Футболистарбыт ситиһиилэрэ

Олунньу 22-24 күннэригэр Бурятия киин куоратыгар Улан-Удэҕэ Россия мини-футболга любительскай хамаандаларын бастакы лигатын Сибиир зонатын, “Восток” бөлөҕүн сүүмэрдиир күрэхтэһиитэ ыытылынна. Санатан эттэххэ, бу күрэхтэһии бастакы түһүмэҕэ ахсынньыга Читаҕа буолбута.

Саха сирин футболистара – Улан-Удэ хамаандатын 6:3, Читаны 8:1 ахсаанынан кыайан баран, иркутскайдарга 0:6 хотторон кэбистилэр. Онон биир дойдулаахтарбыт иккис миэстэни ылан, Россия күрэхтэһиитин финалыгар кыттар быраабы ыллылар. Санатан эттэххэ, ити күрэхтэһии бу дьыл кулун тутар 21 күнүгэр Новосибирскайга буолара былааннанар.

Хамаанда састаабыгар – Дьулус Пестряков, Дмитрий Курдаков, Алексей Кислицын, Айтал Бурцев, Никита Зубарев, Александр Купряков (хамаанда капитана), Марат Азизов, Алексей Костенко, Алик Цыпандин, Айсен Саввин, Рустам Ларионов, Иван Калачиков оонньоотулар. Тренер – Олег Михайлович Марченко.

Футболистарбытын эҕэрдэлээн кэбиһиэҕиҥ уонна салгыы ситиһиилээхтик күрэхтэһэллэригэр баҕарыаҕыҥ!

“Дьулурҕан”.

Добавить комментарий

Ваш адрес email не будет опубликован. Обязательные поля помечены *