Хайыһар суолугар 265 киһи таҕыста!

Алданнааҕы, хайыһардьыттары бэлэмниир спортивнай кииҥҥэ күрэхтэһии саҕаланна. Күрэхтэһиини үөрүүлээхтик аһыыга хайыһар спордун бас-көс дьоно кыттыыны ыллылар. Ол курдук, Саха Республикатын хайыһарга федерациятын бэрэссэдээтэлэ Семен Иванов, спорка солбугу бэлэмниир отдел специалиһа Альберт Никаноров, күрэхтэһии кылаабынай судьуйа Альберт Трофимов хайыһардьыттарга ситиһиини баҕардылар.

Сэтинньи 2 күнүгэр классическай ньыманан күрэхтэһии буолла. Хайыһар суолугар 265 киһи таҕыста! 2001-2002 сс. төрөөбүт кыргыттар 3 км сиргэ хайыһарынан сүүрүүлэригэр Казахстантан Айша Ракишева бастаата. Бу саастаах уолаттар 5 км сырсыыларыгар Данил Нелипа (Спасс-Дальний) кыайда. 2003-2004 сс. төрөөбүт уолаттар 5 км күрэхтэһиилэригэр Иван Деревцев (Хабаровскай) инники кэллэ. Нерюнгри хайыһардьыта Сергей Железняков манна үһүс миэстэлэннэ. Бу саастаах кыргыттарга 3 км дистанцияҕа Анастасия Горбенко (Хабаровскай) бастаата.

Ити курдук, 2005-2006 сс. төрөөбүт уолаттарга 2 км – Максим Дангауэр, кыргыттарга – Екатерина Васильева (иккиэн – Амурдааҕы Комсомольскай) кыайдылар. Кыргыттарга Нерюнгриттан Софья Мутовкина иккис, Алдантан Дарья Софронова үһүс буоллулар.

2007-2008 сс. төрөөбүттэр 2 км сүүрүүлэригэр Амурскай уобаластан Ярослав Кузнецов инники кэллэ. Иккис миэстэни Чульмантан сылдьар Алданнааҕы спортивнай оскуола иитиллээччитэ Вадим Кривоногов ылла. Оттон Нерюнгриттан Егор Кулямисаров үһүс буолла. Бу дистанцияҕа кыргыттарга Елена Николаева (Алдан, Аллараа Кураанах) кыайда. Иккис-үһүс миэстэлэри Анна Глотова уонна Инна Рыбкина (иккиэн Алдантан) ыллылар.

1999-2000 сс. төрөөбүттэргэ 10 км Казахстантан Надиль Хасанов иннигэр кими да түһэрбэтэ. Бу дистанцияҕа Дьокуускайтан Никита Шестаков үһүс бириэмэни көрдөрдө. Кыргыттар 5 км сүүрүүлэригэр Елизавета Шалабода (Спасс-Дальний) бастаата. Биһигиттэн Елена Зайцева үһүс буолла.

Күрэхтэһии салҕанан ыытыллар.

Прасковья ПАВЛОВА, Алданнааҕы хайыһар спордугар республикатааҕы спортивнай оскуола специалиһа.

Добавить комментарий

Ваш адрес email не будет опубликован. Обязательные поля помечены *