Финал: Охлопков — Идрисов

Красноярскай куоракка ыытылла турар икки төгүллээх олимпийскай чемпион Иван Ярыгин кэриэһигэр көҥүл тустууга норуоттар икки ардыларынааҕы ХХХ Гран-при турнир хаамыытын сырдатыыны салгыыбыт. Эрдэ иһитиннэрбиппит курдук, бүгүн киэһэ үс ыйааһыҥҥа финалга тахсар иһин хапсыһыылар ыытылыннылар.

Ону кылгастык dzulurgan.ru сайтка билиһиннэрдэххэ, 57 киилэҕэ аан дойду чемпионатын икки төгүллээх боруонса призера, Азия оонньуутун кыайыылааҕа Эрдэнэбат Бехбаяр (Монголия) эдэрдэргэ аан дойду күрэхтэһиитигэр бастаабыт дагестанец Абасгаджи Магомедовы (Россия) хапсыһыы бүтэрэ икки мүнүүтэ иннинэ 5:1 ахсаанынан кыайан иһэн, бүтэһик мүнүүтэҕэ ахсааны тэҥнэтэн кэбиһэн (5:5), быраабыла быһыытынан хотторуулааҕынан ааҕылынна. Сэрэйдэххэ, уопуттаах бөҕөс чэ кыайдым диэн, эрдэ уоскуйан, ылбыт баалларын харыстаан көмүскэниигэ баран хаалан хоттордо дии саныыбын.

Иккис хапсыһыыга Россия чемпионатын призера Муслим Садулаев монгол Нармандах Насанбуяны 11:0 ахсаанынан холкутук хотто. Онон сарсын, бу ыйааһыҥҥа бастакы миэстэ  иһин россияннар Абасгаджи Магомедов уонна Муслим Садулаев тустар буоллулар.

Оттон турнир боруонса мэтээлин иһин, Садулаевка сабырыйтарбыт китаец Зоу уонна монгол Нармандах итиэннэ иккис бөлөхтөн, Магомедовтан хотторуу хомолтотун билбит турок Пекер, американец Гилман уонна монгол Бехбаяр киирсиэхтэрэ.

Бу турнирга биһиги туох баар болҕомтобутун иккис ыйааһыҥҥа хатаабыппыт. Ол курдук, икки кыттааччылаахпыт – иккиэн биир ыйааһыҥҥа, биир бөлөххө түбэһэн туһуннулар. Кинилэр иккилии утарсааччыларын кыайталаан баран, финалга тахсар иһин киирсиигэ утары көрүстүлэр. Онуоха билигин Румыния аатыттан кыттар Сунтаар улууһун ыччата Николай Охлопков – Россия чиэһин көмүскүүр Эдуард Григорьевы 12:5 ахсаанынан хотон, дьиэк биэрбэтэ.

Баары кырдьыгынан эттэххэ, тус бэйэм Григорьевка ыалдьыбытым. Россия хамаандатын састаабыгар бигэтик киирэн, улахан таһымнаах түһүлгэҕэ кыттарыгар баҕарбытым. Аан дойду чемпионатын призера Джозеф Колону (АХШ) үчүгэйдик кыайбытын көрөн, үчүгэй тустар таһымыгар сылдьар диэн сыаналаабытым. Ол эрээри, Эдуард бэрт кылгас кэм иһигэр икки күрэхтэһиигэ кыттан, ыйааһынын түһэринэн, Охлопковтыын тустуутугар кыаҕа тиийбэтэ дии саныыбын. Оттон Охлопков төттөрүтүн, сибиэһэй буолан, холкутук туһунна.

Анараа бөлөххө Россия чемпиона Магомедрасул Идрисов китаец Лю Миунгу эрэллээхтик хотто. Онон кини 61 киилэ финалыгар биһиги Николай Охлопковпытын кытта тустар буолла. Манна даҕатан эттэххэ, сэтинньигэ Бухарестка ыытыллыбыт 23-гэр диэри саастаах бөҕөстөр аан дойдутааҕы күрэхтэһиилэригэр бу бөҕөстөр сирэй көрсөн тураллар. Онно кыайыыны Идрисов ситиһэн, кыһыл көмүс мэтээлинэн наҕараадаламмыта. Оттон Охлопков боруонса мэтээл хаһаайына буолбутун билэҕит. Бу сырыыга хапсыһыы хайдах хайысхаланарын билбит суох. Арай, уолбут хотторуутун боруостууругар баҕарабыт.

Бу ыйааһыҥҥа Идрисовка хотторбут Рамазан Ферзалиев (Россия) уонна монгол Гансух Отгонбаатар боруонса мэтээл иһин тустуохтара. Оттон Охлопковка сабырыйтарбыт туркмен Ходжанепесов – монгол Цермаа киирсиилэрин кыайыылааҕа Эдуард Григорьевтыын көрсүөҕэ.

Сарсын финаллар киэһэ биһиги бириэмэбитинэн 19:00 чаастан саҕаланаллар. Аны күрэхтэһиини – 65, 79, 125 кг ыйааһыннаахтар саҕалыахтара.

Финалга таҕысталар:

57 кг: Муслим Садулаев – Абасгаджи Магомедов (иккиэн Россия).

61 кг: Магомедрасул Идрисов (Россия) – Николай Охлопков (Румыния).

70 кг: Магомедрасул Газимагомедов (Россия) – Ганзориг Мандахнаран (Монголия).

Петр ПАВЛОВ.

Александр ПОСЕЛЬСКАЙ хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *