруонса иһин тустууга турок Сулейман Атли аан дойду былырыыҥҥы чемпионатын үрүҥ көмүс призерун Томас Гилманы (АХШ) 5:3 ахсаанынан баһыйан, туроктарга бастакы мэтээли аҕалла.

Оттон 57 киилэҕэ быһаарыылаах хапсыһыыга Заур Угуев (Россия) уонна Нурислам Санаев (Казахстан) көрүстүлэр. Билбэт дьоҥҥо быһааран биэрдэххэ, Нурислам Санаев диэн ити тувинец – Артас Санаа. Казахтарга тиийэн аатын итинник уларытан хаһыс да сылын кыттар. Уопуттаах бөҕөс. Быйыл Азия чемпионатыгар 60 киилэҕэ бастаабыта. Онон мин кинини аан дойду чемпионатыгар иккис ыйааһыҥҥа тустара буолуо дии санаабытым. Ханныгын да иһин, быйыл үчүгэй тустар таһымыгар сылдьар. Финалга да кыайарын мүччү тутта. Бэрт тэҥ киирсиигэ судьуйалар 4:3 ахсаанынан кыайыыны Угуевка биэрдилэр. Онон бу чемпионакка Россия бастакы кыһыл көмүс мэтээлин ылла.

Өскөтүн финалга уруккуттан биллэр, улахан дьоҥҥо балайда ситиһиилээх, биллэр-көстөр бөҕөстөр тахсыбыт эбит буоллахтарына, 65 киилэҕэ дьоппуон Такуто Отогуро тахсыыта соһуччу буолла. Бу 19 саастаах эдэр бөҕөс улахан түһүлгэҕэ бастакы холонуута эбээт. Кими да киһилээбэтэ. Кимнээҕи диэтэххитинэ, аан дойду уонна Европа чемпионаттарын призердара, улахан уопуттаах утарсааччыларын: Г.Букуру (Румыния), В.Шуптары (Украина), А.Перепелицаны (Молдова), А.Чакаевы (Россия) эрэллээхтик кыайталаата.

Бүтэһик быһаарыылаах хапсыһыыга төһө да атаҕар эчэйии ыллар, Азия оонньууларын кыайыылааҕа индус Бажраны таптаабытынан тамнаата. Икки өттүттэн хардары-таары бырахсыылаах тустууга 16:9 ахсаанынан Отогуро кыайыыны ситистэ. Итинэн кини 19 сааһыгар аан дойду чемпиона буолан, биир дойдулааҕа, албан аатырбыт Юдзи Такада көрдөрүүтүн тупсарда. Санатан эттэххэ, Такада аан дойду кыһыл көмүһүн 1973 сыллаахха 20-лээҕэр ылбыта.

Бэйэбит уолаттарбыт оннугар эмиэ атыттары хайгыырга тиийэбит. Үһүс эргииргэ биһиги Ньургун Скрябиммытын хоппут кубинец Алехандро Вальдес финал аҥаарыгар индуска хотторон баран, боруонса мэтээл иһин киирсиигэ кореец Лины киһилээбэтэ. Эмиэ атахтаан охторон баран, дэлби “накатка” эргитэн, хапсыһыыны болдьоҕун иннинэ түмүктээтэ. Дьэ, кыахтаах тустуук.

Чемпионаты бэйэбит бөҕөстөрбүтүгэр сыһыаран кылгастык сырдаттахха итинник. Ол гынан баран, санаабытын түһэрбэппит. Биһиэхэ да күн тыгыа. Өссө күүскэ дьаныһан туран дьарыктаныахха эрэ наада.

Оттон бүгүн түүн Садулаев – Снайдер киирсиилэрин көрөбүт. Бу хапсыһыы, син эмиэ Хабиб-Макрегор охсуһууларын курдук, сылы инниттэн күүтүллүбүтэ. Былырыын американец кыайбыта. Бу сырыыга дьэ хайалара буолар? Будапешт көбүөрүгэр АХШ уонна Россия хамаандалара ситиһиилээхтик кытта сылдьаллар. Билиҥҥитэ американецтар – 3 кыһыл көмүс, 3 боруонса мэтээллээхтэр, оттон россияннар – 2 бастакы, 1 иккис, 2 үһүс миэстэлээхтэр. Бүгүн түүн ыытыллар финалларга Россияттан икки, оттон АХШ-тан биир бөҕөс тустуохтара. Ол хапсыһыылар хайдах түмүктэнэллэрэ – хамаанданан түмүгү быһаарыаҕа.

Чемпионат үһүс күнүн түмүгэ:

57 кг: 1. Заур Угуев (Россия), 2. Нурислам Санаев (Казахстан), 3. Юки Такахаши (Япония) уонна Сулейман Атли (Турция).
65 кг: 1. Такуто Отагуро (Япония), 2. Бажранг Пуния (Индия), 3. Ахмед Чакаев (Россия) уонна Алехандро Вальдес (Куба).
79 кг: 1. Кайл Дейк (АХШ), 2. Джабраил Гасанов (Азербайджан), 3. Ахмед Гаджимагомедов (Россия) уонна Али Шабанов (Беларусь).
92 кг: 1. Джейден Кокс (АХШ), 2. Иван Янковскай (Беларусь), 3. Алиреза Карими (Иран) уонна Ацуси Мацумото (Япония).

Бүгүҥҥү финаллар:

70 кг: Адам Батыров (Бахрейн) – Магомедрасул Газимагомедов (Россия)

97 кг: Кайл Снайдер (АХШ) – Абдулрашид Садулаев (Россия)

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *