Хайыһар: Алексей Петухов тэҥнээҕин булбата

Алдан куоракка хайыһарга Бүтүн Россиятааҕы турнир сприҥҥэ күрэхтэһиинэн түмүктэннэ. Быйылгы хайыһар сезонун аһыыга күн-дьыл туран биэрдэ. Хайыһардьыттарга, кыһыны сөбүлээччилэргэ арай хаарбыт чараас, ол да буоллар, хайыһар сезонун аһыы табылынна! Санатан эттэххэ, Алдаҥҥа Россия араас регионнарыттан уонна Казахстантан хайыһардьыттар кэлэн күрэхтэстилэр.

Күрэхтэһии иккис күнэ да, бастакытынааҕар интэриэһинэй буолла. Сприҥҥэ сүүрүү диэн, дьахталлар – 900, эр дьон – 1800 миэтэрэ дистанцияҕа сүүрүүлэрэ.
Онуоха эр дьоҥҥо син эмиэ иннинээҕи күн курдук бастакы миэстэни Мурманскай уобалас хамаандатыттан кыттар олимпийскай призер, спорт үтүөлээх маастара Алексей Петухов ылла. Иккис миэстэҕэ Саха сирин чиэһин көмүскүүр олимпийскай чемпион, Россия биир улахан аттаах-суоллаах хайыһардьыта Никита Крюков таҕыста. Үһүс бириистээх миэстэҕэ РФ спордун маастарыгар кандидат, Алданнааҕы спортивнай оскуоланы үөрэнэн бүтэрбит Саха сирин хамаандатын чилиэнэ Владимир Рыбкин тигистэ.

Дьахталларга син эмиэ күрэхтэһии бастакы күнүгэр курдук, Хабаровскай кыраайтан Екатерина Денисова кыайыылааҕынан таҕыста. Иккис миэстэни Алдантан Анастасия Дубова, үсүһү Москваттан Александра Кононова ыллылар.

Дьэ, ити курдук хайыһар саҥа сезонун аһыы үчүгэйдик барда. Күрэхтэһии бары кыайыылаахтарын уонна призердарын хайыһар сезона саҕаламмытынан эҕэрдэлиибит!

Прасковья ПАВЛОВА, Алданнааҕы Олимпийскай эрэл оҕо спортивнай оскуолатын специалиһа.

Добавить комментарий

Ваш адрес email не будет опубликован. Обязательные поля помечены *