Финал: Василий Егоров – Батор Сагалуев

Бүгүн, Россия боксаҕа чемпионатын финалга тахсар иһин киирсиилэрэ Крым Керчь куоратыгар буолбут кутурҕаннаах быһылаанынан сибээстээн биир мүнүүтэлээх кэриэстэбилинэн саҕаланна. Дьэ, ол кэнниттэн “Триумф” Спорка бэлэмнэнии киинин сүрүн саалатыгар туруоруллубут биир рингэҕэ финал аҥаарынааҕы киирсиилэр саҕаланнылар.

Бастакынан рингэҕэ 49 киилэҕэ Василий Егоров (Саха сирэ, Москва уобалаһа) – Артыш Соян (Новосибирскай) таҕыстылар. Саалаҕа толору мустубут көрөөччүлэр боксердары эҕэрдэлии көрүстүлэр.

Бастакы раунд: маҥнай боксердар бэйэ-бэйэлэрин үөрэтэн, чуҥнаһан киирсиини орто тэтимнээхтик саҕалаатылар. Саала тугу эрэ кэтэһэрдии чуумпуран хаалла. Сыыйа-баайа Василий улам баһыйара көстөн таҕыста. Кини утарсааччытынааҕар хамсаныыта быдан түргэн, быдан сымса. Ол сылдьан таба охсуулары оҥордоҕун ахсын көрөөччүлэр дьэ уһуктан, сэргэхсийэ түһэллэр. Уолбут хас таба охсуутун ахсын ытыстарын таһынан истилэр.

Маҥнайгы тохтобулга информатор-судьуйа: “Василий Егоров – 1993 сыллааҕы төрүөх, боксанан 12 сыл дьарыктанар, Россия спордун үтүөлээх маастара. “Динамо” спортивнай уопсастыбаттан кыттар. Россия уонна Европа чемпиона. Тренердэрэ: Николай Егоров, Артур Пахомов, Сергей Анохин, бастакы тренерэ Петров” — диэн билиһиннэрдэ.

Иккис раунд: син биир, Василий Егоров бэйэтин киирсиитин күөттүү сатаата, наар кимэн таҕыста. Корпуһунан үчүгэйдик үлэлиир, стойкатын уларыта сылдьар араастаан атаакалаата. Тыынара үчүгэй. Уола да хаалсыбат, тэҥҥэ киирсэр. Ол да буоллар, туораттан көрүүгэ биһиги боксербут эмиэ баһыйда.

Информатор-судьуйа: “Артыш Соян – 1992 cыллаах төрүөх. Россия спордун норуоттар икки ардыларынааҕы кылаастаах маастара. Сэбилэниилээх Күүстэр ааттарыттан кыттар. Россия 2017 сыллааҕы чемпиона, Германияҕа ыытыллыбыт турнир финалиһа. Тренердэрэ: Россия үтүөлээх тренерэ Владимир Моткин уонна Чаян Соян”, — диэн биллэрэр.

Үһүс раунд: киирсии сытыырхайар. Егоров кимэр. Ол аайы көрөөччүлэр: “Үлэлээ!”, “Бырах!”, Во-во, маладьыас!”, “Вася! Вася!! Вася!!!” диэн үөгүлээһин бөҕө. Ол аайы уолбут өссө тэбиэһирэн туран атаакалыыр, таба охсуулары оҥорор. Бу да раунд кини туһатыгар түмүктэннэ.

Информатор-судьуйа: “В этом бою, победу одержал и вышел в финал боксер с красного угла Василий Егоров!” — диэн эппитин кэннэ, саала үөрүүтүттэн оргуйа түһэр. Кыайыы биһиэхэ!

Бу ыйааһыҥҥа иккис киирсиигэ норуоттар икки ардыларынааҕы кылаастаах спорт маастара Батор Сагалуев (Бурятия, Хабаровскай) – Россия былырыыҥҥы чемпионатын боруонса призера Эдмонд Худояны (Челябинскай) кыайан, финалга таҕыста.

Онон 49 киилэҕэ бүтэһик быһаарыылаах киирсиигэ Василий Егоров (Саха сирэ, Москва уобалаһа) – Батор Сагалуев (Бурятия, Хабаровскай) көрсүөхтэрэ. Финаллар сарсын, алтынньы 20 күнүгэ киэһээ 17:00 чаастан саҕаланаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *