Хатаска үтүө хамсааһын чэрчитинэн каток оҥоһуллар

Саха киһитэ барахсан күнтэн күүстээх тутулуктаах, кырыа кыһын кыйданыыта, үрүҥ туман тарҕаныыта кэлэр кэми – сыыйа сылыйан сааскы диэки сыҕарыйар олунньу ыйыгар инникитин, кэнникитин бэринэр, хаһаас аһын хасыһан көрөр, кыстык отун мээрэйдиир.

Дьэ маннык кэмҥэ сырдыкка, сылааска, сибиэһэй салгыҥҥа баҕаран таһырдьа сылдьара элбиир, хамсанара-имсэнэрэ үксүүр, этэргэ дылы төрүөтүн билбэккэ мичээр бэлэхтээх, тоҕотун токоолоспокко, эппиэтин эрэйбэккэ үтүөнү-кэрэни  оҥорорго дьулуһар.

Төрөөбүт төрүт тылбыт төрөөбүт күнүгэр, саха тыллаах, саха санаалаах үөрэр-көтөр, сүргэ көтөҕүллэр күнүгэр Хатаспыт ыччат дьоно бэйэлэрин баҕа өттүлэринэн Баҕарах 1  олохтоохторугар соһуччу бэлэх оҥордулар. Былаан быһыытынан икки сиргэ: Дьоҕодойго уонна Даамбаҕа каток буолар сир анньыллан, хатыыскалыырга усулуобуйа оҥоһулунна. Бу хамсааһын дьиҥ ис сүрэхтэн буолла. Инициатордар олохтоох дьаһалтаҕа үлэлиир уолаттарбыт (П.Михайлов, В.Пинигин, С.Игнатьев), ону өйөөбүт Артур Соловьев, Алексей Осипов, Дмитрий Шараборин, Дьулус Григорьев, Константин Павлов уонна Хатас туһугар элбэх үтүө дьыаланы оҥорбут, оҥоро сылдьар уонна оҥорорго бэлэм Сергей Сергеевич Пимонов буоланнар, буор босхо балай эмэ улахан катогу оҥорууну саҕалаатылар.

Уолаттар бу маннык үлэлэр бары түһүмэхтэрин билэр буоланнар, биир да туһата суох хамсаныы суох буолла. Бэл диэтэр, субу сибилигин, субу манна сырылаччы буспут алаадьытыгар (бэйэлэрэ буһардылар) тиийэ толкуйдаабыттар. Алаадьынан айах тутан, алгыс тылын этэн катокпут үтүөҕэ-кэрэҕэ тардыһыы, эт-хаан өттүнэн сайдыы миэстэтэ буоллун алҕаатыбыт. Уолаттарга сылаас эбиэти Н.Шелковникова бэлэмнээбит.

Дмитрий Шараборины кытта кэпсэтиим маннык буолла.

-Дима, дорообо. Бастатан туран, үтүө дьыалаҕа кыттыбыккар махтал! Эн санааҕар маннык кыттыы киһиэхэ тугу биэрэрий?

Дмитрий: «Олохтоох дьаһалта үлэтин аҕам баарына, оҕо эрдэхпиттэн билэр этим. Уустук үлэ… Бүгүҥҥү дьыалаҕа уолаттар телефоннаабыттарыгар сөбүлэһэн кэлэн турабын. Уопсастыбаннай үлэҕэ кыттар туох куһаҕаннаах буолуой, куһаҕана суох бөҕө буоллаҕа дии. Үтүөнү оҥорортон киһи астыныыны, дуоһуйууну ылар, ким эрэ эн үлэлээбиккиттэн үөрэрэ күүскэ күүс эбэр… Уолаттарга маннык дьыалаҕа кытыннарбыттарыгар махтал».

Маннык курдук ыччаттаахпыт тухары, Хатаспыт ааттаныа, сайдар саҕахтара аһыллыахтара. Бүгүҥҥү күҥҥэ кыттыбыт хас биирдии барҕа махтал буоллун. Бу тэрээһин видеоматериалынан социальнай ситимҥэ барар ролик оҥоһуллуо. Режиссёр, видеоператор, монтажёр – Семёнова Евдокия Ефимовна.

Бары этэҥҥэ буолуоҕуҥ! Түмсүүлээх, эрэллээх буолуоҕуҥ!

Наталья РУФОВА.

Хатас.

Добавить комментарий

Ваш адрес email не будет опубликован. Обязательные поля помечены *