Франк Чамизоны кэтэһэбит

Италия хамаандатын аатыттан кыттар 25 саастаах аан дойду чемпиона, Европа икки төгүллээх чемпиона, Олимпиада боруонса призера кубинец Франк Чамизо – балаҕан ыйын 6-8 күннэригэр Дьокуускайга, “Триумф” Спорка бэлэмнэнии киинигэр ыытыллар ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XI турнирга кэллэҕинэ – түһүлгэни киэргэтэрэ саарбаҕа суох.

Франк Чамизо – билиҥҥи кэм биир чаҕылхай тустууга. Соторутааҕыта, кини Турцияҕа Яшар Догу аатынан түһүлгэҕэ аан дойду түөрт төгүллээх чемпиона Джордан Барроуһу (АХШ) кыайан, 74 киилэҕэ бастыҥ бөҕөс буоларга дьулуһар.

Франк Чамизоны өссө иллэрээ сыл Д.П. Коркин турнирыгар кэлэр диэн баара да, кэлбэтэҕэ. Манан сибээстээн, көҥүл тустууга ССРС спордун маастара, Саха Республикатын үтүөлээх тренерэ Семен Федорович Алексеевы санаан кэллим.

Кини “Дьулурҕан” хаһыакка дөрүҥ-дөрүҥ тустуу туһунан сытыы матырыйааллара, сүрүннээн сүбэлиир, сэмэлиир суруйуулара бэчээттэнэллэрэ. Пресс-конференцияларга сылдьан бэйэтин санаатын сайа этэринэн, хатыылаах ыйытыылары биэрэринэн биллэрэ. Хомойуох иһин, Семен Федорович былырыын ыарахан ыарыыттан биһиги кэккэбититтэн өлөн туораабыта.

Биирдэ ылан көрдөххө, Чамизоҕа – С.Ф. Алексеев туох сыһыаннааҕый диэххит. 1967 сыллаахха Дьокуускайга Куба-Саха сирэ-РСФСР хамаандаларын икки ардыларыгар күрэхтэһии буолбута. Онно спорт маастара Семен Алексеев кыайыыны ситиспитэ. Бэйэтэ эппитинэн, итиннэ кини РСФСР хамаандатыттан Сергей Хачикяны, Кубаттан Квинтин Гарсияны уонна Валерий Колодезниковы, Николай Григорьевы кыайталаабыт.

Бу ситиһии, Семен Федорович спорка олоҕор биир кэрэ-бэлиэ түгэнинэн буолар. Онон да буолуо, 2016 сыллаахха, улуу тренербит Д.П. Коркин турнирын иннинэ Франк Чамизо кэлэрин истэн, ол 1967 сыллааҕы кубалары кытта тустуу туһунан хаартысканы улахан гына бэчээттэтэн баран, түһүлгэни үөрүүлээхтик аһыы кэмигэр Чамизоҕа бэйэтэ туттарарга былааннаабыта. Ол туһунан тэрийээччилэргэ мин этэрбэр, онон сценарийга киллэрэллэригэр көрдөспүтэ. Ол эрээри, эрдэ эппитим курдук, кубинец турнирга кэлбэтэҕэ.

Тэрийээччилэр, Франк Чамизоны быйылгы турнирга хайаан да кэлэр диэн хаста даҕаны суруйдулар, биллэрдилэр. Оттон биһиги, кинини кэллэҕинэ – кэллэ диэхпит!

Петр ПАВЛОВ.

Хаартыскаҕа: Франк Чамизо тренерэ Гайдар Гайдаровы кытта. Каспийскай, 2018 с.

Добавить комментарий

Ваш адрес email не будет опубликован.