Хайыһар: Көҥүл ньыманан сүүрүү кыайыылаахтара

Бүгүн, алтынньы 27 күнүгэр – Алдан куоракка быйылгы сезоҥҥа бастакынан хайыһар спордугар Бүтүн Россиятааҕы күрэхтэһии саҕаланна!

Хайыһар суолугар 76 спортсмен таҕыста. Эрдэ иһитиннэрбиппит курдук, күрэхтэһиигэ Амур, Сахалин, Тверь уобаластар, Хабаровскай уонна Приморскай кыраайдар спортсменнара, Казахстан сүүмэрдэммит хамаандата уонна Саха сирин хайыһардьыттара кытыннылар.

Бастакы күн бырагыраама быһыытынан көҥүл ньыманан сүүрүүгэ биирдиилээн бастыыр иһин күрэхтэһии ыытылынна. Маҥнайгынан стартка 5 км дистанцияҕа дьахталлар таҕыстылар. Хайыһар сезона аһыллыытыгар спортсменнар эрэ буолбакка, күн-дьыл эмиэ үөрэн, ыраас, чаҕылхай күнү тосхойдо. Таһырдьа, күрэхтэһэргэ табыгастаах, 12 кыраадыс тымныы буолла.

Бастакы күн күрэхтэһиитин түмүгүнэн дьахталларга бочуот пьедесталыгар күүстээхтэр тахсан турдулар. Ол курдук, 5 км дистанцияҕа Екатерина Денисова (Хабаровскай кыраай) биэтэккэ бастакынан кэллэ. Иккис миэстэни Надежда Кузнецова (эмиэ Хабаровскай кыраай) ылла. Үһүс бириистээх миэстэҕэ биһиги оскуолабытын ситиһиилэхтик үөрэнэн бүтэрбит Анастасия Дубова (Саха сирэ) таҕыста.

Оттон эр дьоҥҥо 10 км дистанцияҕа кыайыыны аан дойду чемпиона, Олимпийскай оонньуу призера Алексей Петухов ситистэ. Киниттэн 20 сөкүүндэнэн хаалбыт Алдан хайыһардьыта, Россия спордун маастара Михаил Соснин (Саха сирэ) иккис миэстэлэннэ. Олимпийскай чемпион, спорт үтүөлээх маастара Никита Крюков үһүс буолла.
Сарсын, алтынньы 28 күнүгэр күрэхтэһии иккис күнүгэр классическай ньыманан сүүрүү буолуоҕа.

Прасковья ПАВЛОВА,

Алданнааҕы Олимпийскай эрэл республикатааҕы спортивнай оскуолатын специалиһа.

Николай ЕНОХОВ хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *