«Хотой» күөн көрсүү киинигэр дьоһуннаах тэрээһиннэр

Муус устар 5 күнүгэр, улууспут киинигэр Покровскайга, «Хотой» илиҥҥи күөн көрсүү киинигэр, Олимпийскай солбук анал өрөспүүбүлүкэтээҕи спортивнай оскуолатыгар өтөрүнэн буолбатах тэрээһиннэрэ ыытылыннылар. Бу тэрээһиннэр уратыларынан, 1991сыллаахха Ньурбаттан төрүттээх саха уола Петр Иннокентьев Покровскайга Арассыыйа үтүөлээх тириэньэригэр А.А. Куприяновка анаан-минээн кэлэн эрчиллэн, ол сыл Свердловскай куоракка Арассыыйа бастакы чөмпүйэнээтигэр кыайбыта 30 сылынан уонна кик-боксиҥҥа Арассыыйаҕа бастыыр иһин күрэхтэһии аан бастакытын Дьокуускай куоракка, «Триумф» спортсменнары бэлэмниир кииҥҥэ ыытылларынан  уратылаах.

Кик-боксиҥҥа Аан дойду чөмпүйүөннэрин бюстарын арыйдылар!

Бу күн биһиги аатырбыт спортсменнарбытын үйэтитэн, кик-боксиҥҥа Аан дойду икки төгүллээх чөмпүйүөнэ, Саха Өрөспүүбүлүкэтин 16 төгүллээх кыайыылааҕа, боксаҕа ССРС спордун маастара, кик-боксиҥҥа Арассыыйа спордун норуоттар икки ардыларынааҕы кылаастаах маастара – Василий Васильевич Павлов уонна кик-боксиҥҥа Аан дойду үс төгүллээх чөмпүйүөнэ, тайскай боксаҕа Арассыыйа 1-кы чөмпүйэнээтин кыайыылааҕа Иннокентий Васильевич Макаров сырдык сэбэрэлэрэ үйэ-саас тухары өйдүү-саныы сылдьар курдук үйэтиттилиннэ. Кинилэр бюстара үөрүүлээх быһыыга-майгыга арыйылынна.

Манна, Саха Өрөспүүбүлүкэтин физическэй культураҕа уонна спортка миниистирин 1-кы солбуйааччыта, көҥүл тустууга 1999 сыллаахха юниордар ортолоругар Аан дойду чөмпүйэнээтин үрүҥ көмүс призера, 2000 с. Универсиада кыайыылааҕа, 2004 с. Афиныга ыытыллыбыт Олимпийскай оонньууларга IV миэстэлээх, 2006 с. Азия түһүлгэтин  чөмпүйүөнэ, 2008 сыллаахха Пекиннээҕи Олимпиадаҕа V миэстэлээх, 2009 с. Аан дойду чөмпүйэнээтин боруонса призера, 2010 с. Азиатскай оонньуулар III призердара,  СӨ физическэй культураҕа уонна спорка үтүөлээх үлэһитэ Леонид Николаевич Спиридонов, Покровскай к. өрөспүүбүлүкэтээҕи спортивнай оскуола дириэктэрэ, Саха АССР уонна Арассыыйа үтүөлээх тириэньэрэ, Саха Өрөспүүбүлүкэтин физическэй культураҕа уонна спорка үтүөлээх үлэһитэ Александр Аммосович Куприянов,  Хаҥалас улууһун баһылыга Олег Валериевич Иринеев, Арассыыйа кик-боксиҥҥа федерациятын экс-президенэ, Арассыыйа спордун үтүөлээх тириэньэрэ педагогическай наука дуоктара, профессор Юрий Николаевич Романов (Челябинскай к.), Арассыыйа кик-боксиҥҥа экс-кылаабынай тириэньэрэ, Арассыыйа спордун үтүөлээх тириэньэрэ Иван Константинович Козлов (Златоуст к.) уонна Аан дойду, Европа, Азия, ССРС, Тутулуга суох судаарыстыбалар, РСФСР уонна Арассыыйа чөмпүйүөннэрэ, кыайыылаахтара уонна призердара Андрей Артамонов, Николай Иванов, Алексей Уваров, Петр Иннокентьев, Эсен Сайдыкулов, Василий Самсонов, Светлана Константинова (Скрябина) о.д.а кыттыыны ыллылар.

Тылы бастакынан Саха АССР уонна Арассыыйа үтүөлээх тириэньэрэ, Саха Өрөспүүбүлүкэтин физическэй культураҕа уонна спорка үтүөлээх үлэһитэ Александр Аммосович Куприянов ылла:

Аатырбыт спортсменнарбыт Василий Павлов уонна Иннокентий Макаров төһө да кылгас олоҕу олордоллор, бэйэлэрин дойдуларыгар, Сахаларын сиригэр уонна Арассыыйаҕа кыайыылары эрэ аҕалбыттара. Билиҥҥи үүнэр көлүөнэ спортсменнарбыт кинилэр курдук үрдүк көрдөрүүлэри ситистиннэр. Эдэр ыччаттарбыт бу бюстары көрөннөр билиэхтэрэ уонна кинилэр спорка үрдүк ситиһиилэрин сыаналыахтара, — диэтэ. Ол кэнниттэн кэриэстээн, биир мүнүүтэ саҥата суох чуумпуран турарга ыҥырда.

Салгыы, СӨ физическэй культураҕа уонна спорка миниистирин 1-кы солбуйааччыта Леонид Спиридонов, Хаҥалас улууһун баһылыга Олег Иринеев тыл эттилэр.

Кик-боксиҥҥа Аан дойду икки төгүллээх чөмпүйүөнэ, Саха Өрөспүүбүлүкэтин 16 төгүллээх кыайыылааҕа, боксаҕа ССРС спордун маастара, кик-боксиҥҥа Арассыыйа спордун норуоттар икки ардыларынааҕы кылаастаах маастара – Василий Павлов бюһун арыйарга кэргэнэ Татьяна Николаевна Павлова, балта Елена Васильевна уонна бастакы тириэньэрэ, СӨ физическэй культураҕа уонна спорка үтүөлээх үлэһитэ Василий Владимирович Олесов тахсан, ахтан-санаан аастылар,  тэрийбит, сүүрбүт-көппүт көмөлөспүт киһиэхэ – А.А. Куприяновка махталларын тиэртилэр.

Кик-боксиҥҥа Аан дойду үс төгүллээх чөмпүйүөнэ, тайскай боксаҕа Арассыыйа 1-кы чөмпүйэнээтин кыайыылааҕа Иннокентий Макаров бюһун арыйыыга Иннокентий Макаров кыра балта Ольга Васильевна Колмакова, улахан уола Эрхан Иннокентьевич, быраата Алексей Васильевич уонна бастакы тириэньэрэ, кик-боксинг Бүтүн  Арассыыйатааҕы федерациятын үтүөлээх тириэньэрэ Андрей Юрьевич Артамонов тахсаллар. Бу ахтыы күнэ буолла, балта Ольга Васильевна «Тулхадыйбат дьулуур» диэн  убайа Иннокентий Макаров туһунан кинигэни дириэктэр Александр Куприяновка уонна улахан ыалдьыттарга өйдөбүл-бэлэх быһыытынан утары уунна.

Тэрээһин номох буолбут спортсменнар бүүстэригэр сибэкки дьөрбөтүн ууруунан түмүктэннэ.

«Спортивнай антиквариат» музейа аһылынна

Салгыы, «Хотой» күөн көрсүү киинигэр, Олимпийскай солбук анал өрөспүүбүлүкэтээҕи спортивнай оскуола иһигэр, «Спортивнай антиквариат» музейа арыллыытын аалай лиэнтэтин «Спортивнай Албан аат» музей дириэктэрэ, методист-инструктора, Саха Өрөспүүбүлүкэтин үөрэҕириитин туйгуна Светлана Ивановна Куприянова, Арассыыйа кик-боксиҥҥа Федерациятын экс-президенэ, Арассыыйа спордун үтүөлээх тириэньэрэ педагогическай наука дуоктара, профессор Юрий Николаевич Романов (Челябинскай к.) уонна Саха Өрөспүүбүлүкэтин физическэй культураҕа уонна спорка миниистирин 1-кы солбуйааччыта, СӨ физическэй культураҕа уонна спорка үтүөлээх үлэһитэ Леонид Николаевич Спиридонов быһа кырыйдылар, күөрэччи  көтөхтүлэр.

Ити курдук, Уһук Илиҥҥи эрэгийиэҥҥэ, Сибииргэ суох экспонаттардаах спортивнай музей үөрүүлээх быһыыга арылынна. Бу музей икки отделлаах, спорт араас көрүҥнэригэр аналлаах. Манна сүрүннээн илиҥҥи күөн көрсүү спордугар бастакы кыттыбыт дьон спортивнай формалара, мэтээллэрэ, куубактара бааллар. Онтон да атын үгүс-элбэх экспонаттар, ол быыһыгар былыргы сэдэх экспонаттар бааллар. Маны барытын дириэктэр, өрөспүүбүлүкэтээҕи анал Оҕо спортивнай оскуола дириэктэрэ, Саха АССР уонна Арассыыйа үтүөлээх тириэньэрэ, Саха Өрөспүүбүлүкэтин физическэй культураҕа уонна спорка үтүөлээх үлэһитэ Александр Аммосович Куприянов 40-ча сыл хомуйбут, муспут. Кэлбит ыалдьыттар олус сөҕө, сэҥээрэ көрдүлэр.   

Салгыы спортивнай саалаҕа киирэн, күөн көрсүү Олимпийскай солбуктарын оскуолатын иитиллээччилэрин  киирсиилэрин көрдүлэр. Манна, дзюдо салаатыгар тириэньэр, норуоттар икки ардыларынааҕы кылаастаах Монголия спордун маастара Шагдар Гансух, тхэквондо салаатын тириэньэрэ, Арассыыйа чөмпүйүөнэ Ангел Николаевич Эверстов уонна самбо салаатын тириэньэрэ, Саха Өрөспүүбүлүкэтин үтүөлээх тириэньэрэ Николай Петрович Лоднев иитиллээччилэрэ сатабылларын, маастарыстыбаларын көрдөрдүлэр. Тэрээһин уопсай хаартыскаҕа түһүүнэн түмүктэннэ.

Уйбаан Уйгуурап, Хаҥалас.

Ааптар хаартыскаҕа түһэриитэ.

 

 

Добавить комментарий

Ваш адрес email не будет опубликован. Обязательные поля помечены *