Уус Алдан алтыс чемпионата ыҥырар

Бу өрөбүлгэ, олунньу 3 күнүгэр Бороҕоҥҥо, Н.Н. Тарскай аатынан спортивнай-чэбдигирдэр комплекска Уус Алдан улууһун көҥүл тустууга биирдиилээн уонна хамаанданан бастыыр иһин чемпионата ыытыллар. Чемпионат улуус комплекснай спартакиадатын чэрчитинэн ыытыллар буолан тыҥааһыннаах уонна нэһилиэктэр икки ардыларыгар сүрдээх хатыһыылаах буолааччы. Бу күрэхтэһии түмүгүнэн республика чемпионатыгар Уус Алдан хамаандатын састааба сүүмэрдэнэр.

Чемпионат бырагыраамата:

Олунньу 3 күнэ, баскыһыанньа

08:00-09:00 – Чемпионат кыттыылаахтарын ыйааһыннаныылара.

10:00-14:00 – Барыллааһын хапсыһыылар.

14:00-14:30 – Чемпионаты үөрүүлээхтик аһыы.

14:30-16:00 – Барыллааһын хапсыһыылар.

16:00-17:00 – Финалга тахсар иһин хапсыһыылар, финаллар.

17:00-18:00 – Кыайыылаахтары наҕараадалааһын.

Хамаанданан кыайыылаахтар кубоктарынан уонна дипломнарынан наҕараадаланыахтара. Оттон биирдиилээн ыйааһыннарга кыайыылаахтар уонна иккис-үһүс миэстэлэммиттэр харчынан бириэмийэлэниэхтэрэ: бастакы миэстэ иһин – 7000, иккис —  4000, үһүс – 2000 солк.. Ону тэҥэ “Чемпионат бастыҥ бөҕөһө”, “Кыайыыга дьулуурун иһин” уонна “Бастыҥ хапсыһыы” диэн анал бириистэр оонньонуохтара.

Санатан эттэххэ, бу, саҥа үйэҕэ Уус Алдан улууһун көҥүл тустууга алтыс чемпионата. Былырыын маннык күрэхтэһиигэ улуус 11 нэһилиэгин 133 бөҕөһө кыттыбыта. Хамаанданан түмүккэ Тумул күүстээх, түмсүүлээх хамаандата хаһыс да сылын субуруччу кыайыы көтөллөммүтэ. Иккис миэстэҕэ Тиит Буурай ыччаттара – найахылар тахсыылара, соһуччу буолбута. Үһүс бириистээх миэстэни дьиэлээхтэр – мүрүлэр ылбыттара. Чемпионат бастыҥ бөҕөһүнэн 79 киилэ кыайыылааҕа, спорт маастара Айсен Копырин ааттаммыта.

Ыйааһыннарынан кыайыылаахтарынан буолбуттара: 57 кг – Айаал Белолюбскай (Кэптэни), 61 кг – Афанасий Вензель (Танда), 65 кг – Виталий Эспек (Тумул), 70 кг – Василий Шалугин (Найахы), 74 кг – Ваир Бурцев (Тумул), 79 кг – Айсен Копырин (Уһун Күөл), 86 кг – Василий Местников (Сыырдаах), 92 к – Богдал Овчинников (Мүрү), 97 кг – Арсентий Николаев (Тумул), 125 кг – Евгений Алексеев (Тумул).

Петр ПАВЛОВ.

  

Добавить комментарий

Ваш адрес email не будет опубликован. Обязательные поля помечены *