“Хапсыһыы” сэһэн-кинигэ иккистээн бэчээттэннэ!

Бүгүн миэхэ үөрүүлээх түгэн тосхойдо. “Бичик” саха национальнай кинигэ кыһата – народнай суруйааччы Егор Неймохов »Хапсыһыы» сэһэнин иккистээн бэчээттээн таһаарда! Егор Петрович тыыннааҕа эбитэ буоллар, быйыл кулун тутар 30 күнүгэр 70 сааһын үөрэ-көтө бэлиэтиэ этибит. Ол бэлиэ үбүлүөйдээх сааһынан бичиктэр кини маҥнайгы сэһэнин “Саха народнай суруйааччылара” серияҕа күн сирин көрдөрдүлэр. Маҥнай 1983 сыллаахха »Сибиир билиҥҥи сэһэнэ» серияҕа бэчээттэммитэ. Ол иннинэ »Хотугу сулус» сурунаалга тахсыбыта. Түгэнинэн туһанан, бичиктэргэ, чуолаан генеральнай дириэктэр А.В. Егоровка, редактор М.П. Степановаҕа улахан махталбын биллэрэбин!

Биһиги көлүөнэ спорт, тустуу өрөгөйүн билбиппит, киэн туттубуппут. Бииртэн-биир спортсмен дойдуларын ааттатан барбыттара. Чулуу тренер Д.П. Коркин өҥөтүнэн, эрчийиитинэн ССРС, Аан дойду, Олимпиада чемпионнара буолбуттара. 1976 с. Одессаҕа Советскай Союз көҥүл тустууга чемпионата буолбута. Онно уон ыйааһынтан – үһүгэр саха уолаттара чемпион үрдүк аатын ылан, Монреальга, Олимпийскай оонньууларга барар путевка туппуттара. Ол чемпионакка Егор Неймохов Саха сириттэн соҕотох журналиһынан сылдьыбыта. Кини »Одесса түһүлгэтин дуорааннара» диэн, хас да балаһа ыстатыйаны »Эдэр коммунист» хаһыакка суруйбута, улахан сэҥээриини ылбыта. Ол хаһыаты дьон киоскаларга эрдэттэн уочараттаан ылара.

1976 с. Монреальга Павел Пинигин чемпион, Роман Дмитриев, Александр Иванов үрүҥ көмүс призер буолбуттара. Оччолорго оскуола аайы тустуу секцията аһыллан оҕо барыта дьарыктаммыта. Онон тустууктар тустарынан »Хапсыһыы» сэһэн суруллуохтааҕа эбитэ буолуо. Егор Петрович бэйэтэ эмиэ оҕо сылдьан туста сылдьыбыта. Кэлин университеты бүтэрэн баран, спортивнай журналист быһыытынан биллибитэ. »Хапсыһыы» сэһэн ааҕааччы сэҥээриитин ылбыта, Ленинскэй Комсомол бириэмийэтин ылбыта. Саха театрыгар инсценировката турбута. Сэһэҥҥэ борустуой тыа уолаттара бэйэлэрин дьулуурдарынан, сыраларынан чемпион буолаллара ойууланар. Саха чаҕылхай ыччаттара эдэр көлүөнэҕэ холобур буолбуттара саарбаҕа суох.

Егор Неймохов тустууктартан Петр Попову уонна  Вячеслав Карповы кумир оҥостор этэ. Тустууктары ааҕа билэрэ, үксүлэрин кытта доҕордуу сыһыаннааҕа. Онон суруйарыгар сүрүн геройдара түмүллүбүт образтар буолаллар. Маҥнай суруйарыгар сүрүн герой Р.Дмитриев курдук этэ. Москваҕа үөрэнэрэ эҥин. Сэһэнин суруйаары Р.Дмитриев Дьокуускайга кэлбитигэр кэпсэтээри спорт маастара, спорт эйгэтигэр үлэлиир М.Е. Друзьяновтыын, Роман Михайловиһы таба туппакка үчүгэйдик көрсүбэтэхтэрэ.

Онтон Павел Пинигины кытта көрсүбүтэ, сэһэргэспитэ. Онон кэлин П.Пинигиҥҥэ чугаһыыр образ айыллыбыта. Онтон Толя Догоров обраһа – эмиэ түмүллүбүт образ. Олоххо бүдүрүйбүт тустуук элбэх этэ. Ааҕааччылар Толяны Вячеслав Карповка чугас дииллэр. Догоров обраһа ордук ылыннарыылаахтык суруллубут дии саныыбын. Гришалаах Толя сүрүн геройдар доҕордуу сыһыаннара, бэйэ-бэйэлэригэр көмө-тирэх буолаллара, бүтэһигэр Толя көнөр суолга үктэниитэ итэҕэтиилээхтик ойууланар.

Онон айымньы иитэр- үөрэтэр суолтата үрдүк. Сэһэн оччотооҕу ыччат сыһыанын, студеннар олохторун көрдөрөр. Оччотооҕу кэмҥэ советскай былаас саҕана инники олоххо эрэллээх этибит. Үчүгэйдик үөрэннэххэ – Советскай Союз хайа баҕарар куоратыгар үрдүк үөрэххэ үөрэниэххэ сөп этэ. Үөрэххин бүтэрдэххинэ үлэҕэ ханна баҕарар анатыаххын сөбө. Оннук үчүгэй кэмнэр этэ. Сэһэҥҥэ ол тыын баар. Кинигэ билигин да ааҕааччыны сэҥээрдиэ, туруорар проблемата актуальнай дии саныыбын.

Мария НЕЙМОХОВА.

Добавить комментарий

Ваш адрес email не будет опубликован. Обязательные поля помечены *